Maqthaiq 18

Khul gaq neq, yu nee maq tsil eeq jaiq nail ganl

1Yanq al yanq bhai, yaq laol juq Yeiqsul jaol nail bha lal khi, “Nqtavq Milkhaoq lavqkhoel bhai khul gaq neq, yu nee maq tsil eeq jaiq nail-aiq” dai, nal daiq bhiq-a nail ngaol.

2Aq-u phao, Yeiqsul yaqnoil teevq gaq bhai khul khi aqyu juq nail gaoltsi bhai bhi thul phaol khi ge bhiq-a nail: 3“Ngal nul juq bhai mal dil dai, ge lavq bhel. Nul juq neema phal khi, yaqnoil khe-ai maq pevq lal haq neq, Nqtavq Milkhaoq lavqkhoel bhai maq ya aol lai-ail. 4Yaq noil niil gaq khe-ai neema nee nuq nee beiv aol nail tsaol-aq neq, nqtavq milkhaoq lavqkhoel bhai yu nee maq tsil eeq nail ngaol.

5Ngaq nail aqmil kov-uvq nee, niil heel nail yaqnoil teevq gaq bhai hav-a nail tsaol-aq khul gaq maqkhaiq, ngaq bhai hav-a nail kheel ngaol. 6Thail hai ngaol-aoq, tsaol-aq khul gaq maqkhaiq, ngaq bhai neema thaq tsaol nail yaqnoil teevq gaq ga nav bhai bhi nl laiq haq neq, aivq nail leelkhaol bhai lovmav heeq ma pheethaiq khi, iqyaq iqma khal navq nail dao bhai bavqpuvq ail nail neq, aivq nail haqbhoil meeq jaiq nail ngaol” dai, ge bhiq-a nail ngaol.

Yu oeqbal nl dai jalmul mul nail ganl

7Yeiqsul gaoq ge nail: “Tsaol-aq yaq bhai bhi laiq ail dai, nl nail phaq mao dai jiav nail ngel-i mail, miltsaq bhai doevq-u phao, kha dai gee sil lal nail kheel ngel ail aiq. Khul khi mail dai ngal-aq, al hai bhi nl laiq nail phaq jiav lal nail ngaol. Thail hai ngaol-aoq, yu bhai bhi nl laiq nail gaq neq, geeqlaoq aqdoil ya nail ngaol. 8Naoq nail aqlavq teevq lavq maqkhaiq, naoq nail aqkhil teevq khaoq maqkhaiq, naoq bhai bhi nl laiq lavq haq neq, dev ha pivq yaoq. Nvq khil nvq lavqcovq khi, nqmaq maqluv halyeel tovq nail miqjaq lavqkhoel bhai bavq poiv lavq nail nee maq tsil, al sail maq bhee dai, aqdoevq ya doevq nail neq, naoq nail haqbhoil meeq jaiq nail ngaol. 9Naoq nail maivneev teevq neev hel daiq khi naoq bhai bhi nl laiq lavq haq neq, kevq dov ha yaoq. Maiv neev nvq neev nvq neev ail covq khi, daq ovq lao ma eel tsul bhai bavq bhoel lavq nail bhai ya daq nail nee maq tsil, maivneev teevq neev taivq-ail covq khi aqdoevq ya doevq nail neq, naoq nail haqbhoil meeq jaiq nail ngaol” dai, ge bhiq-a nail ngaol.

Yaol teevq maol peivq ail-a nail ganl daoqma uqhuq daoq

10Yeiqsul gaoq ge nail: “Nul juq yaqnoil niil juq nail lavqkhoel khe teevq gaq bhai iqsanl thaq hel daiq theq bhiq dei-eiq. Ngal nul juq bhai ge lavq bhel. Aqyu juq bhai hel daiq phail nail nqtavq gaqkhoel, nqtavq kovtavq bhai jaol nail ngaq nail Aqbhu nail sivtavq bhai khaq mao iqsanl jaol nail ngaol.

11[Peivq ail-a nail tsaol-aq bhai hevq kovq nail dai khi, Tsaol-aq nail Yaqyov lee-a nail ngaol.]

