Piiligu 41

Yisifu wusi Yijipiti paaligu naaba zaasima gbina

1Yuma ayi nyaaŋa, Yijipiti paaligu naaba maa zaasi zaasim, ni o n za Naayel mogiri naŋgbanni. 2Nagikara ayapoin n karigi n nyelisira yi mogiri maa puwa du n za, a ŋobira mogiri maa naŋgban moori. 3A nyaaŋa, nagikogiri ayapoin n kogi n dagi gba yi mogiri maa puu du n ti za n begi ŋarima la. 4Nagiseesi n kogi la naa nagiseesi n karigi n nyelisira la vali. Niŋi n na, naaba maa yirimi n yoo.

5O lee n gbisira, ka zaasi, chi zu karasuma ayapoin n tomi gbinluŋko niŋi. 6A nyaaŋa, chi zu nyogirinyogirisi ayapoin, seesi wuluŋpusigu sauwa n pemsi n kuu gba yi. 7Bin nyogirinyogirisi la naa bunsuma ayapoin la vali. Naaba maa lee n yirimi n yoo, ka zaasim n na.

8A boguuniŋi, sufusaaŋu gbaa u ga, o tumi n booli Yijipiti yambaŋiniba ni dibodibo niŋiniba. Naaba maa poli o zaasima maa wusi ba, ama, ba yindaana zaa bi baŋŋi a gbina yeli u.

9Niŋi n na, naaba maa buŋŋuura nyaasira kpeema la yeli u, “Zinni, m teesi seema ni bi niŋi n nene. 10Dindaso, e n daa n je suuri niŋi m ni niso n niŋina e paanu, ka naa ti wa ti yo dii, a yi soojasi kpeema so n nyaasira i la laanta la. 11Ti bayi maa zaa zaasi zaasima yiiŋluŋko, ka a mari gbina, a kuri. 12Hiburu bipolli yindaana daa n paasi ti niŋi, ka niŋi soojasi kpeema la guruŋu. Ti poli ti zaasima maa wusi u, o wusi ti so zaa o zaasim gbinni. 13Yela maa niŋi seema gbagba o n wusi ti a gbina maa, ba mari ma pori n ta m tuma niŋi, ka yagili m to maa daana o kpi.”

14A zu, naaba maa tumi, ni ba wa ti mari Yisifu ta, noba maa niŋi. Ba wa ti nyisi Yisifu yi diyoorigu maa puwa. Yisifu puni o zu, ka cherigi o bimpinna, ka ta naaba maa saani.

15Naaba maa yeli Yisifu, “M zaasini m zaasim, nira zaa mi bi baŋŋi o gbinni. Ama m wumiya maa, ka e n si n wumi zaasim, e ni baŋŋi o gbinni.”

16Yisifu yeli naaba maa, “M ki tee n wusi o gbinni, ama Naawunni n ni tee n wusi i o gbinni.”

17Niŋi n na, naaba maa yeli Yisifu, “M zaasini, m ni za Naayel mogiri naŋgbanni, 18ka nye nagikarisuma ayapoin n yi koom maa puu du n za n ŋobira moo. 19A nyaaŋa, nagikogiri dagiri ayapoin gba yi. M na bi nye lala nagikogiri taaba zaa yi Yijipiti paaligaa. 20Binkogiri maa naa binkara ayapoin n veela la vali, seesi n piili n yi la. 21Ama, a zaa nyaaŋa, nira zaa n ki baŋŋi maa a vali sen, a na si n kogini dagi seema a n kuri n be maa, ka ma yirimi n yoo.

22“M lee n zaasi n nye chi zuuri ayapoin n bi, a veela ga, ka tomi chi gbinluŋko niŋi. 23A nyaaŋa, chi zu nyogirinyogiriseesi wuluŋpusigu sauwa n pemsi a kuu gba yi. 24Chi nyogirinyogirisi maa naa binsuma la vali. Ma poli a wusi dibodibo niŋiniba, ba yindaana zaa bi tee n yeli ma, a gbina.”

25Niŋi n na, Yisifu yeli naaba maa, “E zaasima maa zaa gbina niŋini luŋko, Naawunni nyisini wusi i bunso o n ya n niŋi.

26“Nagisuma ayapoin la niŋini yuma ayapoin, ka chi zusuma ayapoin la mi niŋi yuma ayapoin, a gbina niŋini luŋko. 27Nagikogiri ayapoin, dagseesi n lee n yi la niŋini yuma ayapoin, lala n niŋi chi nyogirinyogirisi ayapoin seesi sauwa n yi sagbinni ti pemsi a kuu la gba. A niŋini kom yuma ayapoin. 28“A si n niŋini maa seema ni yeli i la, naaba. Naawunni wusi i ni seema o n ya n niŋi.

29“Yuma ayapoin, bindira ni niŋi ga, a yi Yijipiti paaligaa. 30Yuma ayapoin nyaaŋa mini n lee n niŋi kom yuma, ya tami Yijipiti yuma ayapoin bindirigbaliŋu la yela. Kom maa ni saami Yijipiti paaligu zaa. 31Ba ni tami bindirigbaliŋu maa zaa yela, a kpali kom, so n ya n ta maa, ni niŋi aligaaya. 32Bunso zu e n zaasi u buyi zu n niŋi, Naawunni niŋini siriya maa, a niŋi. A ki yuu, Naawunni ni ti lala niŋi.

