Mattá 16

Ásmáni neshániay lóthag

(Markás 8:11–13; Luká 12:54–56)

1 Parisi o Sadukiáni lahtén mardom Issáay kerrá pa áiay chakkásagá átk o ásmáni neshánié lóthetesh. 2Bale Issáyá passaw dát: “Wahdé bégáha bit shomá gwashét: ‘Bóm o hawá wassha bit chéá ke ásmánay rang sohr ent.’ 3Sabáhá gwashét: ‘Maróchi tuppána bit chéá ke ásmánay rang moj o hónchak ent.’ É paymá ásmánay rang o neshániáni kesás kanagá zánét, bale zamánag o wahday neshániáni kesás kanagá nazánét. 4Sherr o zenahkárén nasl o padréch neshánia lóthit, bale áyán Yunos nabiay neshániá abéd, dega hecch neshánié dayaga nabit.” Randá Issáyá á yalah dátant o shot.

Parisi o Sadukiáni badén homir

(Markás 8:14–21)

5Wahdé morid mazangwarmay domi pahnátá rasetant zántesh ke nánesh shamoshtag. 6Issáyá gón áyán gwasht: “Hozzhár bét! Cha Parisi o Sadukiáni homirá pahréz kanét.” 7Gorhá á watmánwat habar kanagá laggetant: “Wájah paméshká chosha gwashit ke má nán gón wat nayáwortag.” 8Issáyá zánt ke ché gwashagá ant, paméshká gwashti: “Oo kambáwarán! Chéá jérhagá ét ke ‘gón má nán nést,’ 9angat hecch sarpad nabutagét?! Shomá á panchén nán shamoshtag, ke panch hazár mardomá sérá wárt o cha sar átkagén naganán chont sapt porr kort? 10Yá hamá haptén nán ke chár hazár mardomá wárt o sér kort o shomá cha sar átkagénán chont sapt porr kort? 11Gorhá chón sarkecha nawarét ke man gón shomá nánáni bárawá habar nakortag? Cha Parisi o Sadukiáni homirá pahréz kanét.” 12Gorhá morid sarpad butant ke áiá nagwashtag cha ártén homirá pahréz bekanant, cha Parisi o Sadukiáni tálimá watá dur bedárant.

Petrosay mannag o gwáhi

(Markás 8:27–30; Luká 9:18–21)

13Wahdé Issá Kaysariah Pilipiay sardhagárá átk, cha wati moridán josti kort: “Mardom Ensánay Chokkay bárawá ché gwashant, man kay án?” 14Áyán passaw dát: “Lahténa gwashit pákshódókén Yahyá ay, lahténa gwashit Elyás nabi ay, dega lahténa gwashit Eremyá nabi ay yá cha á dega nabián yakké.” 15Gorhá cha áyán josti kort: “Shomá wat mani bárawá ché gwashét, man kay án?” 16Shamun Petrosá passaw dát: “Taw Masih ay, namiránén Hodáay Chokk.” 17Issáyá darráént: “Oo Shamun, oo Yunáay chokk! Taw bahtáwaré ay, chéá ke é habar ensánéá#16:17 Asligén Yunáni nebeshtánka gwashit: “jesm o hón”. pa taw záher o paddar nakortag, mani Pet ke ásmáná ent, áiá paddar kortag. 18Tará gwashán: Taw Petros#16:18 Yunáni zobáná, “Petráay” máná “talár” ent. ay o é taláray sará man wati kelisáay bonyátá éra kanán ke markay zór#16:18 Asligén Yunáni nebeshtánka gwashit: “mordagáni jahánay darwázag”. áiá hechbar prósha nadant o áiay sará sóbéna nabit. 19Man ásmáni bádsháhiay kelitán tará dayán, zeminay sará harché ke taw makana kanay, ásmáná ham makan kanaga bit, harché ke zeminay sará taw rawá kanay ásmáná ham rawá kanaga bit.” 20Randá áiá wati morid parmán kortant: “Hechkasá magwashét ke man Masih án.”

Wati mark o jáh janagay#16:21 Jáh janag, bezán cha wati jáhá anágatén pád áyag, Arabi o Pársiá “qiám, rastákhiz”. bárawá, Issáay péshgói

(Markás 8:31–33)

21Cha hamá wahdá rand Issá gón wati moridán pa tachk o paddari habar kanagá lagget ke “Allamá, báyad ent Urshalimá berawán, cha kawmay kamásh, mazanén dini péshwá o Sharyatay zánógeráni dastá sakki o sóri besaggán o koshag bebán o sayomi róchá zendag bebán o jáh bejanán.” 22Petrosá á yakk kerré kasshet o pa iráz gwashti: “Oo Hodáwand! Hodá chosh makanát. Gón taw hechbar é paymá nabit.” 23Issáyá chakk tarrént o gón Petrosá gwashti: “Oo Shaytán! Cha mani démá dur bay. Taw mani ráhá bandagá ay, tai hayál Hodái hayálé naent, ensáni hayálé.”

Issáay randgiri

(Markás 8:34—9:1; Luká 9:22–27)

24Randá Issáyá morid lóthetant o gwashti: “Agan kasé lóthit mani randgiriá bekant, báyad ent wati delay sajjahén lóth o wáhagán yalah bedant o pa sáhay nadr kanagá, wati jenday salibá baddhá bekant o mani ráhá gám bejant. 25Chéá ke, agan kasé wati sáhay rakkénagay johdá bekant, áiá báhénit, bale á ke wati sáhá pa manigia báhénit, áiá rakkénit. 26Agan kaséá sajjahén donyá berasit, bale wati sáhá bebáhénit, gorhá á chónén sóbé bárt o ché kattheta#16:26 Katthag, bezán nap o sutt kanag, dastá árag. kant? Mardom wati sáhá pa che kimmaté bahá zorta kant?

27 Ensánay Chokk gón wati Petay mazanén shán o marháhá préshtagáni hamráhiá kayt, gorhá harkasá áiay kortagén káráni mozzá dant. 28Shomárá rásténa gwashán, edá lahtén mardom óshtátag ke tán áyáni démá Ensánay Chokkay bádsháhi záher mabit, markay támá nachashant.”

Currently Selected:

Mattá 16: HPKB

Highlight

Copy