Genesis 33

Iqmoeq 33

Yaqkov dai khi Eilsaol moel tavq-a nail ganl

1Eilsaol neq, tsaol-aq 400 gaq hevq khi lal nail bhai Yaqkov ya moel-u phao, Leiqaq, Laqkheiqlal dai khi aivq nail khaqma yaqkav nvq gaq bhai, aqyu juq nail yaq juq bhoil bhiq-a nail ngaol.

2A bhai nee ngal-aq, aivq nail khaqma yaqkav dai khi aqyu nvq gaq nail yaq juq bhai neq, sivtavq phao bhi jaol-a nail ngaol. Al ovqtavq, Leiqaq dai khi aivq nail yaq juq bhai maqkhaiq, haoqnao nao saq phao neq, Laqkheiqlal dai khi Yaolsai bhai maqkhaiq, jaolduq bhoil tsaq-a nail ngaol.

3Yaqkov neq, aqyu juq nail sivtavq phao lai khi, aivq nail algao nail aqjail bhai kev lai-u phao, sivq pov bhee dai, peevqceevq kovdoiq doiq nail lavqkhoel nee aivq nail maivphaoq miltsaq bha tuv dai gaol beiv-a nail ngaol.

4Aq-u phao, Eilsaol neq, tsaol laivq khi Yaqkov bhai phal thaiq nail lavqkhoel nee, moeq saol saol bhiq-a nail ngaol. Aqyu nvq gaq nvq gaq-ail, nioil nail ngaol.

5Eilsaol maivphaoq gaol lel-u phao, yaqmai-aq juq dai khi yaqnoil juq bhai ya moel khi ge nail: "Naoq-ai nee teevq gaq khe-ai lal-a nail niil juq neq, khaq sil gaq" dai, nal daiq bhiq-a nail ngaol. Yaqkov neq, "Miqyail-i mail naoq nail yaqkav pevq nail ngaq bhai bivq lavq-a nail yaq juq ngaol" dai, ge kovq bhiq-a nail ngaol.

6A bhai nee ngal-aq, aivq nail khaqma yaqkav nvq gaq neq, aqyu juq nail yaq juq nee mail teevq gaq khe-ai, Eilsaol jaol nail bha ail khi peevqceevq kovdoiq doiq nail lavqkhoel nee, maivphaoq miltsaq bha tuv dai gaol bhiq-a nail ngaol.

7Leiqaq dai khi aivq nail yaq juq iqsanl ail khi, peevqceevq kovdoiq doiq nail lavqkhoel nee, aqyu juq nail maivphaoq miltsaq bha tuv dai, gaol bhiq-a nail ngaol. A bhai nee ngal-aq, Yaolsai dai khi Laqkheiqlal iqsanl, gaoq ail-a nail nee ovqtavq, peevqceevq kovdoiq doiq nail lavqkhoel nee, aqyu nvq gaq nail maivphaoq miltsaq bha tuv dai gaol bhiq-a nail ngaol.

8Eilsaol neq, "Gailkhaol bhai ngaq-i mail moel-ail ceevq-a nail jaiqyaq al juq neq, khul nail haqbhoil" dai, nal daiq bhiq-u phao, Yaqkov neq, "Ngaq nail heeqphaq-ol, naol bhi noeq meeq lavq nail galduq kovpavq bivq-a phaq pevq nail ngaol" dai, ge kovq bhiq-a nail ngaol.

9Aq-u phao, Eilsaol neq, "Ngaq nail jaqbheq-ol, ngaq bhai ildaoq maoqgaiq teevq bhee teevq lovq jiav nail ngaol. Naoq nail nlmaoq juq naol gaoq oil kovq yaoq" dai, ge bhiq-a nail ngaol.

10Yaqkov ge nail: "Naol ngaq bhai mal dil noeq meeq nail dai ngal-aq neq, ngaq-i mail bivq nail kovpavq bhai hav bhoel lavq yaoq. Naol neq, ngaq bhai aqmeeq dai, hav lavq-a nail ngel-i mail, naoq bhai ya moel-a nail neq, Miqyail nail maivphaoq bhai ya moel-a nail khe-ai, dul nail ngaol.

