Maqthaiq 27

Yeiqsul bhai heeqphaq Phillav jaol nail bha hel aivq-a nail ganl

1Nqbhaq bhaq lal-u phao, Philma juq khi mail Yuldav tsaol-aq nail aqivq aqtsu jiovq-ai thaq nail juq iqsanl mail, Yeiqsul bhai deeq heivq nail dai, maoq bhaoq nl ceiv-a nail ngaol. 2A bhai nee ngal-aq, aqyu juq aivq bhai pheethaiq khi, Yuldav milkhaoq khe heeqphaq Phillav jaol nail bha hel aivq khi aivq nail aqlavq lavqkhoel bhai av bhiq-a nail ngaol.

Yuldav sil-a nail ganl

3Yeiqsul bhai yu nail aqlavq lavqkhoel bhai av bhiq-a nail Yuldav al gaq, Yeiqsul bhai heivq nail dai khi, yu yalkhaq dal nail bhai ya moel-a nail ngaol. Aq-u phao, aivq noeq pov lal khi, phul al hail tsel bavq Philma juq khi aqivq aqtsu juq jaol nail bha bivq kovq ail-a nail ngaol. 4“Oeqbal maq aol nail gaq bhai ngal yu nail aqlavq lavqkhoel bhai av bhiq-a nail ngel-i mail, ngal oeqbal nl thaq nail ngaol” dai, ge nail ngaol.

Thail hai ngaol-aoq, aqyu juq ge bhiq-a nail: “Ganl niil nv juq nee khal hai tavq nail-aiq. Naoq nail ganl naol saol-nvq daiq yaoq” dai, ge bhiq-a nail ngaol.

5Aq-u phao, aivq phul al bhai uqhuq thaoq nail ilkhaol il ma nail lavqkhoel bhai liv bhoel ail ceevq khi dov ail-a nail ngaol. A bhai nee ngal-aq, aivq bhai aivq leeltsee tsee heil laivq-a nail ngaol.

6Philma juq phul al oil khi, “Phul niil neq, sil-a nail aqphoiq ngel-i mail, danq-ai thaq nail phul al nail lavqkhoel bhai maq oil bhoel khaoq ail” dai, ge nail ngaol. 7A bhai nee ngal-aq, aqyu juq maoq bhaoq nl khi, daq-i juq sil-u phao, duq pheeq nail haqbhoil, iqlaoq teivq nail gaq nail miltsaq teevq tsaol ul-a nail ngaol. 8Al heel ngel-i mail, Yaq n n-gaol kev dai, miltsaq al tsaol bhai aqsivq nail miltsaq dai, khul nail ngaol. 9Aq-u phao, Miqyail nail haqbhoil ge dan nail Yeiqlaq mil-i mail ge-ai thaq nail khe-ai bhee lal-a nail ngaol. Aivq ge nail: “Ilsaqleiqlav nail tsaol-aq juq-i mail aqphoiq ge ceiv-ai thaq nail aivq nail aqphoiq phul hail tsel bavq oil khi, 10Heeqphaq Miqyail ngaq bhai daoq bivq-ai thaq nail khe-ai, iqlaoq teivq nail gaq nail miltsaq teevq tsaol-aqyu juq ul-a nail ngaol” dai, ge-ai thaq nail ngaol.

Heeqphaq Phillav Yeiqsul bhai nal daiq-a nail ganl

11Yeiqsul Yuldav milkhaoq khe heeqphaq Phillav nail sivtavq bhai thul phaol khi jaol-u phao, “Naol Yuldav tsaol-aq nail heeqphaq ngaol laiq” dai, heeqphaq Phillav aivq bhai nal daiq-a nail ngaol. “Naol ge nail khe-ai, ngel naol” dai, Yeiqsul ge kovq bhiq-a nail ngaol.

12Thail hai ngaol-aoq, Philma juq khi mail aqivq aqtsu juq aivq nail kovtavq bhai oeqbal thaq-u phao, Yeiqsul khul teevq phaq ail maq ge kovq bhiq-al. 13Aq-u phao, “Naoq nail ganl aqyu juq salkhil khanq dee dee nail bhai, naoq bhai maq gaiq lal ail laiq” dai, Phillav Yeiqsul bhai nal daiq bhiq-a nail ngaol. 14Thail hai ngaol-aoq, Yeiqsul daoq teevq daoq iqsanl maq ge kovq nail bhaq da nee, Phillav noeq-u maq dov dai, pevq dee dee ail-a nail ngaol.

