Maqthaiq 26

Yu Yeiqsul bhai deeq heivq nail dai, maoq bhaoq nl nail ganl

1Ganl al juq iqsanl mail Yeiqsul cavq bhiq cov bhiq gaq khi, aivq aivq nail yaq laol juq bhai niail hai ge bhiq-a nail ngaol: 2“Nvq n jel-ail haq neq, Bhaqsaqkhaq aqbhee lav sav nail ngaol dai, nul juq heeq nia nail ngaol. Tsaol-aq nail Yaqyov bhai lavqyavq kovtavq bhai tavq heivq nail dai khi, aivq bhai yu nail aqlavq lavqkhoel-ai av bhiq nail bhai aivq ya daq nail ngaol” dai, ge bhiq-a nail ngaol.

3Yanq al yanq bhai, Philma juq khi mail Yuldav tsaol-aq nail aqivq aqtsu juq, Gaqyaqphal dai mil-ai thaq nail Philma nail ilkhaol bhai jil lai-a nail ngaol. 4Khal hai khi mail, aq tsi tsu dai, Yeiqsul bhai nieivq khi ya deeq heivq heeq dai, aqyu juq maoq bhaoq nl-a nail ngaol. 5“Tsaol-aq nii dai nail maq ya suq saq lal dai, aqbhee niil lav sav-u phao, thaq nieivq haq lao-oq” dai, aqyu juq nail gaiqlaq bhai ge pheel jaq-a nail ngaol.

Yeiqsul bhai huqbhiq nil nail ulcuvq hoel dav bhiq-a nail ganl

6Niaoqbhaoq daol daiq-a nail Sil moq dai mil-ai thaq nail teevq gaq, Bheiqtaq nil jul gu bhai jaol nail ngaol. Yeiqsul aivq nail ilkhaol bhai jaol-u phao, 7yaqmai-aq teevq gaq aivq jaol nail bha lal-a nail ngaol. Yaqmai-aq al gaq, mao ail phoiq nail huqbhiq nil nail aqtseel deq nail phulleq deel lovmav malcavq teevq cavq tsil lavq-a nail ngaol. Yeiqsul kovqkhail aoq jaoq jaoq khi aoq jaq thail thaiq-u phao, aivq nail uqhuq bhai huqbhiq nil nail aqtseel al hoel dav bhiq-a nail ngaol.

8Aivq al hai nl nail bhai yaq laol juq ya moel-u phao, aqyu juq neema phail phail ail khi ge nail, “Khul khi mail ganl maq tsoiq nail bhai huqbhiq nil nail aqtseel thoil yuq ha nail-aiq. 9Huqbhiq nil nail aqtseel thoil gaoq haq neq, phul mao dai ya nail ngaol. Phul al oil khi haq nail aoq nail juq bhai bhoil bhiq kivq nail ngaol” dai, ge bhiq-a nail ngaol.

10Yeiqsul ganl al heeq nia-u phao, aivq aqyu juq bhai ge bhiq-a nail: “Khul khi mail nul juq yaqmai-aq niil gaq bhai lav suq saq nail-aiq. Aivq ngaq bhai aqmeeq phaq nl lavq-a nail ngaol. 11Haq nail aoq nail juq neq, nul juq nee mail khaq mao iqsanl jaol nail ngaol. Thail hai ngaol-aoq, ngal nul juq nee mail khaq mao iqsanl jaol nail maq ngel-ail. 12Huqbhiq nil nail ulcuvq niil ngaq nail aqmaol bhai hoel dav lavq-a nail neq, ngaq bhai duq pheeq nail haqbhoil, lav sav lavq-a nail ngaol. 13Ngal nul juq bhai mal dil dai, ge lavq bhel. Lavq khiq tsail nail geeqlaoq daoq niil miltsaq doi dai cavq bhiq ail-u phao, yu aivq bhai noeq kev dai, yaqmai-aq niil gaq-i mail nl-a nail ganl niil iqsanl ya cavq bhiq nail ngaol” dai, ge bhiq-a nail ngaol.

