Maqthaiq 17

Yeiqsul nail aqmaol phal lal-a nail ganl

1Kovq n jel ail-u phao, Yeiqsul neq, Bheiqtuvluv, Yaqkov khi mail Yaqkov nail jaqbheq Yaol haq bhai taivq-ail hevq khi, gaoqjaoq daqmoe teevq jaoq bha dav lai-a nail ngaol. 2Aq-u phao, Yeiqsul aqyu juq nail sivtavq nee aqmaol phal lal-a nail ngaol. Aivq nail maivphaoq nlma khe-ai aqbhaq bhaq khi, aivq nail aqgaq aqdoi iqsanl phulleq dai, nl jeel coev lal nail ngaol. 3Thaiq phuq dai, Maolseiq khi Eillilya iqsanl aqyu juq nail sivtavq bhai dov lee khi, Yeiqsul bhai daoq ge tsaoq thail thaiq nail ngaol.

4Aq-u phao, Bheiqtuvluv ge nail: “Heeqphaq-ol, ngadao niai jaol nail neq, aqmeeq nial. Naol neema tsaq haq neq, ngal niil niai yavqtsoel hail tsoel cov naol. Naoq nail haqbhoil teevq tsoel, Maolseiq nail haqbhoil teevq tsoel khi mail Eillilya nail haqbhoil teevq tsoel cov naol” dai, Yeiqsul bhai ge bhiq-a nail ngaol.

5Aivq daoq ge thail thaiq-u phao, aqbhaq bhaq nail nqdil aqyu juq bhai uv thaiq lee-a nail ngaol. “Tsaol-aq niil gaq neq, ngal mail ma-ail gaiq-a nail ngaq nail Yaqyov ngaol. Ngal aivq bhai neekhaol sil dee dee nail ngaol. Aivq nail daoq nal daiq yaoq” dai, nqdil al nail lavqkhoel nee aqthel meel dov-ai leevq-a nail ngaol.

6Yaq laol al juq aqthel al thel bhai ya gaiq-u phao, gee sil dee dee lal bhiq khi, miltsaq bhai kovq movq phaq ail gaol beiv-a nail ngaol. 7Aq-u phao, Yeiqsul aqyu juq jaol nail bha lal khi, aqyu juq bhai thoiq tsi khi, “Thul yaoq. Thaq gee sil” dai, ge bhiq-a nail ngaol. 8Aqyu juq gaollel daiq-u phao, Yeiqsul bhai maq ngel nail neq, teevq gaq bhai iqsanl maq moel-al.

9Aqyu juq gaoqjaoq al jaoq nee mail yavq kha lee thail thaiq-u phao, Yeiqsul ge nail: “Tsaol-aq nail Yaqyov maq doevq kovq lal-u phao kev dai, nul juq-i mail ya moel-a nail ganl niil, teevq gaq bhai iqsanl, thaq ge bhiq dei-eiq” dai, aqyu juq bhai daoq bivq-a nail ngaol.

10Aq-u phao, aivq nail yaq laol juq ge nail: “Thail hai phal-iq neq, Eillilya iqmoeq lee nail ngaol dai, khul khi mail aoldaoq kovqdaoq cavq nail cov nail juq ge nail-aiq” dai, Yeiqsul bhai nal daiq-a nail ngaol.

11Yeiqsul ge nail: “Tsaq naol, Eillilya iqmoeq lee khi iqsanl bhai aqmeeq-ai lav sav thaq-ai lee nail ngaol. 12Ngal nul juq bhai ge lavq bhel. Eillilya lee khi ngaol-aoq, aqyu juq aivq bhai maq heeq nia nail ngel-i mail, khal nl movq nail khe-ai nl bhiq-a nail ngaol. Al hai dul dai, Tsaol-aq nail Yaqyov iqsanl aqyu juq nail aqlavq lavqkhoel bhai ya daq nail ngaol” dai, ge bhiq-a nail ngaol. 13Aq-u phao, yaq laol juq Yeiqsul ulcuvq saol bhiq nail Yaol haq nail ganl ge thail thaiq nail niil dai, heeq nia lal-a nail ngaol.

Yeiqsul neivq aol nail yaqyov teevq gaq bhai lav meeq bhiq-a nail ganl

14Yeiqsul khi mail yaq laol al hail gaq tsaol-aq munl munl ma jaol nail bha kovq kev lal-u phao, yaqyov-aq teevq gaq Yeiqsul jaol nail bha lal khi, aivq nail sivtavq bhai peevqceevq kovdoiq doiq khi niail hai ge nail ngaol: 15“Heeqphaq-ol, ngaq nail yaqyov bhai gaoq haq lavq yaoq. Aivq bhi bhaoqga dee dee khi ya daq dee dee nail lavqkhoel teevq yanq ngal-aq teevq pov, miqjaq bhai maqkhaiq, ulcuvq bhai maqkhaiq tsuq pul aivq nail ngaol. 16Naoq nail yaq laol juq jaol nail bha ngaq nail yaqyov bhai hel lavq bhiq khi ngaol-aoq, aqyu juq aivq bhai maq bhi meeq lai nia-il” dai, ge bhiq-a nail ngaol.