12Nul juq khal hai noeq nail-aiq. Tsaol-aq teevq gaq yaol teevq yal maol jaol nail lavqkhoel nee, teevq maol peivq ail haq neq, al goiq tsel goiq maol bhai gaoqjaoq bhai bhi jaol-ail ceevq khi, peivq ail-a nail yaol al maol bhai hal pov ail nail, maq ngel laiq. 13Ngal nul juq bhai mal dil dai, ge lavq bhel. Aivq peivq ail-a nail yaol al maol bhai moel haq neq, maq peivq ail-a nail yaol goiq tsel goiq maol bhai lavqkhiq tsail nail nee maq tsil, hal pov moel-a nail yaol al maol bhai lavqkhiq tsail jaiq nail ngaol. 14Al hai dul dai, yaqnoil niil juq nail lavqkhoel teevq gaq ga nav luq ail seil ail nail bhai, nqtavq kovtavq bhai jaol nail nul juq nail Aqbhu neema maq tsaq ail” dai, ge bhiq-a nail ngaol.

Aqivq jaqbheq juq-i mail nl laiq lavq nail ganl

15Yeiqsul gaoq ge nail: “Naoq nail aqivq jaqbheq naoq bhai nl laiq lavq haq neq, aivq jaol nail bha ail khi, nul nq nvq gaq taivq-ail jaol-u phao, aivq-i mail nl laiq-a nail ganl bhai ge bhiq yaoq. Aivq naoq nail daoq nal daiq lavq haq neq, naoq nail aqivq jaqbheq bhai ya kovq-a nail kheel ngaol. 16Thail hai ngaol-aoq, naoq-i mail ge nail daoq bhai aivq maq nal daiq lavq haq neq, naoq-i mail ge nail daoq yaoq daoq yaoq-ao nee, Jal liq lavqkhoel bhai gevq-ai thaq nail khe-ai, salkhil khanq nia dai, naoq-ai nee teevq gaq nvq gaq hevq khi lai yaoq. 17Aivq aqyu nvq gaq nail daoq maq nal daiq haq neq, Khali yaq munl bhai ge bhiq yaoq. Khali yaq munl nail daoq iqsanl maq nal daiq haq neq, aivq bhai laol kivq yaq khi mail khaon tavq nail tsaol-aq khe-ai saol-nvq bhiq yaoq.

18Ngal nul juq bhai mal dil dai, ge lavq bhel. Miltsaq kovtavq bhai nul juq-i mail maq khal bhi nl nail juq bhai nqtavq kovtavq bhai iqsanl maq bhiq nl nail juq dai saol-nvq khi, miltsaq bhai nul juq-i mail khal bhi nl nail juq bhai, nqtavq kovtavq bhai iqsanl bhi nl nail juq dai saol-nvq nail ngaol.

19Al ovqtavq, ngal nul juq bhai ge lavq bhel. Miltsaq kovtavq bhai nul juq nail lavqkhoel, tsaol-aq nvq gaq neema tavq khi geeqlaoq hal haq neq, nqtavq kovtavq bhai jaol nail ngaq nail Aqbhu aqyu nvq gaq-i mail hal nail khe-ai nl bhiq nail ngaol. 20Khul khi mail dai ngal-aq, tsaol-aq nvq gaq hail gaq, ngaq nail aqmil bhai juq khi jil lai haq neq, ngal a bhai aqyu juq nail gaoltsi bhai jaol naol” dai, ge bhiq-a nail ngaol.

Gailjiov maq khaonq ha nail yaqkav nail ganl

21Aq-u phao, Bheiqtuvluv Yeiqsul jaol nail bha lal khi, “Heeqphaq-ol, ngaq nail aqivq jaqbheq ngaq bhai nl laiq lavq haq neq, ngal aivq nail oeqbal bhai kha dai pov kev dai, ya phaiq bhiq nail-aiq. Sivq pov kev dai laiq” dai, nal daiq-a nail ngaol.

22Yeiqsul ge kovq bhiq-a nail: “Sivq pov kev dai taivq-ail maq ngel-ail. Sivq tsel dai, sivq pov kev dai, ya phaiq bhiq nail ngaol dai, ngal naoq bhai ge lavq bhel.