Yuldav Yeiqsul bhai gaoq jaq-a nail ganl

14Aq-u phao, yaq laol tsel-nvq gaq nail lavqkhoel bhai aol nail, Yuldav Ilsaqgaq liqoq dai mil-ai thaq nail gaq, Philma juq jaol nail bha lai-a nail ngaol. 15“Ngal Yeiqsul bhai nul juq nail aqlavq lavqkhoel bhai av bhiq haq neq, ngaq bhai phul kha dai bivq nail-aiq” dai, nal daiq-a nail ngaol. Aqyu juq aivq bhai: “Phul hail tsel bavq bivq naol” dai, ge bhiq-a nail ngaol. 16Aq-u nee mail, Yeiqsul bhai aqyu juq nail aqlavq lavqkhoel bhai av bhiq nail, khaq mao eivq lal nail ngel ail dai, Yuldav hal pov nail ngaol.

Yeiqsul aivq nail yaq laol juq nee mail Bhaqsaqkhaq aqbhee jaq-a nail ganl

17Deqtsiq maq aol nail khaqmul jaq nail aqbhee iqmoeq khe n-gaol, yaq laol juq Yeiqsul jaol nail bha lal khi, “Bhaqsaqkhaq aqbhee jaq kivq dai, naoq nail haqbhoil khul dao bhai bhi lav sav thaq ail movq nail-aiq” dai, nal daiq bhiq-a nail ngaol.

18Aivq ge nail: “Meenq bhai jaol nail al gaq nail ilkhaol bhai ail khi niail hai ge bhiq ail yaoq. ‘Saq laq ge nail: Ngaq nail aqyanq kev lee aiq nail ngaol. Naoq nail ilkhaol bhai ngal ngaq nail yaq laol juq nee mail Bhaqsaqkhaq aqbhee jaq nail geiq’ dai, aivq bhai ge bhiq ail dei-eiq” dai, ge bhiq-a nail ngaol. 19Yeiqsul-i mail khoel nail khe-ai, yaq laol juq Bhaqsaqkhaq aqbhee jaq nail haqbhoil lav sav ail-a nail ngaol.

20Nqkivq kivq lee-u phao, Yeiqsul yaq laol tsel-nvq gaq nee mail kovqkhail aoq jaoq jaoq-a nail ngaol. 21Aqyu juq aoq kivq jaq thail thaiq-u phao, Yeiqsul ge nail: “Ngal nul juq bhai mal dil dai, ge lavq bhel. Nul juq nail lavqkhoel khe teevq gaq ngaq bhai yu nail aqlavq lavqkhoel bhai av bhiq nail ngaol” dai, ge bhiq-a nail ngaol.

22Aqyu juq noeq haq dee dee khi, “Heeqphaq-ol, ngal laiq” dai, teevq gaq nee teevq gaq aivq bhai nal daiq-a nail ngaol.

23Aivq ge nail: “Ngaq-ai nee teevq gaoq bhai jaq nail gaq, ngaq bhai yu nail aqlavq lavqkhoel bhai av bhiq nail ngaol. 24Tsaol-aq nail Yaqyov neq, aivq nail ganl gevq-ai thaq nail khe-ai, ya sil nail ngaol. Thail hai ngaol-aoq, aivq bhai yu nail aqlavq lavqkhoel bhai av bhiq-a nail gaq neq, geeqlaoq aqdoil ya nail ngaol. Tsaol-aq al gaq maq doevq lee-a nail kheel nul neq, aivq nail haqbhoil meeq jaiq nail ngaol” dai, ge bhiq-a nail ngaol.

25Yeiqsul bhai yu nail aqlavq lavqkhoel bhai av bhiq nail Yuldav al gaq, “Saq laq-ol, ngal laiq” dai, nal daiq-u phao, “Ngel naol. Naol ge nail khe-ai ngaol” dai, Yeiqsul aivq bhai ge kovq bhiq-a nail ngaol.

26Aqyu juq aoq kivq jaq thail thaiq-u phao, Yeiqsul khaqmul oil khi, Miqyail bhai tsiq eeq-a nail ngaol. A bhai nee ngal-aq, khaqmul al ngaoqpav khi, “Niil neq, ngaq nail aqmaol ngaol. Oil jaq yaoq” dai, ge khi yaq laol juq bhai tsiq bhiq-a nail ngaol. 27Aq heeq tsil ju nail ullul deq nail khaoqanq tsiq khi, Miqyail bhai gaoq tsiq eeq-a nail ngaol. A bhai nee ngal-aq, aivq aqyu juq bhai tsiq bhiq khi ge nail: “Nul juq yaoq gaq yaoq-ao nee daol yaoq. 28Khul khi mail dai ngal-aq neq, niil neq, daoqma saljial bhai tavq nail ngaq nail aqsivq ngaol. Tsaol-aq mao dai nail oeqbal phaiq bhiq kivq dai, ngaq nail aqsivq bhi il lee nail ngaol. 29Ngal nul juq bhai ge lavq bhel. Ngaq nail Aqbhu nail Milkhaoq lavqkhoel bhai nul juq nee mail teevq gaq khe-ai aqheeq tsilju nail ullul aqsivq ngal ya daol-u n-gaol kev dai, ngal aqheeq tsilju nail ullul maq daol yaoq-aol” dai, ge bhiq-a nail ngaol.

