Genesis 21
21
Iqmoeq 21
Ilcav doevq lee-a nail ganl
1Heeqphaq Miqyail neq, aivq-i mail saljial jaq-ai thaq nail khe-ai, Saqlal bhai geeqlaoq bivq nail lavqkhoel,
2Saqlal neq, yaqyov teevq gaq ceiv lai khi tsiq-a nail ngaol. Yaqyov al gaq Miqyail-i mail ge-ai thaq nail aqyanq bhai tsiq-u phao, Aqbhaqlaqhaq neq, joiqmaoq maoq lai-aoq nail ngaol.
3Aqbhaqlaqhaq neq, yaqyov al gaq bhai Ilcav dai, mil bhiq-a nail ngaol.
4Miqyail-i mail daoq bivq-a nail khe-ai, yaqyov al gaq eivq n bhee lal-u phao, bavkov uqjaq oev bhiq-a nail ngaol.
5Ilcav bhao-u phao, Aqbhaqlaqhaq neq, aivq nail aqkovq 100 kovq bhee-aiq nail ngaol.
6Saqlal ge nail: "Miqyail neq, ngaq bhai bhi hel sil lavq-ao nail ngaol. Ganl niil ganl ya gaiq nail juq yaoq gaq yaoq-ao nee mail, ngaq-ai nee teevq gaq khe-ai, hel sil nail ngaol" dai, ge bhiq-a nail ngaol.
7Saqlal gaoq ge nail: "'Saqlal neq, yaq bhai aqtsil ya bhi cuvq naol' dai, Aqbhaqlaqhaq bhai khaq sil gaq ge bhiq daiq-a nail-aiq. Thail hai ngaol-aoq, niil aq-il aivq joiqmaoq maoq lai-u phao, aivq nail galduq ngal yaqyov teevq gaq bhao bhiq kivq-ao nail ngaol" dai, ge nail ngaol.
Haqgaqlal dai khi Ilsaqmeiqlav bhai the dov-a nail ganl
8Ilcav eeq lal khi aqtsil dal bhiq-u phao, Aqbhaqlaqhaq neq, aqbhee bhee ma lav sav bhiq-a nail ngaol.
9Aq-u phao, Iljiltuv nail yaqmai-aq pevq nail Haqgaqlal dai khi Aqbhaqlaqhaq nail yaqyov Ilsaqmeiqlav neq, Ilcav bhai hel sil hel sil-ail tavq lao thaq nail bhai, Saqlal ya moel-a nail ngaol.
10Aq-u phao, aivq Aqbhaqlaq bhai ge bhiq-a nail: "Yaqkav niil gaq dai khi, aivq nail yaqyov bhai the ha yaoq. Ngaq nail yaqyov Ilcav-i mail ya heeq phaq-ail tsaq nail jaiqbhoil juq, yaqkav niil gaq nail yaqyov bhai maq ya bhoil pav bhiq-ail" dai, ge bhiq-a nail ngaol.
11Ilsaqmeiqlav neq, aivq nail yaq pevq nail ngel-i mail, Aqbhaqlaqhaq al hai ya gaiq-u phao, neema maq sal-ail, pevq lal bhiq-a nail ngaol.
12Thail hai ngaol-aoq, Miqyail Aqbhaqlaqhaq bhai ge bhiq-a nail: "Yaqyov thoil gaq dai khi, naoq nail yaqkav Haqgaqlal bhai the dov nail galduq, neema maq sal mail thaq pevq. Ngaq-i mail saljial jaq-ai thaq nail khe-ai, Ilcav nee mail naoq nail jeq-e jaq-a yavq kha lee nail phaq pevq nail ngel-i mail, Saqlal-i mail khal ge nail khe-ai, nl yaoq.
13Yaqkav nail yaqyov al gaq gail naoq nail yaq pevq nail ngel-i mail, aivq nail jeq-e jaq-a neq, jeq-e jeq-e ma ngal bhi pevq lal nail ngaol" dai, ge bhiq-a nail ngaol.
14Haoqnao n-gaol nqhao navq mav-ail, Aqbhaqlaqhaq neq, jaq jaq daol daol dai khi ulcuvq eelpheeq Haqgaqlal nail bavqpuv bhai tsiq dav bhiq khi, aivq khi mail aivq nail yaqyov bhai ilkhaol nee mail bhi dov ail-a nail ngaol. Haqgaqlal ilkhaol nee mail dov-ail khi, Bhaqlaqseiqbhal dai khul nail tsalhail daikav bhai kev lai khi tsao thaq nail ngaol.
15Ulcuvq eelpheeq bhai ulcuvq gil lai-u phao, yaqyov al gaq-ai jiavbuv nail aqhaiq daoqthaoq bhai hevq thaq-ail ceevq-a nail ngaol.
16A bhai nee ngal-aq, aivq neq, heeqnav teevq bev kheel bha jaol deel lai khi ge nail: "Yaqyov thoil gaq sil nail bhai ngaq-ai maq moel movq-il" dai, ge khi, nioil-a nail ngaol.
17Thail hai ngaol-aoq, Miqyail neq, yaqyov al gaq-i mail nioil nail aqthel bhai gaiq-a nail ngaol. Al heel ngel-i mail, Miqyail nail nqtavq gaqkhoel teevq gaq neq, nqtavq nee mail khul khi ge bhiq-a nail: "Haqgaqlal-ol, naol khul jiav nail-aiq. Thaq gee sil. Miqyail neq, yaqyov al gaq-i mail nioil nail aqthel bhai gaiq-ao nail ngaol.
