Genesis 20
20
Iqmoeq 20
Aqbhaqlaqhaq dai khi Aqbhilmaqlail
1Aqbhaqlaqhaq neq, aivq-i mail jaol nail jaolduq nee mail Nilgeiq miltsaq bhai jiav nail Kaqdeiqsav meenq dai khi Sullav nail meenq gaiqlaq bhai jaol phal lal nail nee ovqtavq, Geiqlaq meenq bhai iqsanl teevq yanq jaol-a nail ngaol.
2A bhai Aqbhaqlaqhaq neq, aivq nail khaqma Saqlal neq, aivq nail jaqbheq pevq nail dai, ge bhiq-a nail ngaol. Al heel ngel-i mail, Geiqlaq meenq khe heeqphaq Aqbhilmaqlail neq, Saqlal bhai hevq nail dai khi, aivq nail ilkhaol bha hel-aivq-a nail ngaol.
3Thail hai ngaol-aoq, aq-u nqkiv phao, Miqyail neq, nvmav lavqkhoel nee Aqbhilmaqlail bhai ge bhiq-a nail: "Naol yaqmai-aq niil gaq bhai hel lavq-a nail ngel-i mail, ya sil nail ngaol. Aivq neq, yovjil bhao nail yaqmai-aq teevq gaq pevq nail ngaol" dai, ge bhiq-a nail ngaol.
4Yanq al yanq bhai, Aqbhilmaqlail neq, Saqlal nail aqjail bhai maq jiiv bal laivq haq nail ngel-i mail, niail hai ge kovq bhiq-a nail ngaol: "Heeqphaq-ol, naol neq, mal dil dil dai oeqbal maq aol nail ngaq nail tsaol jeq-e juq bhai lav cov nail ngaol laiq.
5Aqbhaqlaqhaq aivq nail aqmaol, aivq nail khaqma bhai 'jaqbheq' dai, ge lavq-a nail maq ngel ail laiq. Saqlal gail 'Aqbhaqlaqhaq neq, ngaq nail al gao' dai, ge-a nail ngaol. Ngal iqsanl neema khi aqlavq aqhaol haol nail lavqkhoel nee ganl niil ganl nl-a nail ngaol" dai ge bhiq-a nail ngaol.
6Aq-u phao, nvmav nail lavqkhoel Miqyail gaoq ge kovq bhiq-a nail: "Naol neema aqhaol haol nail lavqkhoel nee nl-a nail dai, ngal heeq kivq nail ngaol. Al heel ngel-i mail, naol oeqbal maq nl nail iqmoeq nee, yaqmai-aq thoil gaq bhai maq ya bheeq nail haqbhoil ngal lav tsoiq nail phaq pevq nail ngaol.
7Niil aq-il nee mail, yaqmai-aq thoil gaq bhai aivq nail yovjil jaol nail bha hevq kol laivq bhiq yaoq. Aivq nail yovjil neq, Miqyail nail haqbhoil ge dan nail tsaol-aq pevq nail ngel-i mail, naol aqdoevq ya doevq dai, aivq naoq nail haqbhoil geeqlaoq hal lavq nail ngaol. Thail hai ngaol-aoq, yaqmai-aq thoil gaq maq hevq kol laivq bhiq haq neq, naol dai khi naoq nail tsaol-aq juq iqsanl mail, ya sil gil nail ngaol" dai, ge bhiq-a nail ngaol.
8Haoqnao n-gaol nqhao navq mav ail, Aqbhilmaqlail neq, aivq nail yaqkav juq iqsanl mail khul jil khi ganl niil ganl ge bhiq-u phao, tsaol-aq al juq iqsanl mail gee sil dee dee lal bhiq-a nail ngaol.
