Genesis 34

Iqmoeq 34

Dilnav dai khi Seiqkhinq nail ganl

1Teevq n kev lal-u phao, Yaqkov dai khi Leiqaq nail yaqmiq Dilnav neq, a bhai khe yaqmai-aq yaqnoil juq jaol nail bha nalga ail thaq nail ngaol.

2Jaolduq al duq bhai uv thaiq nail Hilwil nail jeq-e Haqmaoq nail yaqyov Seiqkhinq neq, Dilnav bhai moel-u phao, he thaiq khi mail aqdoil nl bhiq-a nail ngaol.

3Thail hai ngaol-aoq, aivq neq, Dilnav bhai haoqnao gaiq-a lai-a nail ngel-i mail, aivq bhai daoq tsil ju gaoq dai, ge tsaoq bhiq-a nail ngaol.

4Al heel ngel-i mail, Seiqkhinq neq, aivq nail aqbhu Haqmaoq bhai, "Dilnav bhai hal lai lavq yaoq" dai, ge bhiq-a nail ngaol.

5Yaqkov neq, aivq nail yaqmiq Dilnav bhai aqdoil nl bhiq thaq nail ganl heeq nia khi ngaol-aoq neq, aivq nail yaqyov juq jaiqyaq lovq nail nee mail maq kovq lal-u kev dai, ganl al ganl khaq sil gaq bhai iqsanl maq ge bhiq dai jaol-a nail ngaol.

6-7Yaqkov nail yaqyov juq jaiqyaq lovq duq nee mail kovq lal thail thaiq-u phao, Seiqkhinq nail aqbhu Haqmaoq neq, khaqma nal nail galduq, Yaqkov jaol nail bha lal-a nail ngaol. Yaqkov nail yaqyov juq neq, aqyu juq nail jaqbheq bhai, Seiqkhinq-i mail aqdoil nl bhiq khi aqyu phaq nail teevq jeq-e jeq-e lao bhai khal ge movq ail ge doil nail bhai ya gaiq-u phao, maq nl heeq phaq-ail tsaq nail ganl bhai, nl dol lavq thaq nail ngel-i mail, neema phail dee dee lal bhiq-a nail ngaol.

8Thail hai ngaol-aoq, Haqmaoq aqyu juq bhai ge bhiq-a nail:"Ngaq nail yaqyov Seiqkhinq, naoq nail yaqmiq bhai mal dil gaiq-a nail ngel-i mail, bhi hevq yaoq.

9Nul juq dai khi nv juq nail gaiqlaq bhai bhi hevq tavq bhi maol tavq nail galduq neema tsaq bhel.

10Nul juq niil niai nv juq nee mail teevq gaq khe-ai khal jaol movq nail aqduq bhai tsel khi jaol yaoq. Aqmeeq-ai gaoq jaq kha jaq khi, ildaoq maoqgaiq iqsanl hal pov jil yaoq" dai, ge bhiq-a nail ngaol.

11A bhai nee ngal-aq, Seiqkhinq neq, Dilnav nail aqbhu dai khi algao juq bhai ge bhiq-a nail: "Ngaq bhai noeq meeq nail lavqkhoel nee, aivq bhai bhi hevq lavq yaoq. Nul juq-i mail khal hal nail iqsanl mail, ngal bivq nail ngaol.

12Nul juq-i mail khal oil movq nail kovpavq hal nail, ya nail ngaol. Dilnav ngaq bhai bhi hevq lavq haq neq, nul juq bhai kha dai ya khaoq khi ngaol-aoq, ngal khaoq naol" dai, hal bhiq-a nail ngaol.

13Yaqkov nail yaqyov juq neq, aqyu juq nail jaqbheq Dilnav bhai, Seiqkhinq-i mail aqdoil nl bhiq thaq nail ngel-i mail, Seiqkhinq dai khi aivq nail aqbhu Haqmaoq bhai goiqbhaoq bhaoq khi

14niail hai ge kovq bhiq-a nail ngaol: "Nv juq nail jaqbheq bhai, bavkov uqjaq maq oev thaq nail tsaol-aq nee mail maq bhi maol-ail. Thail hai nl haq neq, nv juq nail galduq haq sil heeq phaq-ail tsaq nail ngaol.

15Nv juq-i mail hav bhoel kivq nail ganl teevq ganl jiav-ail teevq-eel ngaol. Al neq, nul juq khe jaol nail yaqyov-aq iqsanl mail nv juq khe-ai, bavkov uqjaq ya oev gil nail ngaol.

16Thail hai nl haq neq, nv juq nail yaqmiq juq nul juq bhai bhi maol lee khi, nul juq nail yaqmiq juq gail, nv juq hevq nail ngaol. Nv juq nul juq nee mail jaol khi, tsaol jeq-e teevq jeq-e taivq-ail pevq lal nail galduq, neema tsaq nail ngaol.

17Thail hai ngaol-aoq, nul juq nv juq-i mail hal nail bhai maq nal daiq dai, bavkov uqjaq maq oev haq neq, nv juq nail jaqbheq gaoq hevq kovq khi nul juq jaol nail nee mail dov-ail nail ngaol" dai, ge bhiq-a nail ngaol.

18Haqmaoq dai khi aivq nail yaqyov Seiqkhinq neq, hal nail al juq iqsanl mail bhai neema tsaq nail ngaol.