Bheiqtuvluv Yeiqsul bhai maq heeq kivq ail dai, jil nail ganl

30A bhai nee ngal-aq, aqyu juq tsiq eeq nail daoqsel gul nail daoq gul khi, Saqloq gaoqjaoq bha dav lai-a nail ngaol. 31Aq-u phao, Yeiqsul aqyu juq bhai ge bhiq-a nail: “Yanq-nl kiv nul juq iqsanl mail ngaq bhai khaonq ha ail ceevq nail ngaol. Khul khi mail dai ngal-aq neq,

‘Yaol lovq nail gaq bhai

ngal deeq heivq khi,

yaol juq peiv ail

leiv ail nail ngaol’ dai,

Jal liq lavqkhoel bhai gevq-ai thaq nail ngaol.

32Thail hai ngaol-aoq, ngal doevq kovq lal gaq haq neq, nul juq nail iqmoeq nee Gaq liq lail milkhaoq bhai ail naol” dai, ge bhiq-a nail ngaol.

33“Naoq bhai yu iqsanl mail khaonq ha khi ngaol-aoq, ngal teevq thal-iq naoq bhai maq khaonq ha ail” dai, Bheiqtuvluv ge kovq bhiq-a nail ngaol.

34Yeiqsul ge nail: “Ngal naoq bhai mal dil dai, ge lavq bhel. Yanq-nl kiv yavphoil maq doil lal nail gaiqlaq bhai, naol ngaq bhai maq heeq kivq ail dai, hail pov kev dai, jil nail ngaol” dai, Bheiqtuvluv bhai ge bhiq-a nail ngaol.

35“Ngal naoq-ai nee mail teevq gaq khe-ai ya sil khi ngaol-aoq, ngal naoq bhai maq heeq kivq ail dai, maq jil ail” dai, Bheiqtuvluv Yeiqsul bhai ge bhiq-a nail ngaol. Yaq laol juq iqsanl mail, al hai ge nail ngaol.

Yeiqsul Geiqseiqmaq nil gaoqkhail bhai geeqlaoq hal ail-a nail ganl

36A bhai nee ngal-aq, Yeiqsul khi mail aivq nail yaq laol juq, Geiqseiqmaq nil dai khul nail dao bhai ail kev-a nail ngaol. “Ngal iqmoeq phao geeqlaoq hal ail-u phao, nul juq niai daonq dei-eiq” dai, Yeiqsul yaq laol juq bhai ge bhiq-a nail ngaol. 37A bhai nee ngal-aq neq, aivq Bheiqtuvluv khi Seiq bheiq dail nail yaqyov nvq gaq bhai hel aivq-a nail ngaol. Aq-u phao, aivq nail neema lavqkhoel bhai noeq haq dee dee lal bhiq-a nail nee ovqtavq, suq saq dee dee nail ngaol. 38Aivq aqyu hail gaq bhai ge bhiq-a nail: “Ngal noeq haq nail sil lee aiq nial. Niilniai ngaq-ai nee aqgeel geel dai daonq dei-eiq” dai, ge bhiq-a nail ngaol.

39A bhai nee ngal-aq neq, aivq iqmoeq phao micil gaoq jiiv ail khi, miltsaq bhai peevqceevq kovdoiq doiq nail lavqkhoel nee gaol beiv khi mail, “Ngaq nail Aqbhu-ol, haq dee aoq dee dee nail khaoqanq niil ngaq bhai bhi jel-ail kivq haq neq, bhi jel-ail lavq yaoq. Thail hai ngaol-aoq, ngal neema tsaq nail khe-ai, thaq bhi pevq. Naol neema tsaq nail khe-ai bhi pevq yaoq” dai, geeqlaoq hal-a nail ngaol.

