Mattá 15

Delpáki

(Markás 7:1–23)

1Randá, cha Urshalimá átkagén lahtén Parisi o Sharyatay zánóger Issáay kerrá átk o gwashtesh: 2“Tai morid chéá may pet o piroki rahbandá próshant o cha waragá pésar dasta nashódant?” 3Áyáni passawá gwashti: “Shomá chéá pa wati dód o rahbandáni dáragá Hodáay hokmána próshét?! 4Hodáyá gwashtag: Wati pet o mátá sharap o ezzat beday o harkas ke wati pet o mátá záh o dwá bedant, báyad ent koshag bebit.#15:4 Darraw 20:12; 21:17. 5Bale shomá gwashét: ‘Agan kasé wati pet yá mátá begwashit: “Hamá komakk ke man báyad ent shomárá bedátén, á man Hodáay ráhá korbánig kortag,” 6nun zalurat naent á wati pet o mátá sharap bedant.’ Shomá pa wati dód o rahbandáni dáragá Hodáay habará próshét. 7Oo doru o dopóstén mardomán! Eshayá nabiá cha Hodáay némagá shomay bárawá sharr gwashtag: 8É mardom dapá maná satá dayant, bale delesh cha man báz dur ent. 9Á moptá maná parastesha kanant o mardománi jórhéntagén ráh o rahbandán sója dayant.”#15:9 Eshayá Nabiay Ketáb 29:13.

10Issáyá mardom wati kerrá lóthet o gwashtant: “Gósh bedárét o sarpad bebét. 11Á chizzé ke dapá rawt mardomá nápáka nakant, bale hamá chizz ke cha dapá dara kayt mardomá nápáka kant.” 12Nun morid áiay kerrá átkant o gwashtesh: “Zánay ke tai é habarán Parisi tawréntagant?” 13Issáyá passaw dát: “Har nehálé#15:13 Nehál, bezán nók keshtagén drachk. ke mani ásmáni Petá nakeshtag, allamá gwajaga bit. 14Shomá áyán bay makanét, á kóráni kórén rahshón ant, wahdé yakk kóré domi kórá ráhá shóna dant gorhá doén chátá kapant.”

15Petrosá gwasht: “É mesálay mánáyá márá sarpad kan.” 16Issáyá gwasht: “Shomá angat haminkadar násarpad ét? 17Nazánét harché ke dapá rawt, lápá mána bit o padá cha rótán dara kayt. 18Bale harché ke cha dapá dara kayt, béhá cha delá páda kayt o hamé chizz ensáná nápáka kant. 19Chéá ke badén pegr o hayál, hón o kósh, zená, bénangi, dozzi, drógén sháhedi o kopr, cha delá chesta bant. 20É sajjahén, mardomá nápák o palita kanant, bale agan kasé gón nashoshtagén dastán warag bwárt, sell o nápáka nabit.”

Darkawmén janénéay báwar

(Markás 7:24–30)

21Issáyá á jágah yalah dát o Sur o Saydunay sardhagárá shot. 22Kanháni janéné ke hamóday mardomé at átk o kukkári kort: “Oo Hodáwand, oo Dáud bádsháhay chokk! Tará mani sará bazzag bát. Palitén ruhé mani jenekká sakk ázára dant.” 23Bale Issáyá jwábé nadát. Nun moridán dazbandi kort: “Eshiá yal kan, galléni, may randá kaptag o báz kukkár kanagá ent.” 24Issáyá darráént: “Man bass pa Bani Esráilay gárén méshán ráh dayag butagán.” 25Gorhá janén áiay pádán kapt o gwashti: “Oo Hodáwand! Maná komakk kan.” 26Gwashti: “Cha chokkáni dastá nánay pach gerag o kochekkáni démá dawr dayag sharr naent.”#15:26 Issáay maksad esh naat ke é janén nápák ent. Áiay maksad esh at ke janénay báwar cha Yahudiáni báwará gésh ent. 27Janéná gwasht: “Oo Hodáwand! Bale kochekk wati wáhondáni parzónagay sarárókén naganay thokkorána warant.” 28Gorhá Issáyá áiay passawá gwasht: “Oo bánok! Tai báwar mohr o rédag#15:28 Rédag, bezán mohkam. ent, paméshká hamá dhawl ke taw lóthay anchosha bit.” Hamá damáná áiay jenekk dráh but.

Bázén mardománi drahbakshi

29Issáyá á jágah esht o shot, cha Jalilay mazangwarmay tayábá gwast o yakk kóhéay sará sar kapt o nesht. 30Bázén mardomé áiay kerrá átk, lang, kór, mondh, lell o dega har paymén nádráhesh, Issáay démá áwortant o Issáyá dráh kortant. 31Wahdé mardomán dist ke gong habar kanagá ant, mondh dráh bayagá ant, lang tarragá ant o kór gendagá ant, gorhá Esráili hayrán butant o wati Hodáesh satá o saná kort.

Chár hazár mardomá warák dayag

(Markás 8:1–10)

32Issáyá wati morid lóthet o gwashtant: “Maná é mardománi sará bazzaga bit, say róch ent mani kerrá ant o nun pa waragá hecchesh nést. Gón shodigén lápá eshán roksat kanaga nalóthán, chó mabit ke ráhá betosant o bekapant.” 33Moridán darráént: “É barr o gyábáná pa inchok mardomay waráká, nán cha kojá byárén?” 34Gorhá Issáyá cha moridán jost kort: “Shomárá chont nán gón?” Gwashtesh: “Hapt nán o lahtén hordén máhig.” 35Áiá mardom zeminay sará nendagay hokm dátant. 36Gorhá haptén nán o máhigi zortant, Hodáay shogri gept, náni chondh chondh kort o moridáni dastá dátant o moridán mardománi sará bahr kortant. 37Sajjahénán sérá wárt o randá cha sar átkagén nánáni chondhán, moridán hapt lach#15:37 Lach, bezán mazanén sapté ke bári mána kanant o har yá oshterá laddhanti. porr kort. 38Chár hazár mardéná warák wárt, áyán janén o chokk ham gón at. 39Mardománi roksat kanagá rand, Issá bójigá nesht o Magadanay sardhagárá shot.

Currently Selected:

Mattá 15: HPKB

Highlight

Copy