19Al heel ngel-i mail, Yaqkov nail yaqyov juq-i mail hal nail phaq bhai nl nail dai khi, Seiqkhinq teevq pov taivq-ail dov ail-a nail ngaol. Khul khi mail dai ngal-aq, aivq neq, Yaqkov nail yaqmiq Dilnav bhai ya dee dee lai bhiq nail ngaol. Al ovqtavq, aivq neq, aivq nail jeq-e teevq jeq-e jeq lao bhai aqmil khal dov nail teevq gaq pevq nail ngaol.

20Aq-u phao, Haqmaoq dai khi aivq nail yaqyov Seiqkhinq neq, meenq khe lolgov gov ma nail aqjail bhai jiav nail tsaol-aq jil lai duq bha ail khi, meenq khe aqivq aqtsu juq bhai ge bhiq-a nail:

21"Tsaol-aq niil juq neq, ngadao juq bhai goil nail ngaol. Aqyu juq ngadao nail miltsaq bhai jaol khi, ya bhi gaoq jaq kha jaq nail ngaol. Ngadao juq nail miltsaq neq, aqyu juq jaol mao dai gaoq-an nail ngaol. Ngadao juq gail aqyu juq nail yaqmiq hevq-u khe-ai, aqyu juq gail ngadao juq nail yaqmiq bhi hevq yaoq.

22Thail hai ngaol-aoq, ngadao juq nail yaqyov-aq juq iqsanl mail, aqyu juq khe-ai, bavkov uqjaq oev khi pultavq, aqyu juq neq, ngadao juq nee mail jaol khi ngadao juq nee tsaol jeq-e teevq jeq-e taivq-ail pevq lal nail ngaol dai, ge nail ngaol.

23Aqyu juq bhai ngadao nee teevq gaq khe-ai bhi jaol nail galduq, neema tsaq haq neq, aqyu juq nail yaol, civqmeiv nee mail daq-n khi jaiqyaq juq iqsanl mail dai khi, ildaoq maoqgaiq juq iqsanl mail neq ngadao nail pevq lal nail, maq ngel ail laiq" dai, ge bhiq-a nail ngaol.

24A bhai khe aqivq aqtsu juq iqsanl, Haqmaoq dai khi Seiqkhinq-i mail ge nail bhai neema tsaq khi, meenq lavqkhoel khe jaol nail yaqyov-aq juq yaoq gaq yaoq-ao nee mail bavkov uqjaq oev gil-a nail ngaol.

25A bhai nee ngal-aq, hail n bhee lal-u phao, a bhai khe jaol nail yaqyov-aq juq neq, bavkov uqjaq oev-a nail bhaq da nee nal thail thaiq-u phao, Yaqkov nail yaqyov juq pevq nail Dilnav nail algao Silmiqoq dai khi Leiqbhil neq, thaoma he khi maq noeq maq dul-ai thaq nail aqyanq bhai, meenq bha aol lai khi mail yaqyov-aq juq yaoq gaq yaoq-ao nee mail bhai, heivq gil-a nail ngaol.

26Aqyu nvq gaq neq, Haqmaoq dai khi aivq nail yaqyov Seiqkhinq bhai gail, thaoma-i mail heivq-a nail nee ovqtavq, Seiqkhinq nail ilkhaol nee Dilnav bhai hevq dol leevq khi aqyu juq nail ilkhaol bha kovq lee-a nail ngaol.

27Yaqkov nail yaqyov jail nail juq gail, meenq lavqkhoel bha gaoq aol lal khi aqyu nvq gaq-i mail heivq-a nail juq bhai moel-a nail nee ovqtavq, meenq bhai tsaol pheel deeq bhiq-a nail ngaol. Khul khi mail dai ngal-aq, a bhai aqyu juq nail jaqbheq Dilnav bhai aqdoil nl bhiq-a nail, ngel-i mail ngaol.

28Aqyu juq neq meenq lavqniil phao khe dai khi, meenq lavqkhoel phao khe jiav nail yalkav juq, yaol nail munl, civqmeiv nail munl, niaoqnel nail munl, moeqphaq laljieiv nail munl bhai iqsanl oil gil-a nail ngaol.

29Aqyu juq nail yalkav aqphoiq phaq iqsanl mail maqkhaiq, aqyu juq nail khaqma dai khi yaqnoil juq iqsanl mail maqkhaiq, ilkhaol lavqkhoel khe khal moel lal nail yalkav juq iqsanl mail maqkhaiq, oil gil-a nail ngaol.

30Aq-u phao, Yaqkov neq, Silmiqoq dai khi Leiqbhil bhai ge bhiq-a nail: "Nul juq neq, ngaq bhai lav cov lavq-ao nail ngaol. Milkhaoq niil khaoq khe jaol nail, Khaqnanq nail tsaol-aq dai khi, Pheiqliqsil nail tsaol-aq juq neq, ngaq bhai bhe lal bhiq nail ngaol. Ngaq bhai tsaol-aq micil jaol-ail teevq-eel ngaol. Aqyu juq jil lai khi ngaq bhai genl dev lal nail kheel nul-uq, ngadao juq nail phaqyaq ma yaq juq iqsanl mail, ya sil gil nail ngaol" dai, ge bhiq-a nail ngaol.

31Aqyu juq neq, "Nv juq nail jaqbheq bhai, maimaqlal teevq gaq khe-ai, maq bhi nl movq-ail" dai, ge kovq bhiq-a nail ngaol.

Currently Selected:

Genesis 34: aeu

Highlight

Copy