40Yeiqsul yaq laol al hail gaq jaol nail bha kovq lal-u phao, aqyu juq iq thaiq kov-ai thaq nail bhai ya moel khi, Bheiqtuvluv bhai ge bhiq-a nail: “Naqli teevq lavq taivq-ail iqsanl, nul juq ngaq-ai nee mail aqgeel geel dai, maq jaol tsaol ail laiq. 41Nul juq jalmul mul nail haoqnao maq ya tsao thel aivq dai, aqgeel geel dai jaol khi, geeqlaoq hal yaoq. Nul juq nl movq nail neema aol khi ngaol-aoq, aqsivq haqjoil phao gaq bhaq nail ngaol” dai, ge bhiq-a nail ngaol.

42A bhai nee ngal-aq, aivq gaoq ail khi, “Ngaq nail Aqbhu-ol, haq dee aoq dee dee nail khaoqanq niil ngal maq daol ail maq jel kivq haq neq, naol neema tsaq nail khe-ai, bhi pevq yaoq” dai, geeqlaoq gaoq hal-a nail ngaol.

43Aivq gaoq kovq lal-u phao, al hail gaq iq thaiq nul dee dee nail ngel-i mail, iq thaiq kov-ai thaq nail bhai gaoq ya moel-a nail ngaol. 44Aivq al hail gaq bhai al hai bhi iq thaiq-ail ceevq khi, gaoq ail-a nail ngaol. Iqmoeq-u phao khe hal-a nail khe-ai, hail pov teevq pov iqsanl geeqlaoq gaoq hal ail-a nail ngaol.

45A bhai nee ngal-aq neq, aivq yaq laol juq jaol nail bha gaoq kovq lal khi ge nail: “Nul juq iq thaiq iq thaiq-ail gaq naq naq-ai haq nail laiq. Tsaol-aq nail Yaqyov bhai haqeiv nail tsaol-aq nail aqlavq lavqkhoel bhai av bhiq nail aqyanq kev lal-aoq thaq nial. 46Thul yaoq. Lai bhel. Thoiq, ngaq bhai yu nail aqlavq lavqkhoel bhai av bhiq nail gaq aqjail bhai kev lee-aoq thaq nial” dai, ge bhiq-a nail ngaol.

Yeiqsul bhai nieivq-a nail ganl

47Al hai ge thail thaiq-u phao, gaqkhoel tsel-nvq gaq nail lavqkhoel bhai aol nail Yuldav dai mil-ai thaq nail gaq lee-a nail ngaol. Thaoma khi mail doiqthoi bavq-nvq thaq nail tsaol-aq munl munl ma juq iqsanl, aivq nail haoqnao tsao the jaol nail ngaol. Tsaol-aq al juq bhai Philma juq khi mail Yuldav tsaol-aq nail aqivq aqtsu juq-i mail khoel-ai leevq-a nail ngaol. 48Yeiqsul bhai yu nail aqlavq lavqkhoel bhai av bhiq-a nail al gaq, “Nul juq aivq bhai heeq nia dai, ngal aivq bhai moeq saol saol naol. Aq-u phao, aivq bhai nieivq dei-eiq” dai, aqyu juq bhai ge bhiq-ai thaq nail ngaol. 49A bhai nee ngal-aq, aivq teevq pov taivq-ail Yeiqsul jaol nail bha lee khi, “Saq laq-ol, geeqlaoq eeq dei-eiq” dai, ge khi, moeq saol saol bhiq-a nail ngaol.

50“Aq tsaoq-ol, naol noeqceiv khi nl lee-a nail khe-ai nl yaoq” dai, Yeiqsul aivq bhai ge bhiq-a nail ngaol. Aq-u phao, aqyu juq iqsanl lee khi, Yeiqsul bhai nieivq thaiq-ai thaq nail ngaol. 51Yeiqsul nee mail jaol nail tsaol-aq juq nail lavqkhoel teevq gaq aivq nail thaoma gaol dov-a nail ngaol. A bhai nee ngal-aq, Philma nail yaqkav bhai tsil gai aivq khi, naq kov teevq phao bal-nvq ceiv ail-a nail ngaol.