23Khul khi mail dai ngal-aq, Nqtavq Milkhaoq neq, niail hai dul nail ngaol. Teevq pov neq, heeqphaq teevq gaq aivq nail yaqkav juq nee mail gailjiov saol-nvq tsaq naol dai, noeqceiv-a nail ngaol. 24Aivq gail jiov iqmoeq ilmoeq saol-nvq-u phao, aivq bhai gail jiov mao dai lanv bavq nail teevq gaq bhai aivq jaol nail bha hel lavq-a nail ngaol. 25Tsaol-aq al gaq khul teevq phaq iqsanl khaoq kovq bhiq nail maq jiav nail ngel-i mail, heeqphaq al gaq neq, aivq nail aqmaol iqsanl, aivq nail miqyaq khaqma khi mail aivq-i mail khal jiav nail yalkav iqsanl, gaoq gil khi bhi khaoq kovq lal yaoq dai, daoq bivq-a nail ngaol.

26Al heel ngel-i mail, yaqkav al gaq aivq nail sivtavq bhai peevqceevq kovdoiq doiq nail lavqkhoel nee gaol beiv khi, ‘Heeqphaq-ol, ngaq bhai teevq yanq ol lavq yaoq. Ngaq nail gailjiov iqsanl mail khaoq kovq gil naol’ dai, aivq bhai hal hal ail, ge bhiq-a nail ngaol. 27Aq-u phao, heeqphaq yaqkav al gaq aivq bhai gaoq haq nail ngel-i mail, aivq bhai phaiq bhiq khi aivq nail gailjiov bhai iqsanl khaonq ha gil bhiq-a nail ngaol.

28A bhai nee ngal-aq, kovq ail-u phao, aivq bhai phul teevq yal bavq taivq-ail bavq nail aivq nail aqtsaoq yaqkav teevq gaq bhai thaoq phuq-a nail ngaol. Aivq aivq nail aqtsaoq al gaq nail leelkhaol bhai nieivq thaiq khi, ‘Ngaq nail gailjiov khaoq kovq lavq yaoq’ dai, ge bhiq-a nail ngaol.

29Aq-u phao, aivq nail aqtsaoq yaqkav al gaq peevqceevq kovdoiq doiq nail lavqkhoel nee gaol beiv khi, ‘Ngaq bhai teevq yanq ol lavq yaoq. Ngal naoq bhai khaoq kovq bhiq naol’ dai, hal hal ail ge bhiq-a nail ngaol.

30Thail hai ngaol-aoq, aivq maq nal daiq dai, gailjiov al maq khaoq gil-u kev dai, yaqkav al gaq bhai thaonq bhai laol bhiq-a nail ngaol. 31Aivq al hai nl bhiq nail bhai, yaqkav yaoq juq yaoq ya moel-u phao, neema teevq peivq ail maq sal dai, aqyu juq nail heeqphaq jaol nail bha lai khi, ganl al juq iqsanl mail, ge bhiq lai-a nail ngaol.

32Aq-u phao, heeqphaq yaqkav al gaq bhai khul khi ge bhiq-a nail: ‘Mailma ail haqeiv nail yaqkav-ol. Naol ngaq bhai hal nail ngel-i mail, ngal naoq nail gailjiov iqsanl bhai khaonq bhiq-a nail ngaol. 33Ngal naoq bhai gaoq haq bhiq-a nail khe-ai, naol iqsanl naoq nail aqtsaoq yaqkav al gaq bhai gaoq haq bhiq heeq phaq-ail tsaq nail maq ngel ail laiq’ dai, ge bhiq-a nail ngaol. 34Heeqphaq al gaq aivq bhai neema gaoq phail lal bhiq khi, gailjiov maq khaoq ceiv gil-u kev dai, bhi khoeq bhi jiovq nail dai khi, thaonq nail aqivq gaq nail aqlavq lavqkhoel bhai av bhiq-a nail ngaol.

35Nul juq yaoq gaq yaoq-ao nee, yovqgavq nail aqivq jaqbheq juq-i mail nl laiq lavq-a nail phaq bhai neema lavqkhoel nee oeqbal maq phaiq bhiq haq neq, nqtavq kovtavq bhai jaol nail ngaq nail Aqbhu iqsanl, heeqphaq al gaq khe-ai, nul juq bhai nl lavq nail ngaol” dai, ge bhiq-a nail ngaol.

Currently Selected:

Maqthaiq 18: aeu

Highlight

Copy