Yuhanná 10
10
Nékén shepánk
1“Shomárá rásténa gwashán, agan kasé cha pasáni gwáshay#10:1 Gwásh, bezán wárh. dapá mapoterit o cha dega némagé sar bekapit, bezán dozz o rahzané#10:1 Rahzan, bezán hamá dozz ke ráhá bandit o mardomána polit, ráhzan.. 2Bale á kas ke cha gwáshay dapá poterit, pasáni shepánk ent. 3Darwázagpán, gwáshay dapá pa áiá pacha kant o pas shepánkay tawáray némagá delgósha bant. Á wati jenday pasán pa nám tawára jant o áyán dhanná bárt. 4Wati sajjahén pasáni dhanná baragá rand, wat pésara bit o pas áiay randá góna bant, chéá ke áiay tawárá pajjáha kárant. 5Pas darámadéay randá nakapant, cha áiá tachant, chéá ke darámaday tawárá pajjáha nayárant.” 6Issáyá é mesál áwort, bale mardom sarpad nabutant ke á ché gwashagá ent.
7Gorhá padá gwashti: “Shomárá rásténa gwashán, man pasáni gwáshay dap o darwázag án. 8Á sajjahén ke cha man o pésar átkant dozz o rahzan atant#10:8 Issáay maksad hamá dagábázén sarók atant ke mardomán gomráha kanant. o pasán áyáni tawár gósh nadásht. 9Darwázag man án, harkas ke cha mani ráhá begwazit, rakkit#10:9 Rakkag, bezán neját rasag, bacchag.. Tahá kayt yá dhanná rawt, charágáhéá#10:9 Charágáh, bezán dalwatáni charagay jágah, charágjáh, charág. sara bit. 10Dozza kayt ke dozzi bekant, bekoshit o tabáh bekant. Man átkagán ke mardomán zendé berasit, alkáp o sháegánén zendé.
11Nékén shepánk man án. Nékén shepánk wati sáhá pa pasán nadra kant. 12Bale kasé ke pa mozz kára kant, pasáni wáhond naent. Wahdé gendit ke gork dém pa pasán pédák ent, áyán yalaha kant o tachit. Gorhá gork pasáni sará hamlah o orosha#10:12 Orosh, bezán hamlah. kant o áyán sheng o shánga kant. 13Mozzurén shepánka tachit, chéá ke á pa mozz kára kant, pasáni hayáldáriá nakant.
14Nékén shepánk man án, man wati pasána zánán o á ham maná zánant, 15hamá dhawlá ke Pet maná zánt o man Petá zánán. Man wati sáhá pa pasán nadra kanán. 16Maná dega pas ham hast ke cha é ramagá naant.#10:16 Asligén Yunáni nebeshtánka gwashit: “cha é gwáshá naant”. Báyad ent áyán ham byárán. Á mani tawárá delgósha kanant. Nun ramag yakké bit o shepánk yakké bit. 17Pet maná dósta dárit, chéá ke man wati sáhá nadra kanán ke padá wati zenday wáhond bebán. 18Kass mani sáhá cha man pach gepta nakant, man gón wati jenday wáhagá wati sáhá nadra kanán. Maná wati sáhay dayagay ehtiár hastent o padá áiay dastá áragay ehtiár ham hastent. É kár Petá maná parmátag.”
19É habaráni sará padá Yahudiáni nyámá nátepáki kapt. 20Bázénéá gwasht: “Áiá jenné per, ganóké, chéá áiay habarán gósha dárét?” 21Á degarán gwasht: “Kaséá ke jenné per bebit, é dhawlén habar korta nakant. Jenn kórán biná korta kant?”
Yahudi Issáyá namannant
22Nun Urshalimá, Mazanén Parasteshgáhay Shosht o Shód o Wapkay#10:22 Wapk, bezán chizzé ke pa Hodáyá gisshénag butag. Arabi o Pársiá “waqf”. Aid but. Zemestán at. 23Issáyá mazanén parasteshgáhá, Solaymánay aywáná kadam janagá at. 24Yahudi áiay chapp o chágerdá mocch butant, gwashtesh: “Tán kadén márá é dhawlá shakkay tahá dáray? Agan taw Masih ay, rást o pakká begwash.” 25Issáyá gwasht: “Man wa shomárá gwashtag, bale shomá báwara nakanét. Á kárán ke man cha Petay némagá kanagá án, wat pa man gwáhia dayant. 26Bale shomá báwara nakanét chéá ke mani pas naét. 27Mani pas mani tawárá gósha dárant, man áyán jáha kárán o á mani randgiriá kanant. 28Man áyán abadmánén zenda bakshán o á hechbara namerant. Kass áyán cha man pach gepta nakant. 29Mani Petá ke é pas maná dátagant, cha sajjahénán master ent o hechkas eshán cha mani Petay dastá pach gepta nakant. 30Man o Pet yakk én.”
31Yahudián yakk baré padá seng o dhók chet ke áiá sengsár bekanant. 32Issáyá gón áyán gwasht: “Man cha Petay némagá bázén nékén káré kortag o shomárá pésh dáshtag. Pa kojám kárá maná sengsára kanét?” 33Yahudián darráént: “Pa nékén káréá tará sengsára nakanén, pa tai koprán é kárá kanén. Taw baniádamé ay, bale gwashay ke man Hodá án.” 34Issáyá gwasht: “Shomay Sharyatá é paymá nebisag nabutag: Mane Hodá gwashán ke shomá hodá ét#10:34 Zabur 82:6. É habaray máná esh ent ke Hodái shawr borragay ehtiár mardomán dayag butag.? 35Agan á mardom ke Hodáay habar áyáni kerrá sar butag, ‘hodá’ gwashag butagant o má zánén ke Hodáay Pákén Ketáb hechbara nakapit o nákára nabit, 36gorhá shomá hamá mardomay sará chón kopray bohtámá#10:36 Bohtám, bezán tohmat. janét ke Petá á gechén kortag o é jaháná rawán dátag? Á ham tahná pa é habará ke man gwashtag: ‘Hodáay Chokk án.’ 37Agan man wati Petay kárán makanán, mani sará imán mayárét. 38Bale agan Petay kárána kanán, toré mani sará imána nayárét, mani káráni sará imán byárét, tánke shomá sarpad bebét o bezánét ke Pet mani del o daruná ent o man Petay del o daruná án.” 39Gorhá áyán padá lóthet ke Issáyá dazgir bekanant, bale Issá cha áyáni dazrasá dur but.
40Randá Issá cha Ordonay kawrá gwast o hamá jágahá shot o dáshti ke pésará Yahyáyá ódá pákshódi dátagat. 41Bázén mardomé áiay kerrá átk. Watmánwatá gwashagá atant: “Yahyáyá hecch mójezah o ajabbatén nesháni pésh nadásht, bale é marday bárawá har chizzé ke gwashtagi, rást ent.” 42Ódá bázén mardoméá Issáay sará imán áwort.
Currently Selected:
Yuhanná 10: HPKB
Highlight
Share
Copy
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.