52Aq-u phao, Yeiqsul aivq bhai ge bhiq-a nail: “Naoq nail thaoma thaobhai bhai soiq bhoel yaoq. Thaoma bhai khal juq nail tsaol-aq iqsanl mail thaoma nee mail luq ail seil ail nail ngaol. 53Nqtavq gaqkhoel tsel-nvq munl#26.53 Aq-u khe genl dev nail tsaol-aq juq bhai hel daiq-u phao, teevq munl bhai kovq hinl gaq bhee nail dai, heeq lal nail ngaol. jaiq dai, ngal jaol nail bha khoel-ai leevq dai, niil aq-il ngaq nail Aqbhu bhai ngal maq hal ya kivq ail dai, naol noeq nail laiq. 54Thail hai ngaol-aoq, ngal al hai hal haq neq, niail hai ya pevq lal nail ngaol dai, gevq-ai thaq nail Jal liq al juq khal hai khi bhee lal nia nail-aiq” dai, ge bhiq-a nail ngaol.

55A bhai nee ngal-aq, Yeiqsul tsaol-aq munl munl ma al juq bhai ge bhiq-a nail: “Nul juq tsaolpheel bhai nieivq nail khe-ai, thaoma khi mail doiqthoi bavq khi ngaq bhai nieivq lee-a nail laiq. Ngal yaoq n yaoq-ao nee uqhuq thaoq nail ilkhaol il ma bhai jaol deel khi cavq bhiq cov bhiq khi ngaol-aoq, nul juq ngaq bhai maq nieivq-al. 56Thail hai ngaol-aoq, Miqyail nail haqbhoil ge dan nail juq nail haoqgavq lavqkhoel bhai gevq-ai thaq nail khe-ai bhee lal dai, niil juq iqsanl pevq lal-a nail ngaol” dai, ge bhiq-a nail ngaol.

Aq-u phao, yaq laol juq iqsanl mail aivq bhai khaonq ail ceevq khi, tsaoq gil-a nail ngaol.

Maoq bhaoq nl nail munl munl ma Yeiqsul bhai yalkhaq dal-a nail ganl

57Yeiqsul bhai nieivq thail thaiq nail tsaol-aq al juq, aoldaoq kovqdaoq cavq nail cov nail juq khi aqivq aqtsu juq jil lai duq, Philma Gaqyaqphal jaol nail bha Yeiqsul bhai hel laivq-a nail ngaol. 58Bheiqtuvluv neq, Philma nail ilkhaol nail khainl bhai kev dai, Yeiqsul nail haoqnao al jaiq-ail maq eq dai, tsao the jaol nail ngaol. Haoqnao nao saq-u phao, yu Yeiqsul bhai khal hai nl bhiq nail ngel ail dai, yaq heeq ya moel dai, khainl lavqkhoel bhai aol lai khi, Philma nail yaqkav juq nee mail jaol deel lai-a nail ngaol.

59Philma juq khi maoq bhaoq nl nail munl munl lao ail Yeiqsul bhai ya deeq heivq dai, aqyu juq aivq nail ganl maq tsaq nail salkhil bhai hal pov nail ngaol. 60Maq tsaq nail daoq bhai salkhil khanq nail tsaol-aq mao dai gaq sivtavq phao lee lee-ail, salkhil khanq khi ngaol-aoq, maoq bhaoq nl nail tsaol-aq juq salkhil maq moel-al.

Haoqnao nao saq-u phao, maq tsaq nail daoq salkhil khanq nail nvq gaq sivtavq phao lee-a nail ngaol. 61Aqyu nvq gaq niail hai ge nail ngaol: “Thoil gaq ge nail: ‘Ngal Miqyail nail uqhuq thaoq nail ilkhaol il ma bhai peiv ha khi, hail n nail lavqkhoel bhai cov phal kivq naol geiq’ ” dai, aqyu nvq gaq salkhil khanq-a nail ngaol.

62Aq-u phao, Philma aqivq gaq thul lal khi, “Tsaol-aq niil nvq gaq naoq nail kovtavq bhai oeqbal thaq thaq ail salkhil khanq nail bhai naol khul teevq phaq iqsanl maq ge kovq bhiq ail laiq” dai, Yeiqsul bhai ge bhiq-a nail ngaol. 63Thail hai ngaol-aoq, Yeiqsul aq tsi tsu dai jaol nail ngaol.

Philma aivq bhai gaoq ge bhiq nail: “Naol neq, Miqyail nail Yaqyov Khali ngaol laiq. Ngaq bhai ge lavq yaoq. Aq doevq doevq nail Miqyail nail sivtavq bhai ngal naoq bhai bhi khanq nail ngaol” dai, ge bhiq-a nail ngaol.