Yeiqsul bhai heivq yaoq dai, dal ceiv-a nail ganl

15Bhaqsaqkhaq aqbhee lav sav thail thaiq-u phao, thaonq bhai aol nail tsaol-aq juq nail lavqkhoel khe, milkhaoq yaq mao dai neema tsaq nail teevq gaq bhai Yuldav milkhaoq khe heeqphaq phaiq nail aol jiav nail ngaol. 16Aq-u phao, aqmil dov nail Bhaqlaqbhal dai mil-ai thaq nail teevq gaq thaonq bhai laol-ai thaq nail ngaol. 17Milkhaoq yaq juq jil lai khi jaol-u phao, Phillav ge nail: “Nul juq khul gaq bhai bhi phaiq movq nail-aiq, Bhaqlaqbhal bhai laiq. Maq ngel haq neq, Khali dai khul nail Yeiqsul bhai laiq” dai, aqyu juq bhai nal daiq bhiq-a nail ngaol. 18Khul khi mail dai ngal-aq neq, “Aqivq aqtsu juq Yeiqsul bhai neekhaol maq sil-ai bhiq nail ngel-i mail, ngaq bhai av lavq thaq nail niil” dai, Phillav heeq nia nail ngaol.

19Phillav yalkhaq dal nail doiqbev bev ma bhai jaol deel-nvq thaq-u phao, aivq nail khaqma aivq bhai daoq cavq niail hai cavq bhoel-ai lavq-a nail ngaol: “Naol khul teevq phaq iqsanl laiq nail tsa nail maq aol nail tsaol-aq thoil gaq bhai, khul thaq khi. Khul khi mail dai ngal-aq neq, milkiv ngal nv mav mav nail lavqkhoel bhai aivq bhaq da nee ya daq dee dee-a nail ngaol” dai, cavq bhoel-ai leevq-a nail ngaol.

20Thail hai ngaol-aoq, “Bhaqlaqbhal bhai phaiq khi, Yeiqsul bhai deeq heivq yaoq dai, ge dei-eiq” dai, Philma juq khi mail aqivq aqtsu juq tsaol-aq munl munl ma juq bhai ge bhiq khi, jalmul mul ya-ai thaq nail ngaol.

21“Tsaol-aq niil nvq gaq nail lavqkhoel khe, khul gaq bhai bhi phaiq movq nail-aiq” dai, Phillav aqyu juq bhai gaoq nal daiq-u phao, “Bhaqlaqbhal bhai phaiq yaoq” dai, aqyu juq ge kovq bhiq-a nail ngaol.

22“Thail hai phal-iq neq, Khali dai khul nail Yeiqsul bhai ngal khal hai ya khi nail-aiq” dai, Phillav aqyu juq bhai nal daiq-u phao, “Aivq bhai lavqyavq kovtavq bhai tavq heivq yaoq” dai, aqyu juq iqsanl mail ge nail ngaol.

23“Khul khi mail bhi tavq heivq movq nail-aiq. Aivq haqeiv nail phaq khul nl-a nail-aiq” dai, Phillav nal daiq-u phao, “Aivq bhai lavqyavq kovtavq bhai tavq heivq yaoq” dai, aqyu juq iqmoeq-u nee maq tsil gaoq gul nail ngaol.

24Phillav khul teevq phaq ail maq khi nia nail nee ovqtavq, tsaol-aq munl munl ma suq saq lal nail bhai iqsanl aivq ya moel-a nail ngaol. Aq-u phao, aivq ulcuvq tsiq khi, tsaol-aq munl munl ma nail sivtavq bhai aqlavq tsiq khi ge nail: “Aqtsaq aqdaol tsaol-aq niil gaq nail do ngaq nail kovtavq bhai thaq bhi kev lee. Nul juq yovqgavq bhai yovqgavq nl yaoq” dai, ge bhiq-a nail ngaol.

25“Aivq nail do nv juq khi nv juq nail aqjievq lilheel nail kovtavq bhai kev lee dei-eiq” dai, tsaol-aq al juq iqsanl mail ge nail ngaol.

