Yuhanná 9
9
Pédáeshi kóréay drahbakshi
1Wahdé Issá ráhéá rawagá at, pédáeshi kóré#9:1 Pédáeshi kór, bezán mádarzádén kór. disti. 2Moridán cha áiá jost kort: “Oo ostád! É mard chéá cha pédáeshá kór ent? Wat gonahkár ent yá eshiay pet o mát?” 3Issáyá passaw dát: “Na eshiay jend gonahkár ent, na pet o mát. Paméshká é dhawlá but ke Hodáay kár cha eshiá záher bebit. 4Tánke róch ent, báyad ent má mani dém dayókay kárán sarjam bekanén, shap ke bit gorhá kass kár korta nakant. 5Man, tánke jaháná án, jahánay rozhn án.” 6É habará o rand, zeminá tokki jat#9:6 Tokk janag, bezán toh janag. o cha lebzá geli addh kort, kóray chammán peri mosht o 7gwashti: “Beraw, wati chammán Shilwáhay hawzá beshód.” (Shilwáhay máná “dém dátagén” ent.) Gorhá á shot, chammi shoshtant, biná but o átk.
8Randá, hamsáheg o é dega mardom ke á mardesh cha pendhógeriay róchán pajjáha áwort, gwashagá laggetant: “É hamá naent ke neshtagat o pendhagá at?” 9Lahténá gwasht: “Hamá ent.” Dega lahténá gwasht: “Enna, áiay hamrang ent.” Á wat gwashagá at: “Man hamá mardom án.” 10Jostesh kort: “Gorhá tai chamm chón rozhná butant?” 11Gwashti: “Hamá mard ke námi Issá ent, áiá gel tarr kort, mani chammán per mosht o gwashti ke Shilwáhay hawzá beraw o chammán beshód. Man shotán o chamm shoshtant o nun gendagá án.” 12Gwashtesh: “Á mard kojá ent?” Gwashti: “Mana nazánán.”
Pédáeshi kór o Parisiáni jost o pors
13Hamá mard ke pésará kór at, Parisiáni kerrá bortesh. 14Shabbatay róch at ke Issáyá gel addh kortagat o áiay chamm rozhná kortagatant. 15Nun Parisián ham cha áiá jost kort: “Taw chón biná butay?” Mardá gwasht: “Áiá mani chamm gel per moshtant, man shoshtant o nun gendagá án.” 16Lahtén Parisiá gwasht: “É mard cha Hodáay némagá nayátkag, parchá ke Shabbatay rahbanday sará kára nakant.” Dega lahténá gwasht: “Gonahkárén mardomé chón é dhawlén mójezah pésh dáshta kant?” Áyán gón yakdegará tepák nakort. 17Cha hamá mardá ke pésará kór at padá jostesh kort: “Tai jend é mardomay bárawá ché gwashit? É tai chamm atant ke áiá rozhná kortant.” Gwashti: “Nabié.”
18Tánke marday pet o mátesh nalótháéntant, Yahudián báwar nabut ke é mard kór butag o nun gendagá ent. 19Cha pet o mátá jostesh kort: “É mard shomay chokk ent, hamé ke shomá gwashét pédáeshi kóré butag? Gorhá nun chóna gendit?” 20Pet o mátá gwasht: “Má zánén ke may chokk ent o cha pédáeshá kóré butag. 21Bale nazánén nun chóna gendit o eshiay chamm kayá rozhná kortagant. Cha eshiay jendá jost begerét, rostag o mazan ent, wati habará wata kant.” 22Áiay pet o mátá cha Yahudián torset, paméshká é dhawlá passawesh dát. Yahudián cha pésará shawr kortagat ke harkas báwar bekant o begwashit ke Issá, Masih ent, áiá cha kanisahá dara kanén. 23Paméshká á marday pet o mátá gwasht ke cha áiay jendá jost begerét, á wat rostag o mazan ent.
24Á mard ke pésará kór at, domi randá padá lótháént o gwashtesh: “Hodáay sawgendá bwar ke taw rásta gwashay, má zánén ke é mard gonahkáré.” 25Gwashti: “É mard gonahkáré yá na, mana nazánán, bale yakk chizzé zánán, man kór butagán o nun gendagá án.” 26Jostesh kort: “Gón taw ché korti? Chón tai chammi rozhná kortant?” 27Passawi dát: “Man pésará gón shomá gwasht, shomá gósh nadásht, parchá lóthét padá beshkonét? Záná, shomá ham lóthét áiay morid bebét?” 28Gorhá á biná butagén mardesh záh dát o gwashtesh: “Taw wat áiay morid ay, má Mussáay morid én. 29Má zánén ke Hodáyá gón Mussáyá habar kortag, bale nazánén ke é mard kay ent o cha kojá átkag.” 30Mardá gwasht: “É ajabén habaré. Áiá mani chamm rozhná kortagant o shomá nazánét ke cha kojá átkag. 31Máshomá zánén ke Hodá gonahkáráni dwáyá gósha nadárit, hamáiay dwáyá gósha dárit ke Hodátorsé o Hodáay wáhagáni sará kára kant. 32Cha azalá kassá hechbar naeshkotag ke yakkéá pédáeshi kóré biná kortag. 33Agan é mard cha Hodáay némagá mayátkén, natwánti hecch choshén káré bekant.” 34Gwashtesh: “Taw wat sará tán pádán gonáhay chokk ay o márá tálima dayay?” Gorhá á mardesh gallént.
Kórdeli
35Wahdé Issáyá eshkot ke biná butagén mardesh galléntag, á mardi dar gétk o gwashti: “Tará Ensánay Chokkay sará imán hast?” 36Mardá gwasht: “Oo wájah! Ensánay Chokk kay ent? Kai sará imán byárán?” 37Issáyá gwasht: “Taw á distag. Hamesh ent ke gón taw habar kanagá ent.” 38Gwashti: “Oo Hodáwand! Imánon áwort” o Issáay pádán kapt. 39Gorhá Issáyá gwasht: “Man pa dádrasi kanagá é donyáyá átkagán, tánke kór biná bebant o biná kór.” 40Cha Parisián lahtén áiay kerrá óshtátagat. É gappesh eshkot o gwashtesh: “Záná má kór én?” 41Issáyá gwasht: “Agan kór buténét shomárá gonáh o mayáré per néstat, bale paméshká shomay mayárbária mánit ke gwashét: ‘Má biná én.’”
Currently Selected:
Yuhanná 9: HPKB
Highlight
Share
Copy
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.
