Piiligu 44

Ba naa Yisifu gbiti kobee niŋi bowate puwa

1Niŋi n na, Yisifu yeli o laanta nachiinsi kpeema n ŋa, “Niŋi bindira niŋi niribaa bowatesi a puwa, a paali seema ba n di n tee n zi, ka e pori so zaa ligiri niŋi o bowate niŋi. 2Ka naa m gbiti kobee la, a ni ligiseesi ba sunzobila la n di n ya n naa da bindira maa paasi n niŋi o bindira bowate maa puwa.” Niŋi n na, nachiima maa niŋi seema Yisifu n yeli u maa.

3Bee n daa n ti chee, bogufiili, o beya maa niŋi ba buŋsi siriya, a gbaa yiri soori. 4Ba n daa n yi tiŋkarigu maa wara, ba daa n na bi paa wogila, ka Yisifu yeli o nachiinsi kpeema maa n ŋa, “Zo yomyom kari niriba la bobiri. Ka e paa ba, e boosi ba, ‘Wula n na ya naa yabeeri yoora yasuma samini? 5Wula n na ya zu m yidaana gbiti kobee? Wune n na o ma n ŋuura bini, ka lee n naag u baŋina soosizu yela. Ya niŋi yabee ga.’”

6Nachiinsi kpeema maa n wa ti paa ba, o yeli ba seema gbagba o yidaana n yeli u la. 7Niŋi n na, ba yeli u, “Bo n na e yeli ti lala? Ti niŋini e gurunsi, ti ki sagi n niŋi lala! 8Ti n daa we ti paa ti yiri, ka nye ti ligiri, ti daa n bi lee n pori a yi Keenan zaa ti ti ya? Ka wula zu n na ti ya n zu e yidaana gbiti koo suga, a yi o yiri? 9Ka e yi nye u yi ti yindaana zaa saani, kum n na a daana ni kpi, ka ti seesi n che la, ti mi loobi m yidaana daaba.”

10O yeli ba, “M wumiya. Ama ya so saani ti n nye kobeegaa ko ni loobi m daabiri, ka ya seesi n che la, ya nye ya zu.” 11A zu, ba zaa lerigi ba bowatesi yi ba buŋsi niŋi yoom zaali tiŋŋa, ka lerigi a noya. 12Yisifu nachiinsi kpeema maa yuligira ba ziiri puusi nyaasira, ba kpeema daana ziiri niŋi n na o piili yuligi, o yuligi lala a ti paa bibila daana, Benjamin. O bowate puu n na o nye gbiti kobee maa. 13O beya maa darigi ba bimpinna kasigi, a kpali sufusaaŋu zu, ka ba lee n le ba ziirisi maa pa ba buŋsi niŋi, a pori n gaa tiŋŋa maa puwa.

14Juuda ni o sunzoba maa n daa n pori n we tiŋŋa maa puwa, ba we Yisifu yiri, a wa ti do u tiŋŋa. 15Yisifu boosi ba, “Bo n na ya niŋi seema? Ya bi baŋŋi maa, ka nira ba maa seema ni be ŋa, o ni tee n baŋŋi yaseesi n sogi?”

16Niŋi n na, Juuda yeli, “Pimparaŋa, bo n na ti lee n mari ti yeli i, ti yidaana? Wula ti lee n ya n yeli, a wusi maa ti bi naa kobee maa? Naawunni yuligi ti gbinni, ti yabee yi paaligu, ti zaa ni loobi e daaba, pa so saani e ni nye gbiti kobee maa ko.”

17Yisifu yeli ba, “Akai! M ki niŋi lala. So saani ba n nye kobee la yi o ziiri niŋi maa ko n ni loobi m daabiri. Yaseesi n che la, ya pori n kunna ya ba saani, a ni niŋgbirimaasim.”

Juuda suusi Yisifu Benjamin

18Niŋi n na, Juuda we o saani, a wa ti yeli u n ŋa, “M yidaana, jaande, cheli e daabiri togsi yaluŋko ti i. Da ti e suuri nyisigi, m baŋŋi e ni Yijipiti naaba zaa n sagi. 19Nyini n daa n boosi ti, ni ti mari ba ni sunzo? 20Ti sagi, Mm, ti mariya, ti ba kpe kpebilim niŋi, ka dogi biduwa o kurigirisim jemani. Bii maa beeri kpiya, o ko n che o ma biya, ka o ba kpabira u ga. 21Niŋi n na, e daa n yeli ti, ni ti mari u ta, e nye u. 22Ti mi daa n yeli i, bii maa ki tee n larimi o ba. Ka o yi larimi o ba, o ba maa ni kpi. 23Ama, e daa n yeli ti, ni, ka ti bi mari ti sunzo maa ta e saani, ti nini nimbiisi ki lee n niŋi anaasi. 24Ti n daa n pori n gaari ti ba, e daabiri, saani, ti yeli u seema zaa e n yeli. 25Niŋi n na, ti ba yeli ti, ya pori n wa ti da bindira ta. 26Ti yeli u, ‘Ti ki tee n gaa. Ka e bi ti ti sunzobilaa pa ti zu, ti ki nye daba maa nufu see. 27Ti ba yeli ti, ya baŋiya maa, m poga Rachel dogini biduusi bayi ko. 28Luŋko lee n ka m saani, a ko moo puu buŋ n gbaag u. O n yi zaa, m bi lee n nye u. 29Ka ya lee n nyisi ŋa la mi yi m saani, ka garidama wa ti paa soori, sufusaaŋu ni ku ma, m kurigirisim niŋi.

30-31“A zu, m yidaana, ka m ko pori n gaa m ba saani, ka biyaa bi pobi m nuusi, m ba ni kpi, a kpali bo, o nyevuri zaa bani bii maa niŋi. O n kurigi ga la zu, sufusaaŋu ni ku u.

32“M yidaana, poin ka ti ta kpe, mani, e daabiri, daa n naani m nyevuri pa tarima, biyaa zu, a yi m ba saani, maa ka biyaa yi bi lee n pori n ta, m ni zi o tarijugu, m beebu niŋi zaa. 33A zu, jaande, cheli m dee bii maa noba, a ba kpe, a loobi e daabiri, ka bii maa o paa o beya ŋa pori n kunna. 34A kpali bo? Wula ma ya n pori n gaa m ba saani, ka che biyaa? M ki n ti n ŋa sufusaaŋu kpe m ba niŋi.”

Currently Selected:

Piiligu 44: hag

Highlight

Copy