26Aq-u phao, Phillav Bhaqlaqbhal bhai aqyu juq nail haqbhoil phaiq bhiq-a nail ngaol. Thail hai ngaol-aoq, Yeiqsul bhai neq, bhi deeq khi mail lavqyavq kovtavq bhai bhi tavq heivq nail dai khi, av bhiq-a nail ngaol.

Genl dev nail juq Yeiqsul bhai meel naq-a nail ganl

27Aq-u phao, Phillav nail genl dev nail juq, Yeiqsul bhai genl dev nail aqivq juq jaol nail ilkhaol lavqkhoel bhai hevq bhoel aivq khi, genl dev nail teevq munl munl lao ail a bhai bhi jil lal-a nail ngaol. 28Aqyu juq Yeiqsul nail phailkhaoq nieivq loev khi, nel nav nav nail heeqphaq nail phailkhaoq heelma bhi doi-a nail ngaol. 29Aq goe aq jiav oil khi, heel uq tsaoq khe-ai jievq khi, aivq bhai nieivq tsaoq bhiq-a nail ngaol. Aivq nail lavqmal phao khe lavq bhai lunl aqkhaoq teevq khaoq bhi nieivq thaiq khi, aivq nail sivtavq bhai peevqceevq kovdoiq doiq khi, “Yuldav nail tsaol-aq nail heeqphaq-ol, naol geeqlaoq eeq dei-eiq” dai, aivq bhai meel naq bhiq-a nail ngaol. 30Aivq bhai thaiqkhaq thaiqbav khi, aqyu juq lunl aqkhaoq al khaoq oil kovq khi mail, aivq nail uqhuq bhai deeq dee dee-a nail ngaol. 31Aqyu juq aivq bhai khal nl movq ail nl bhiq gaq-al nee ngal-aq neq, aivq-i mail doi-nq thaq nail phailkhaoq heelma nieivq loev khi, aivq nail aqgaq aqdoi gaoq bhi doi-a nail ngaol. A bhai nee ngal-aq, lavqyavq kovtavq bhai tavq heivq nail dai khi, aivq bhai hevq dol aivq-a nail ngaol.

Yeiqsul bhai lavqyavq kovtavq bhai tavq thaiq-a nail ganl

32Aqyu juq dov-ail thail thaiq-u phao, Khulleiqniq meenq bhai jaol nail Sil moq dai mil-ai thaq nail teevq gaq bhai moel-a nail ngaol. Aqyu juq aivq bhai nieivq khi, Yeiqsul nail lavqyavq bhi bavq-a nail ngaol. 33Aqyu juq Gaollaqgaoldav dai, khul nail dao bhai lai kev-a nail ngaol. Aqmil al neq, uqcov dai, ge nail ngaol. 34Aqkhaq mao ail khaq nail phaq kheq-ai thaq nail aqheeq tsilju nail ullul genl dev nail juq aivq bhai bhi daol khi ngaol-aoq, aivq mevqdaiq khi maq daol-al. 35Aqyu juq aivq bhai lavqyavq kovtavq bhai tavq thaiq-ai thaq khi mail, aivq nail aqgaq aqdoi khul gaq khul keiv ya nail tsaq ail dai, eellaoq bheq khi bhoilpav khi oil-a nail ngaol. 36A bhai nee ngal-aq neq, aqyu juq a bhai jaol deel khi, aivq bhai lovq-a nail ngaol. 37“Tsaol-aq niil gaq Yuldav nail tsaol-aq nail Heeqphaq Yeiqsul ngaol” dai, aqyu juq aivq bhai oeqbal thaq nail haoqgavq gevq khi, aivq nail uqhuq kovtavq bhai tavq bav-ai thaq nail ngaol. 38Yeiqsul nee mail teevq gaq khe-ai, khoiqbhaoq nvq gaq bhai iqsanl, lavqmal phao teevq gaq, lavqtsel phao teevq gaq dai, tavq thaiq-ai thaq nail ngaol. 39Khal ail khal lal nail tsaol-aq juq, uqhuq jiivq jiivq ail, aivq bhai meel naq nail ngaol. 40Aqyu juq ge nail: “Naol neq, uqhuq thaoq nail ilkhaol il ma bhai peiv ha khi, hail n nail lavqkhoel bhai cov phal kivq naol dai, ge lao nail, maq ngel ail laiq. Naol naoq nail aqmaol bhai bhi jel-ail yaoq thoq. Naol Miqyail nail Yaqyov ngel haq neq, lavqyavq miltsaq nee mail yavq kha lee aiq thoq” dai, ge bhiq-a nail ngaol.