33“Pimparaŋa, naaba, kpabi nivuso n mari yam, a baŋŋi yela, a naa Yijipiti tiŋgbaŋŋu, a pobi o nuusi. 34Kpabi tumtuminiba niŋi Yijipiti tiŋgbaŋŋu maa niŋi, ba deegira yuma ayapoin bindira seesi n ya n niŋi ga la, bunu zu zaa luŋko. 35Ba deegira bindira maa yumsuma seesi n chena ŋa, a zaali a nyini naaba kpeeŋu niŋi. Ba zaali a tiŋkarigu zaa puwa. 36Bindira ŋa, ba deeg a, a zaali n guri paaligaa, ti ti naag a paasi ti niŋi, a yi kom yuma seesi n chena Yijipiti la niŋi. Lala jemani, kom maa ki muri paaligaa.”

Ba naa Yisifu loobi Yijipiti paaligu zaa kpeema

37Yaseesi Yisifu n daa yeli maa daa peri naaba maa ni o kpemba zaa. 38Naaba maa boosi ba, “Ti ni tee n nye nira maa dabaa, seema Naawunni sii n paali o niŋaa?”

39Niŋi n na, naaba maa yeli Yisifu, “Seema Naawunni ni nyisi o yela zaa gbina wusi i ŋa, nira zaa ka niŋi, a baŋŋi Naawunni yela lala. 40A zu, m ni naag i loobi kpeema, e kpebilim o pa m zu, e nyaasira m yiri bunso zaa, a ni m niriba. M niriba zaa ni wumi n tiri i, m naalim ko n ya n pa i yiya.” 41Ka o lee n yeli Yisifu, “M naa Yijipiti paaligaa zaa kpebilim pobi e nuusi.” 42Niŋi n na, naaba maa nyisi o naalim beŋŋu yi o nuwa, a niŋi Yisifu nuwa. Ka pili u bimpinsuma, ka naa suga jaagba niŋi o nuŋgori. 43Ka o ti ba naa Yisifu ziili binduurigusi turuku niŋi, a wusi maa so n pa o zu, ka ti niso n gutira u pa yiya, a tasi n yetira, ya ti soori, ya ti soori. Lala o daa n niŋi, a naa Yisifu loobi Yijipiti zaa kpeema. 44Ka naaba maa daa n lee n yeli Yisifu, “Mani n niŋi Yijipiti paaligu zaa naaba, nira zaa ki tee n niŋi sen Yijipiti paaligaa zaa, ka e bi ti a daana soori.” 45Niŋi n na, naaba maa ti Yisifu Yijipiti yuuri, Zafenati-Paniiya, ka lee n ti u poga, Asenati, o ba n niŋi Potifera, so n niŋi Oon tindaana. Ka Yisifu daa n chaŋŋi n kaa Yijipiti paaligu zaa.

46Yisifu daa n niŋini yuma pisita, ka kpe naaba maa tuma niŋi, a yi Yijipiti paaligu, ka chaŋŋi n kaa Yijipiti paaligu zaa la. 47Yuma ayapoin, bindira daa n niŋi ga. 48Lala yuma maa, Yisifu daa laŋsini bindira maa zaali tiŋkara maa niŋi. Tiŋkarigu zaa puuri niŋi n na, o daa laŋsini bindira maa zaali. 49Bindira maa Yisifu n daa n laŋsira maa daa n ti niŋi zoogirisim, o daa n cheli a kaaligu, a daa n zooya ga, a maa teeku tambisigu.

50Poin, ka kom maa daa n ti li, ka Yisifu ni o poga Asenati daa n dogini biduusi bayi. 51Yisifu daa n digili o bikpeema maa yuuri Manaasi, ka yeli, “Naawunni ti ma tami nam la zaa, a ni m ba laanta niriba zaa yela.” 52Yuso o n daa n lee n digili biisi bayi daana maa n niŋi, Efirem, ka yeli, “Naawunni ti ni ma nye dogim, a yi paaliguso ni nye nam.”

53Yuma ayapoin seesi bindira n daa n niŋi ga maa jemani n daa n ti gaari, 54yuma ayapoin kom n daa n ti piili, a maa seema Yisifu ni daa n yeli la. Kom maa daa n ti li paaliguseesi paasi, ama Yijipiti paaligu wune, bindira daa n ba niŋi. 55A n daa n ti wumina Yijipiti dima, a yi kom pelli, ba daa n fobili n ti Yijipiti naaba, o yeli ba, “Ya we Yisifu saani, a wa ti niŋi bunso zaa o n yeli ya niŋi.”

56Kom maa n daa n ti saligi seela zaa, Yisifu yoo o bindira diisi la, a nyisi chi maa koosi n tira Yijipiti dima. 57A kpali kom maa n daa n ba kpeeŋu ga seela zaa zu, niriba daa n yini paaliguseesi gba, daa n ti daara chi maa yi Yisifu saani.

Currently Selected:

Piiligu 41: hag

Highlight

Copy