11Ngaq-i mail bivq nail kovpavq bhai naol oil lavq yaoq. Miqyail neq, ngaq bhai gaoq haq gaiq-a lavq khi ngaq-i mail khal loq nail phaq bhai, bivq lavq-a nail ngaol" dai, maq naq lai dai, ge nail bhaq da nee, Eilsaol iqsanl, kovpavq al bhai oil-a nail ngaol.

12A bhai nee ngal-aq, Eilsaol neq, "Ngadao juq lai bhel. Ngal naoq nail sivtavq nee mail lai nail ngaol" dai, ge bhiq-a nail ngaol.

13Thail hai ngaol-aoq, Yaqkov niail hai ge kovq bhiq-a nail ngaol: "Ngaq nail heeqphaq-ol, naol heeq kivq nail khe-ai, ngaq nail yaq juq neq, aqnuq ngel-ai haq nail ngaol. Aqtsil cuvq yaq jaol nail yaol aqma dai khi niaoqnel aqma juq gail, jaol nail ngaol. Jaiqyaq juq bhai teevq n nee al jaiq jel dai, the bhiq haq neq, teevq munl munl lao-ail sil gil nail ngaol.

14Ngaq nail heeqphaq-ol, naol iqmoeq lai yaoq. Nv juq neq, haoqnaol phao nee ha ha-ai jaiqyaq juq dai khi, yaqnoil juq nee mail tsao thel lavq naol. Ngal naoq bhai Sol-iq nail miltsaq bhai gaoq moel tavq nail ngaol" dai, ge bhiq-a nail ngaol.

15Aq-u phao, Eilsaol neq, "Thail hai phal-iq, ngaq nail tsaol-aq teevq pavq ga nav juq naoq-ai nee mail bhi jaol-ail ceevq naol" dai, ge bhiq-a nail ngaol. Thail hai ngaol-aoq, Yaqkov ge nail: "Ngaq nail galduq neq, maq loq-ail. Naol ngaq bhai noeq meeq lavq-a nail ngel-i mail, ngaq nail galduq bhee lovq-ai nail ngaol" dai, ge bhiq-a nail ngaol.

16Al heel ngel-i mail, aq-u n-gaol, Eilsaol neq Sol-iq miltsaq bha kovq lai-a nail ngaol.

17Thail hai ngaol-aoq, Yaqkov neq, Sulkov dai khul nail aqduq phao ail khi, aivq jaol nail galduq ilkhaol dai khi jaiqyaq juq nail galduq niaoq khu cov-a nail ngaol. Al heel ngel-i mail, jaolduq al duq bhai Sulkov#33.17 Sulkov dai, ge nail daoqceevq neq, yavq tsoel dai, ge movq nail ngaol. dai khul nail ngaol.

18A bhai nee ngal-aq, Yaqkov neq, Paqdanq Aqlanq nail miltsaq nee mail daq-n khi, dov lal nail nee ovqtavq, Khaqnanq nail milkhaoq khe jiav nail Seiqkhinq nail meenq nail aqjail bha aqmeeq-ai lee kev-a nail ngaol. Al ovqtavq, a bhai haqphal saiqgov cov khi jaol-a nail ngaol.

19Aivq neq, a bhai khe miltsaq teevq tsaol bhai Seiqkhinq nail aqbhu Haqmaoq nail yaq juq bhai phul 100 bivq khi ul-a nail nee ovqtavq, a bhai haqphal saiqgov cov-a nail ngaol.

20A bhai nee ngal-aq, miltsaq al tsaol bhai laolduq lav sav khi laolduq al bhai neq Ilsaqleiqlav nail Eil Eiqloqheil#33.20 Eil Eiqloqheil dai, ge nail daoqceevq neq, Ilsaqleiqlav nail Miqyail ngaol dai, gevq movq nail ngaol dai mil bhiq-a nail ngaol.

Currently Selected:

Genesis 33: aeu

Highlight

Copy