41Al hai dul dai, aoldaoq kovqdaoq cavq nail cov nail juq, aqivq aqtsu juq khi mail Philma juq iqsanl, Yeiqsul bhai meel naq bhiq-a nail ngaol. 42Aqyu juq ge nail: “Aivq yu bhai hevq kovq kivq naol geiq. Thail hai ngaol-aoq, aivq nail aqmaol bhai neq, aivq maq hevq kovq nia-il. Aivq neq, Ilsaqleiqlav nail tsaol-aq nail heeqphaq ngaol geiq. Thail hai phal-iq neq, aivq lavqyavq miltsaq nee bhi yavq kha lee daiq yaoq. Yavq kha lee haq neq, ngadao juq iqsanl aivq bhai neema thaq tsaol lal naol. 43Aivq Miqyail bhai neema thaq tsaol-a nail ngaol. Al heel ngel-i mail, Miqyail aivq bhai neema tsaq haq neq, aivq bhai bhi jel-ail nail ngaol. Khul khi mail dai ngal-aq neq, ‘Ngal neq, Miqyail nail Yaqyov ngaol’ dai, aivq ge-ai thaq nail ngaol” dai, aqyu juq ge nail ngaol. 44Aivq nee mail lavqyavq kovtavq bhai tavq thaiq-ai thaq nail khoiqbhaoq al nvq gaq iqsanl, al hai dul dai, aivq bhai meel naq meel naq ail, ge nail ngaol.

Yeiqsul aqhaq ceiv-a nail ganl

45N gaol gaolkav kav nail yanq nee mail kivqhail lail ma phao naqli hail lavq bhai kev dai, miltsaq heeq lao lao ail nav tsee dai, pevq ail-a nail ngaol. 46Kivq hail lail ma phao naqli hail lavq bhee lal-u phao, Yeiqsul aqthel aqkav kav dai, niail hai gul-a nail ngaol: “Eillil, Eillil, laq maq saq bhaq taq nil” dai, gul-a nail ngaol. Daoq al daoq neq, Ngaq nail Miqyail-ol, ngaq nail Miqyail-ol, khul khi mail naol ngaq bhai khaonq ha lavq nail-aiq dai, ge nail ngaol.

47A bhai thul phaol nail tsaol-aq teevq pav ga nav juq daoq al daoq bhai ya gaiq-u phao, “Thoil gaq, Eillilya bhai khul nail niil” dai, ge nail ngaol.

48Aqyu juq nail lavqkhoel khe teevq gaq lavqtsail mail, iqyaq iqma khe mul lul khe-ai dul nail niaqpeovq teevq khai cev ail khi, aqtsel tsel nail aqheeq tsilju nail ullul bhai oil deev-a nail ngaol. A bhai nee ngal-aq, lunl aqkhaoq bhai soiqtsaoq khi, Yeiqsul bhai bhi siv daol-a nail ngaol. 49Thail hai ngaol-aoq, teevq pav ga nav juq neq, “Thaq tsal lao, Eillilya aivq bhai hevq kovq lee nail meeq. Daonq daiq bhel” dai, ge nail ngaol.

50A bhai nee ngal-aq, Yeiqsul aqthel aqkav kav dai, teevq pov gaoq gul khi, aqhaq ceiv-a nail ngaol.

51Aq-u phao, uqhuq thaoq nail ilkhaol il ma lavqkhoel khe thao pav-ai thaq nail haqphal phal ma, uqhuq nee mail daoqthaoq bhai dov dai, nvq pav pav ail-a nail ngaol. Milluv luv khi, lovmav juq iqsanl pav lal-a nail ngaol. 52Luqdaol juq phao lal khi, sil thaq nail Miqyail nail tsaol-aq mee nia gaq doevq kovq lal-a nail ngaol. 53Yeiqsul doevq kovq lal gaq-u phao, aqyu juq luqdaol nee mail dov lal khi, meeq nail haol nail Yeiqlulsaqlaiq meenq bha aol lai-a nail ngaol. Tsaol-aq mao dai gaq aqyu juq bhai ya moel-a nail ngaol.

