Genesis 32

Iqmoeq 32

Yaqkov, Eilsaol nee moel nail galduq lainq-a nail ganl

1Yaqkov neq, gailkhaol dov thail thaiq-u phao, Miqyail nail nqtavq gaqkhoel juq, aivq bhai moel tavq lee-a nail ngaol.

2Nqtavq gaqkhoel juq bhai moel-u phao, Yaqkov ge nail: "Gaq naq naq nail aqduq niil duq neq, Miqyail nail tavq niil" dai, ge khi aqduq al duq bhai Maqhaqneinq#32.2 Maqhaqneinq dai, ge nail daoqceevq neq, gaq naq naq nail aqduq nvq duq bhai ge movq nail ngaol. dai mil bhiq-a nail ngaol.

3A bhai nee ngal-aq, Yaqkov neq, Eiqdonq nail milkhaoq bhai jiav nail Sol-iq nail miltsaq-ai, aivq nail algao Eilsaol jaol nail bha naqgaiq daoq cavq gaiq nail juq bhai, iqmoeq bhi lai-a nail ngaol.

4Yaqkov neq, naqgaiq daoq cavq gaiq nail al juq bhai ge bhiq-a nail: "Ngaq nail algao Eilsaol-ai, niail hai ge bhiq lai yaoq: 'Naoq nail yaqkav Yaqkov neq, naoq bhai niail hai ge nail ngaol: 'Ngal neq, Laqbhanq nee mail teevq gaq khe-ai jaol khi, niil aq-il bhai taivq-ail, kovq lal nail ngaol.

5Ngal jaol nail bha niaoqnel, moeqphaq laljieiv, yaol, civqmeiv dai khi yaqkav yaqyov-aq yaqmai-aq juq mao dai jaol nail ngaol. Al heel ngel-i mail, ngaq nail heeqphaq Eilsaol ngaq bhai neekhaol sil nail lavqkhoel nee hav bhoel lavq dai, nv juq bhai iqmoeq bhi cavq gaiq lal lavq-a nail ngaol' dai, Eilsaol bhai ge bhiq yaoq" dai, daoq bivq-a nail ngaol.

6Naqgaiq daoq cavq gaiq nail juq neq, Yaqkov jaol nail bha gaoq kovq kev lee khi ge nail: "Nv juq naoq nail algao Eilsaol jaol nail bha kev lai-a nail ngaol. Aivq gail naoq-ai nee moel tavq nail galduq aivq nail genl dev yaq, 400 gaq hevq khi niil aq-il lee thail thaiq nail ngaol" dai, ge bhiq-a nail ngaol.

7Aq-u phao, Yaqkov neq, gee sil dee dee lal bhiq khi aivq nee mail teevq gaq khe-ai lal-a nail juq bhai maqkhaiq, yaol juq, civqmeiv juq, niaoqnel juq dai khi laolthao juq bhai maqkhaiq, nvq pav the pav-a nail ngaol.

8Khul khi mail dai ngal-aq, aivq neq, "Eilsaol kev lee khi, teevq munl bhai genl dev lal-u phao, jail nail teevq munl neq, ya jel-ail nail ngaol" dai, noeq nail ngel-i mail ngaol.

9A bhai nee ngal-aq, Yaqkov neq, geeqlaoq niail hai hal-a nail ngaol: "Ngaq nail aqbhal Aqbhaqlaqhaq dai khi ngaq nail aqbhu Ilcav nail Miqyail-ol, ngaq nail geeqlaoq hal daoq bhai nal daiq lavq yaoq. Heeqphaq Miqyail-ol, naol neq, ngaq bhai niail hai ge lavq-a nail ngaol: 'Naoq nail miltsaq, naoq nail aqivq jaqbheq juq jaol nail bha kovq lai yaoq. Ngal naoq bhai geeqlaoq bivq naol' dai, ge lavq-a nail ngaol.