9A bhai nee ngal-aq, Aqbhilmaqlail neq, Aqbhaqlaqhaq bhai khul khi ge bhiq-a nail: "Naol ngaq bhai khal hai nl lavq-a nail-aiq. Ngal naoq bhai khul nl laiq lavq-a nail ngel-i mail, naol neq, ngal dai khi ngaq nail tsaol-aq juq bhai maq meeq nail oeqbal bhi kev lee nail-aiq. Naol neq, ngaq bhai maq nl lavq heeq phaq-ail tsaq nail bhai, nl lavq-a nail ngaol.
10Naol khul dai noeq khi niail hai nl-a nail-aiq" dai, nal daiq bhiq-a nail ngaol.
11Aqbhaqlaqhaq ge kovq bhiq-a nail: "Niil niai khe jaol nail tsaol-aq juq neq, Miqyail bhai maq ev nail nee ovqtavq, maq gee sil nail ngel-i mail, ngaq nail khaqma bhai ya nail galduq, ngaq bhai heivq lal naol dai, noeq-a nail ngel-i mail, nl-a nail ngaol.
12Maldil dai ge haq neq, aivq neq, ngaq nail jaqbheq gail ngel naol. Aivq neq, ngaq-ai nee aqbhu dul aqma maq dul nail ngaq nail jaqbheq pevq-u khe-ai, ngaq nail khaqma gail pevq nail ngaol.
13Al heel ngel-i mail, Miqyail neq, ngaq bhai ngaq nail aqbhu nail ilkhaol nee khul dov-aivq lavq khi, teevq dao nee teevq dao gailkhaol dov-u phao, ngal neq, ngaq nail khaqma bhai, 'Naol ngaq-ai gaiq-a haq neq, khal ail kev nail aqduq bhai, ngal neq, naoq nail algao ngaol dai, ya ge naol' dai, aivq bhai ge bhiq-ai thaq nail ngaol" dai, ge kovq bhiq-a nail ngaol.
14A bhai nee ngal-aq, Aqbhilmaqlail neq, Aqbhaqlaqhaq bhai aivq nail khaqma pevq nail Saqlal bivq kovq-a nail ngaol. Al ovqtavq, Aqbhaqlaqhaq bhai yaol, niaoqnel dai khi, yaqkav pevq nail yaqyov-aq yaqmai-aq juq iqsanl bivq-a nail ngaol.
15Al ovqtavq, Aqbhaqlaqhaq bhai ge bhiq-a nail: "Ngaq nail miltsaq lavqkhoel-ai naol khal jaol movq nail bhai jaol nail, ya nail ngaol" dai, ge bhiq-a nail ngaol.
16A bhai nee ngal-aq aivq Saqlal bhai gaoq ge bhiq-a nail: "Hel daiq yaoq. Niil aq-il niil juq iqsanl nail sivtavq nee ngal naoq nail algao bhai phul teevq hinl bavq bivq-ao nail ngaol. Niil neq, naoq bhai ngal khul gail maq nl bheeq-al deel nail salkhil pevq nail lavqkhoel bivq-a nail phaq ngaol. Tsaol-aq yaoq gaq yaoq-ao nee naol neq, oeqbal teevq laiq gail maq nl laiq-a nail ganl heeq nia lal nail ngaol" dai ge bhiq-a nail ngaol.
17Aqbhaqlaqhaq gail Miqyail bhai geeqlaoq hal khi Miqyail neq, Aqbhilmaqlail dai khi aivq nail khaqma bhai maqkhaiq, aivq nail yaqkav yaqmai-aq juq bhai maqkhaiq, bhi meeq lai khi yaq gaoq bhi bhao lee-a nail ngaol.
18Khul khi mail dai ngal-aq, iqmoeq-u phao neq, Aqbhaqlaqhaq nail khaqma Saqlal bhaq da nee Heeqphaq Miqyail neq, Aqbhilmaqlail nail khaqma dai khi, aivq nail tsaol-aq yaqmai-aq yaoq gaq yaoq-ao nee bhai yaq maq bhi jaol lee dai, dal bhiq-a nail ngaol.
Currently Selected:
Genesis 20: aeu
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