54Genl dev nail teevq yal gaq nail aqivq gaq khi, Yeiqsul bhai lovq thail thaiq nail genl dev nail juq, mil luv luv nail khi pevq lal-a nail yaoq juq yaoq bhai ya moel-u phao, aqyu juq gee sil dee dee nail ngaol. “Tsaol-aq niil gaq, mal dil Miqyail nail Yaqyov teevq gaq nial” dai, aqyu juq ge nail ngaol.

55A bhai nee al jaiq-ail maq eq nail bhai yaqmai-aq mee nia gaq jaol khi hel daiq thail thaiq nail ngaol. Aqyu juq neq, Yeiqsul Gaq liq lail milkhaoq nee mail dov lal-u phao, aivq nail haoqnao tsao the tsao the ail aivq bhai tsao jao-ai bhiq-a nail juq ngaol. 56Aqyu juq nail lavqkhoel Maqgaqdaqlal meenq bhai jaol nail Maq lil, Yaqkov yaqnoil gaq khi mail Yaolsai nail aqma Maq lil khi mail, Seiq bheiq dail nail yaqyov juq nail aqma, aqyu juq jaol nail ngaol.

Yeiqsul bhai duq pheeq-a nail ganl

57Nqkivq kivq lee-u phao, Aqlilmaqthaiq meenq bhai jaol nail Yaolsai dai mil-ai thaq nail hulmeeq hul bhao teevq gaq lal-a nail ngaol. Aivq neq, Yeiqsul nail yaq laol ngaol. 58Aivq Phillav jaol nail bha Yeiqsul nail aqmaol hal ail-a nail ngaol. “Aivq bhai bivq yaoq” dai, Phillav daoq bivq-a nail ngaol. 59Yaolsai Yeiqsul nail aqmaol bhai bal aivq khi, aqhaol haol taiv deel haqphal phal phul-i mail maoltoev toev-a nail ngaol. 60A bhai nee ngal-aq, lovmav-i mail tavq-ai thaq nail aivq nail luqdaol aqsivq lavqkhoel bhai bavq duq ail-a nail ngaol. Luqdaol nail moeqkhoeq bhai lovmav heeq ma laiq tsoiq ail ceevq khi, kovq lai-a nail ngaol. 61Maqgaqdaqlal meenq bhai jaol nail Maq lil khi mail Maq lil yaoq gaq yaoq, luqdaol moeqkhoeq nee mao ail maq eq nail bhai jaol deel-nvq thaq nail ngaol.

62Jaol n n-gaol nail haqbhoil lainq nail aqn jel-ail khi, niaohao n-gaol, Philma juq khi mail Phaq liq sail juq Phillav jaol nail bha jil lai-a nail ngaol. 63Aqyu juq ge nail: “Heeqphaq-ol, yu bhai hevq bheeq nail al gaq aqdoevq doevq-u phao, hail n bhee lal haq neq, ngal gaoq doevq kovq lal nail ngaol dai, ge-ai thaq nail bhai nv juq bhai noeq dov lal-a nail ngaol. 64Al heel ngel-i mail, aivq nail yaq laol juq aivq bhai bavq dov khoil aivq khi, aivq doevq kovq lal-aoq nail ngaol dai, yu bhai maq ya ge bhiq dai, hail n bhee dai, luqdaol al bhai aqmeeq-ai lovq yaoq dai, daoq bivq yaoq. Maq ngel haq neq, iqmoeq-u phao hevq bheeq-a nail nee maq tsil, haoqnao hevq bheel aivq nail neq, eeq jaiq nail ngaol” dai, ge bhiq-a nail ngaol.

65“Nul juq ngaq nail genl dev nail tsaol-aq juq khul khi kovq-ail yaoq. Nul juq khal khi kivq nail khe-ai, aqmeeq-ai bhi lovq ail yaoq” dai, Phillav aqyu juq bhai ge bhiq-a nail ngaol. 66Al heel ngel-i mail, aqyu juq ail khi, yu luqdaol bhai maq ya phao dai, lovmav heeq ma bhai junq deeq khi, genl dev nail juq bhai bhi lovq ail ceevq-a nail ngaol.

Currently Selected:

Maqthaiq 27: aeu

Highlight

Copy