10Naoq-i mail ngaq bhai bhi moel lavq-a nail naoq nail goil nail gaiq-a nail phaq dai khi, saljial ivq nail phaq bhai ngal maq geel-nvq-ail. Ngal Yaoldaq laoljaol ceiv lai-u phao, ngaq nail aqlavq bhai, joiqniaoq teevq khaoq aol-ail teevq-eel ngaol. Thail hai ngaol-aoq, niil aq-il neq, tsaol-aq munl nvq munl bhoil pav khi mail ya kovq lal-a nail ngaol.

11Heeqphaq Miqyail-ol, ngaq nail algao Eilsaol nail aqlavq nee mail ya jel-ail kivq nail galduq, thaoq hal nail ngaol. Aivq neq, ngaq bhai maqkhaiq, ngaq nail khaqma dai khi yaq juq bhai maqkhaiq, genl dev lal nail khul-il dai, gee sil lal nail ngaol.

12Thail hai ngaol-aoq naol neq, 'Naoq bhai geeqlaoq bivq naol. Naoq-ai nee mail yavq kha lee thaq nail yaq juq bhai iqyaq iq ma daolbhaq khe jiav nail tsalhail khe-ai, maq ge gil tsaol dai, bhi mao lal naol' dai, saljial jaq-ai lavq thaq nail ngaol" dai, geeqlaoq hal-a nail ngaol.

13Aq-u nqkiv Yaqkov neq, jaolduq al duq bhai iq thaiq-a nail ngaol. A bhai nee ngal-aq, aivq nail jaiqyaq lavqkhoel khe, aivq nail algao Eilsaol bhai bivq nail haqbhoil, kovpavq juq tsel dov-a nail ngaol.

14Civqmeiv civq ma 200 maol, civq bhuq 20 maol, yaol yaol ma 200 maol, yaol yaol bhuq 20 maol,

15laolthao aqma 30 maol dai khi aivq nail aqyaq juq, niaoqnel niaoq ma 40 maol, niaoqnel laqsil 10 maol, moeqphaq laljieiv aqma 20 maol, aqphoil 10 maol dai, tsel dov-a nail ngaol.

16Jaiqyaq al juq bhai tsel pav khi munl munl gaq-al nee ngal-aq neq, munl al juq bhai hel daiq phail nail yaqkav juq tsel dov-a nail ngaol. A bhai nee ngal-aq, aqyu juq bhai, "Nul juq teevq munl nee teevq munl tsaq tsaq dai, bhi eq khi, ngaq nail sivtavq phao lai yaoq" dai, daoq bivq-a nail ngaol.

17Siv tavq khal tavq khe jaiqyaq juq theq khi lai-a nail yaqkav juq bhai ge bhiq-a nail: "Ngaq nail algao Eilsaol nul juq bhai moel khi, 'Nul juq neq, khaq sil gaq nail yaqkav juq pevq nail-aiq. Khaq bha lai nail-aiq. Jaiqyaq niil juq neq, khaq sil gaq nail jaiqyaq' dai, nal daiq lal-u phao,

18'Jaiqyaq niil juq iqsanl mail neq, naoq nail yaqkav Yaqkov nail pevq khi ngaol-aoq, aivq nail heeqphaq Eilsaol nail galduq kovpavq bivq-ai lavq-a nail ngaol. Yaqkov aivq aqmaol gail nv juq nail haoqnaol phao lal nail ngaol' dai, ge bhiq yaoq" dai, ge bhiq-a nail ngaol.

19Thail hai dul dai, yaqkav nvq munl teevq munl, hail munl teevq munl dai jail nail juq iqsanl bhai gail ge bhiq-a nail: "Nul juq Eilsaol nee mail moel-u phao teevq gaq khe-ai, ya ge bhiq nail ngaol.

20Aivq bhai, maq noil peivq mail, 'Naoq nail yaqkav Yaqkov neq, nv juq nail haoqnaol phao lal thail thaiq nail ngaol' dai, ge bhiq yaoq" dai, daoq bivq-a nail ngaol. Khul khi mail dai ngal-aq, Yaqkov neq, "Niil aq-il khe bivq nail kovpavq juq bhaq da nee aivq nail neema noeq sivq khi, aivq nee mail moel-u phao, ngaq bhai hav lavq-ail jaol-aq" dai, noeq nail ngaol.

