Piiligu 43

Yisifu beya mari Benjamin pori n gaa Yijipiti

1Kom maa daa n na ba kpeeŋu yi paaligu maa niŋi, 2ba n daa n di ba chiseesi ba n daa n da n yi Yijipiti la baasi, ba ba yeli ba, “Ya lee n gaa n wa ti da bindira beela ti ti ti.”

3Juuda yeli u, “Daba maa kpaasi ti tubiri ga, ‘Ya ki lee n nye m nufuaa see, ama ya ni ya mabii maa n ta.’ 4Ka e ni ti ti mabiiaa pa ti zu wune, ti ni lee n wa ti da bindira ti ti i. 5Ama, ka e yi ki sagi wune, ti ki gaari, a kpali, daba maa yeli ti, ni, ti ki lee n nye o nufusee, ka ti ni ti mabii maa bi na.”

6Yakubu boosi ba, “Bo n na ya yeli daba maa ni ya mabii na ba niŋi, a taasi ma garidama ŋa?”

7Ba yeli u, “Daba maa boosi ti ni boosa, maa o n baŋŋi ti ni ti laanta zaa yela. ‘Ya ba na ba niŋi? Ya na kpari n mari mabiya?’ Ti sagi. Wula n na ti ya n niŋi n baŋŋi, o ya n yeli, ya mari u paasi n ta?”

8Juuda yeli o ba Yakubu, “Naa bii maa pobi m nuusi, ti gaa pimparaŋa, ka ti nini, a ni ti biisi da kpi ni kom. 9M gbagba ni za n ti o nyevuri moligirisim. Naag o tarijugu ziili ma. Ka m yi bi mari u ti ti i, ni alaanfiya, o tarijugu, o pa ma, m nyevuri puu zaa. 10Seema o n be ŋa, ka ti di bi nagimi, ti di gaaya, ka pori n ta buyi daana.”

11Ba ba Yakubu yeli ba, “Ka lala wune n na, ya niŋi n ŋa, ya naa tiŋgbaŋaa binseesi wa ti pi u piini: kpasarigira beela, sikpaam beela, a ni binseesi n tira ziiri ŋusuma, tulalesi, a ni tiwalibiseesi n meesa. 12Ya naa ligiri tulumbuyaayi zu, ya wa ti yo seesi n daa n ba ya bowatesi puusi la. Saŋa, ba daa n naag a ni niŋi, ka bi baŋŋi. 13Ya mari ya mabii maa paasi n gaa yoom. 14Naawunni kpeeŋu zaa daana, o zo ya nimbaa yi daba maa saani. O ti ya mari ya mabii maa ni Benjamin zaa pori n ta. Ama, ma wune yi bi lee n nye ba gba, wune n na la.”

15A zu, dabsi maa naa ba piinisi ni ligiri tulumbuyaayi, ka mari Benjamin gba paasi, ba niŋi yi n gaa Yijipiti, wa ti naa ba maŋŋa we Yisifu saani.

16Jemanso Yisifu n nye ba ni Benjamin la, o yeli o nachiima, “Mari niribaa gaari m laanta, ka korigi buŋkoowa, ba niŋi bindira, m ni ba n ya n di wuntooŋaa.”

17Daba maa niŋi bunso zaa Yisifu ni yeli u la, o mari niriba maa gaa Yisifu laanta. 18Dabeem daa n gbaani niriba maa, ba n mari ba gaari o laanta la. Ba feni maa, “Ba mari ti ni ta kpe kpali ti ligiri la n daa n ba ti bowatesi puusi la zu. O ya n zabini nyaŋŋi ti, ka naa ti loobi o gurunsi, a naa ti buŋsaa paasi.” 19Ba wa ti togsi Yisifu nachiima maa saani, a yi laanta maa voori noori. 20Ba yeli u, “Gaafira, ti n daa n ta kpe ti da bindira piiligu la, 21soori puu seela n na, yiiŋu zibi ti, ti zaa lerigi ti bowatesi, ka nye ti ligiri n ba ti bowatesi naŋgbana niŋi, seema gbagba ti n da. A zu, ti mari a pori n ta. 22Ka ti na mari ligiri paasi n ta, ti ti daa bindira. Ti bi baŋŋi niso n naa ti ligiri pori n niŋi ti bowatesi niŋi.” 23O yeli ba, “A zaa veela, ya da zora dabeem, ya Naawunni, ya ba Naawunni n ti ya ligiri yi ya bowatesi niŋi, ma wune dee ya ligiri.” Niŋi n na, o mari Simiyon ti paasi ba niŋi.

24Niŋi n na, nachiima la mari ba kpe Yisifu dii, ka ti ba koom ba pegi ba noba, ka lee n ti ba buŋsi bindira. 25Ba wumiya maa nisaaniŋi n na ba ya n di wuntooŋu maa. A zu, ba niŋi ba piinisi siriya gutira Yisifu, o ta.

26Jemanso Yisifu n ta yiri, ba naa ba piiniseesi ba n ma n ta la ti u, ka gba u tiŋŋa, ka zulisi ba zuuri. 27O boosi ba alaanfiya yela, ka boosi ba, “Ya ba, dakuriso yela ya n daa n yeli ma la, ba wula? O na ba o nyevuri niŋi?”

28Ba yeli u, “E guruŋu, ti ba, na ba niŋi ni alaanfiya.” Ka ba gba u tiŋŋa jilimatiri. 29O nyaasi ba poli n jili n ti nye o sunzo Benjamin, o ma bii gbagba, o boosi, “Ya sunzo so yela ya n yeli ma la n ŋa?” Ka yeli, “Naawunni nimbaa nuu o pa e niŋi, m biya.” 30Kumsi gbaag u yi o beya maa sunsuuniŋi, o nyisigi yoom yi n kpabira seela o n di n wa ti kumi. O kpe n gaari o dikpaari wa ti kumi.

31A nyaaŋa, o pegi o nufu, ka yi laanta, a gbaag o maŋŋa, ka yeli, “Ya tori bindira la.” 32Ba ti u o toori, o ziizii kuri, ka ti o beya la gba, ba ziizii kuri, ka Yijipiti dimseesi o ni ba n dira la gba, ziizii kuri, a kpali Yijipiti dima ni Hiburu dima bi lagimi n dira, Yijipiti dima chisirini lala. 33Ba daa n ti ni o beya maa zi n pa taaba zu, kpemba kpemba, o yiya, ba nyaasi taaba ni naŋgbaŋkuubu. 34Ba ti ba bindira yi Yisifu teebul niŋi, Benjamin toori daa n gaa ba zaa toya tulum bunu zu. Ba nunu di, ka ŋu n kuuli.

Currently Selected:

Piiligu 43: hag

Highlight

Copy