64Yeiqsul ge nail: “Ngel naol. Naol ge nail khe-ai ngaol. Al ovqtavq, ngal naoq bhai ge lavq bhel. Niai nee pultavq neq, Tsaol-aq nail Yaqyov bhaqaoq eeq dee dee nail Miqyail nail lavqmal phao jaol deel-nvq thaq nail bhai maqkhaiq, nqdil jeeq khi yavq kha lee nail bhai maqkhaiq, nul juq ya moel nail ngaol” dai, ge kovq bhiq-a nail ngaol.

65Aq-u phao, Philma aqivq gaq aivq nail phailkhaoq aivq he pav khi ge nail: “Aivq neq, Miqyail bhai khal ge movq ail ge nail ngaol. Ngadao juq khul nail salkhil gaoq loq nail-aiq. Aivq Miqyail bhai khal ge movq ail ge nail bhai niil aq-il nul juq ya gaiq-ao nail ngaol. 66Nul juq bhai khal hai noeq lal aiq” dai, nal daiq-u phao, “Aivq sil nail tsaq nail ngaol” dai, aqyu juq ge kovq bhiq-a nail ngaol.

67Aq-u phao, aqyu juq Yeiqsul nail maivphaoq bhai thaiqkhaq thaiqbav khi, aivq bhai deeq-a nail ngaol. 68Teevq pav ga nav juq aivq bhai naqteiv teiv khi ge nail: “Khali-ol, naoq bhai khaq sil gaq teiv nail-aiq dai, Miqyail nail haqbhoil ge dan nail gaq khe-ai, nv juq bhai ge daiq lavq yaoq” dai, ge bhiq-a nail ngaol.

Yeiqsul bhai maq heeq kivq ail dai, Bheiqtuvluv jil nail ganl

69Aq-u phao, Bheiqtuvluv ilkhaol nail khainl lavqkhoel bhai jaol deel-nvq thaq-u phao, Yaqkav jiovq nail yaqmai-aq teevq gaq aivq jaol nail bha lee khi, “Naol iqsanl Gaq liq lail tsaol-aq Yeiqsul nee mail jaol nail ngaol” dai, ge bhiq-a nail ngaol.

70“Naoq-i mail ge nail daoq bhai ngal maq heeq kivq ail” dai, aqyu juq iqsanl nail sivtavq bhai Bheiqtuvluv jil-a nail ngaol.

71A bhai nee ngal-aq neq, Bheiqtuvluv lolgov jiav nail phao ail khi thul phaol-u phao, yaqkav jiovq nail yaqmai-aq yaoq gaq yaoq aivq bhai moel khi, “Thoil gaq, Naq saq lail meenq yaq Yeiqsul nee mail jaol nail ngaol” dai, a bhai jaol nail juq bhai ge bhiq-a nail ngaol.

72Aivq teevq pov gaoq jil khi, “Tsaol-aq al gaq bhai ngal maq heeq kivq ail” dai, ge khi khanq-a nail ngaol.

73Teevq yanq gaoq khi-al nee ngal-aq neq, a bhai thul phaol nail juq Bheiqtuvluv jaol nail bha lal khi, “Naol iqsanl mal dil aqyu juq nail munl lavqkhoel bhai aol nail teevq gaq nial. Khul khi mail dai ngal-aq neq, naol daoq ge nail bhai nal daiq-u phao, nv juq bhai heeq lal ail nial” dai, aivq bhai ge bhiq-a nail ngaol.

74Aq-u phao, Bheiqtuvluv aivq bhai aivq ivqkhail yavq yavq ail, “Tsaol-aq al gaq bhai ngal maq heeq kivq ail” dai, khanq-a nail ngaol.

Teevq pov taivq-ail yavphoil doil lal-a nail ngaol. 75“Yavphoil maq doil lal nail gaiqlaq bhai, naol ngaq bhai maq heeq kivq ail dai, hail pov kev dai jil nail ngaol” dai, Yeiqsul-i mail aivq bhai ge bhiq-a nail daoq al daoq bhai Bheiqtuvluv noeq dov lal-a nail ngaol. A bhai nee ngal-aq, aivq dov-ail khi nioil dee dee-a nail ngaol.

Currently Selected:

Maqthaiq 26: aeu

Highlight

Copy