21Aivq neq, kovpavq juq bhai iqmoeq bhi oil ha-ai lai khi, aq-u nqkiv neq, aivq nail haqphal saiqgov bhai gaoq iq thaiq lee-a nail ngaol.

Peiqnuqlav nail jaolduq bhai Yaqkov nieivq pheel jaq-a nail ganl

22Aq-u nqkiv Yaqkov neq thul khi aivq khaqma nvq gaq, khaqma yaqkav nvq gaq dai khi, yaqyov 11 gaq khul khi, Yalbhaol nail laoljaol bhai bhi ceiv lai-a nail ngaol.

23Aqyu juq bhai a phao lel khel bhi ceiv lai gaq-al nee ngal-aq, aivq nail ildaoq maoqgaiq juq iqsanl bhi bavq ceiv gil-a nail ngaol.

24Yaqkov aivq teevq gaq taivq-ail jaol-ail ceevq-a nail ngaol. Aq-u phao, tsaol-aq teevq gaq neq, nqbhaq bhaq lal thao bhai kev dai, Yaqkov nee mail nieivq pheel jaq-a nail ngaol.

25Tsaol-aq al gaq aivq maq gaq lai kivq-ail dai, heeq lal bhiq-u phao, Yaqkov nail daoqkhoe khe haqguq guq ma thaoq pov gai-aivq bhiq-a nail ngaol.

26Tsaol-aq al gaq neq, "Ngaq bhai phaiq lavq yaoq. Nqbhaq bhaq lal-aiq nail ngaol" dai, ge bhiq-a nail ngaol. Yaqkov gail, "Naol ngaq bhai geeqlaoq maq bivq lavq-u kev dai, ngal maq phaiq bhiq" dai, ge kovq bhiq-a nail ngaol.

27Tsaol-aq al gaq, "Naoq nail aqmil khaq sil gaq" dai, nal daiq bhiq-u phao, "Yaqkov" dai, aivq ge kovq bhiq-a nail ngaol.

28Tsaol-aq al gaq ge nail: "Yaqhao neq, naoq nail aqmil 'Yaqkov' dai, maq ya khul yaoq-aol. Naol neq, Miqyail nee mail maqkhaiq, tsaol-aq nee mail maqkhaiq, nieivq pheel jaq khi gaq lai-a nail ngel-i mail, naoq nail aqmil bhai "Ilsaqleiqlav#32.28 Ilsaqleiqlav Ilsaqleiqlav dai, ge nail daoqceevq neq, aivq Miqyail nee nieivq pheel jaq nail dai ge movq nail ngaol" dai, ya khul nail ngaol" dai, ge bhiq-a nail ngaol.

29"Naoq nail aqmil ngaq bhai ge lavq-o" dai, Yaqkov nal daiq bhiq-a nail ngaol. Thail hai ngaol-aoq, tsaol-aq al gaq neq, "Naol ngaq nail aqmil, khul khi mail heeq kivq movq nail-aiq" dai, ge kovq bhiq khi, Yaqkov bhai geeqlaoq bivq-a nail ngaol.

30A bhai nee ngal-aq, Yaqkov neq, "Ngal Miqyail nee maivphaoq tsiq tavq khi mail ya moel khi ngaol-aoq, ngal aqdoevq ya jaol-ai haq-il" dai, ge khi jaolduq al duq bhai Peiqnuqlav#32.30 Peiqnuqlav Peiqnuqlav dai ge daoqceevq neq, Miqyail nail maivphaoq dai, ge movq nail ngaol. dai khul bhiq-a nail ngaol.

31Yaqkov neq, Peiqnuqlav nee mail dov ail-u phao, nlma dov lal-aoq nail ngaol. Aivq neq, daoqkhoeq khe haqguq guq ma pov-ail thaq nail ngel-i mail, khil hoe khil hoe dai, pevq-ail bhiq-a nail ngaol.

32Yaqkov neq, daoq khoe bhai ya bhi thaoq-a nail ngel-i mail, yaq n n-gaol kev dai, Ilsaqleiqlav nail tsaol-aq juq neq, daoq khoe khe jaiqyaq haqguq maq jaq-ail.

Currently Selected:

Genesis 32: aeu

Highlight

Copy