17Aq-u phao, Yeiqsul ge nail: “Niil yeel nail tsaol-aq juq-ol, nul juq neema thaq tsaol nail neema maq aol nail nee ovqtavq, tsaq nail daol nail phaq bhai iqsanl lav pov lav phal-il. Ngal nul juq nee mail khaq mao kev dai, ya jaol aiq haq nail-aiq. Ngal nul juq bhai khaq mao kev dai, ya ol-ai haq nail-aiq. Yaqyov al gaq ngal jaol nail bha hel lavq yaoq” dai, ge bhiq-a nail ngaol. 18A bhai nee ngal-aq, Yeiqsul neivq al maol bhai khaq-u phao, neivq al maol yaqyov al gaq nail lavqkhoel nee dov-ail khi, yaqyov al gaq teevq pov taivq-ail meeq lai-a nail ngaol.

19Haoqnao Yeiqsul teevq gaq taivq-ail jaol-u phao, yaq laol juq aivq jaol nail bha lal khi, “Khul khi mail nv juq neivq al maol bhai maq the dov kivq nail-aiq” dai, nal daiq bhiq-a nail ngaol.

20Yeiqsul ge nail: “Nul juq neema thaq tsaol nail phao gaq bhaq nail ngel-i mail ngaol. Ngal nul juq bhai mal dil dai, ge lavq bhel. Nul juq neema thaq tsaol nail phaq gaoqpavq aq neev dai eeq haq neq, gaoqjaoq niil jaoq bhai, a phao jiav-ail yaoq dai, ge bhiq-u phao, jiav-ail nail ngaol. Nul juq maq nl nia nail teevq phaq iqsanl maq jiav-ail” dai, Yeiqsul aqyu juq bhai ge bhiq-a nail ngaol.

21[“Geeq laoq hal khi, maq jaq nail aol nl nail bhaq da nee taivq-ail neivq al phaq bhai bhi dov-ail nia nail ngaol” dai, iqsanl ge bhiq-a nail ngaol.]

“Ngal ya sil naol” dai, Yeiqsul teevq pov gaoq ge bhiq-a nail ganl

22Yeiqsul khi mail aivq nail yaq laol juq teevq gaq khe-ai, Gaq liq lail milkhaoq bhai jaol-u phao, Yeiqsul ge nail: “Tsaol-aq nail Yaqyov neq, tsaol-aq yaq nail aqlavq lavqkhoel bhai av bhiq nail bhai ya daq nail ngaol. 23Aqyu juq aivq bhai tavq heivq nail ngaol. Thail hai ngaol-aoq, hail n bhee lal haq neq, aivq gaoq doevq kovq lal nail ngaol” dai, ge bhiq-a nail ngaol. Aq-u phao, yaq laol juq noeq haq dee dee lal bhiq-a nail ngaol.

Uqhuq thaoq nail ilkhaol il ma nail haqbhoil khaon dov nail ganl

24Yeiqsul khi mail aivq nail yaq laol juq Gaq bheiq neiq oq meenq bhai kovq kev lal-u phao, uqhuq thaoq nail ilkhaol il ma nail haqbhoil khaon tavq nail juq Bheiqtuvluv jaol nail bha lal khi, “Nul juq nail saq laq neq, khaon maq dov-ail laiq” dai, nal daiq bhiq-a nail ngaol.

25“Dov naol” dai, Bheiqtuvluv ge kovq bhiq-a nail ngaol. A bhai nee ngal-aq, Bheiqtuvluv ilkhaol bhai aol lai-u phao, Yeiqsul daoq iqmoeq ge tsaoq khi ge nail: “Sil moq-ol, naol khal hai noeq nail-aiq, miltsaq bhai uv thaiq nail heeqphaq juq neq, khaq sil gaq bhai khaon tavq nail-aiq. Yovqgavq nail yaq bhai tavq nail laiq. Maq ngel ail khi yu bhai tavq nail laiq” dai, nal daiq bhiq-a nail ngaol.

26“Yu bhai tavq nail ngaol” dai, Bheiqtuvluv ge kovq bhiq-u phao, Yeiqsul ge nail: “Thail hai phal-iq, aivq nail yaq juq neq, ya jel-ail nail ngaol. 27Thail hai ngaol-aoq, ngadao bhaq da nee yu maq bhi noeq bheeq dai, maiqkovq teevq khaoq oil khi, ngaqkha bhai kha puvq ail yaoq. Iqmoeq ilmoeq kha mi-a nail delgil al maol nail moeqthaoq ngaoqpav daiq-u phao, phul teevq bavq aol nail bhai naol ya moel nail ngaol. Phul al bavq oil khi, ngadao nvq gaq nail haqbhoil khaon dov-ail yaoq” dai, Bheiqtuvluv bhai ge bhiq-a nail ngaol.

Currently Selected:

Maqthaiq 17: aeu

Highlight

Copy