18Thul khi ail yaoq. Al ovqtavq, yaqyov bhai hevq thul bhiq khi gaq bhiq yaoq. Ngal aivq bhai jeq-e jeq-e ma bhi pevq lal nail ngaol" dai, ge bhiq-a nail ngaol.
19A bhai nee ngal-aq, Miqyail neq, Haqgaqlal nail maivneev phao bhiq khi aivq lovduq teevq duq ya moel-a nail ngaol. Aivq bavkov eelpheeq bhai ulcuvq keivq bhee khi, yaqyov bhai bhi daol-a nail ngaol.
20Miqyail neq, yaqyov al gaq nee mail jaol nail lavqkhoel, aivq eeq lal-u phao, Paqlaq dai, khul nail tsalhail daikav bhai jaol nail haq the nail tsaol-aq teevq gaq pevq lal-a nail ngaol.
21Aivq Paqlaq nail tsalhail daikav bhai jaol-u phao, aivq nail aqma neq, aivq nail haqbhoil, Iljiltuv milkhaoq khe yaqmai-aq teevq gaq hevq-ail khi, bhi hevq bhi maol pheel jaq-a nail ngaol.
Aqbhaqlaqhaq-i mail Aqbhilmaqlail nee jaq-a nail daoqma saljial
22Aq-u phao, Aqbhilmaqlail neq, aivq nail genl dev yaq bhai bhi hel daiq phail thaq nail aqivq gaq pevq nail Philkaollav nee mail, Aqbhaqlaqhaq jaol nail bha lai khi, "Naoq-i mail khal nl nail yaoq phaq yaoq-ao nee mail bhai Miqyail teevq gaq khe-ai jaol nail ngaol.
23Al heel ngel-i mail, naol ngaq bhai maqkhaiq, ngaq nail yaqmiq yaqyov dai khi, ngaq-ai nee mail yavq kha lee thaq nail yaq juq bhai maqkhaiq, saljial maq pheeq-ail dai, Miqyail nail sivtavq bhai saljial jaq lavq yaoq. Ngal naoq bhai saljial ivq nail khe-ai, ngaq bhai maqkhaiq, naoq-i mail daq-i jiovq nail miltsaq bhai maqkhaiq, saljial jaq lavq yaoq" dai, Aqbhaqlaqhaq bhai ge bhiq-a nail ngaol.
24Aqbhaqlaqhaq gail, "Ngal saljial jaq nail ngaol" dai, ge bhiq-a nail ngaol.
25Thail hai ngaol-aoq, Aqbhilmaqlail nail yaqkav juq-i mail tsai khal-aivq lavq-a nail lovduq nail ganl, Aqbhilmaqlail bhai ge bhiq-a nail ngaol.
26Aq-u phao, Aqbhilmaqlail ge nail: "Khaq sil gaq-i mail thail hai nl thaq nail dai, ngal maq ya heeq kivq-al. Naol iqmoeq-u nee mail, ngaq bhai maq ge lavq-a nail ngel-i mail, ganl niil ganl ngal niil aq-il bhai, ya heeq kivq-al teevq-eel ngaol" dai, ge bhiq-a nail ngaol.
27A bhai nee ngal-aq, Aqbhaqlaqhaq neq, Aqbhilmaqlail bhai yaol dai khi niaoqnel juq bivq khi mail, aqyu nvq gaq daoqma saljial jaq tavq-a nail ngaol.
28Al ovqtavq, Aqbhaqlaqhaq neq, aivq nail yaol nail munl khe yaol yaq aqma sivq maol nieivq pav-a nail ngaol.
29Aqbhilmaqlail neq, "Naoq-i mail nieivq pav-ai thaq nail yaol yaq aqma sivq maol nail daoqceevq neq, khul dai ge movq nail-aiq" dai, nal daiq bhiq-a nail ngaol.
30Aqbhaqlaqhaq neq, "Lovduq niil neq, ngaq-i mail duq-a nail ngaol dai, salkhil bhi pevq nail galduq, yaol niil sivq maol bhai hav bhoel lavq-o" dai, ge kovq bhiq-a nail ngaol.
31Aqyu nvq gaq daoqma saljial jaq-a nail aqduq pevq nail ngel-i mail, jaolduq al duq bhai Bhaqlaqseiqbhal#21.31 Bhaqlaqseiqbhal Bhaqlaqseiqbhal dai, ge nail daoqceevq neq, saljial jaq nail dai, ge movq nail ngaol. Lov duq sivq duq dai iqsanl ge movq nail ngaol. dai mil bhiq-a nail ngaol.
32Bhaqlaqseiqbhal bhai aqyu nvq gaq daoqma saljial jaq tavq gaq-u phao, Aqbhilmaqlail dai khi, aivq nail genl dev nail phao aqivq gaq pevq nail Philkaollav neq Philliltiv nail milkhaoq bha kovq ail-a nail ngaol.
33Aqbhaqlaqhaq neq, Bhaqlaqseiqbhal bhai heeqtsaq maitsel aqbhaol teevq bhaol kha khi, nqmaq maqluv halyeel ivq nail Heeqphaq Miqyail nail aqmil bhai gul-a nail ngaol.
34A bhai nee ngal-aq, Aqbhaqlaqhaq neq Philliltiv milkhaoq bhai mao dai daq-i jiovq khi jaol-a nail ngaol.
Currently Selected:
Genesis 21: aeu
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
