Piiligu 40

Diyooriba bayi zaasima

1Jemandamta n gaari, niso n yi n tira Yijipiti paaligu naaba buŋŋuura, a ni so n niŋina o paanu n daa niŋi n kpe ba yidaana niŋi. 2Naaba maa je suuri niŋi ba, 3o ti ba yo ba dii, seela gbagba ba n daa yo Yisifu la, a yi nayiri, seela soojasi kpeema n nyaasira naaba maa la n be. 4Soojasi kpeema maa daa naa ba pobi Yisifu nuwa, ni o nyaasira ba.

5Niriba bayi ŋa, Yijipiti naaba n daa ti ba yo ba dii maa, daa n zaasi zaasima, ka zaasima ayi ŋa mi zaa gbina kuri. 6Yisifu nyisigi n we ba saani boguuniŋi, a wa ti nye ba, o baŋŋi ba n mari sufusaaŋu.

7Niŋi n na, o boosi ba, “Bo n mari ya, ya dugi nufusi zinaa lala?” 8Ba yeli u, “Ti si zaasini zaasima, ti mi bi nye nira o wusi ti a gbina.” Yisifu yeli ba, “Zaasima gbina baŋinisim zaa bani Naawunni saani. Ya yeli ma ya zaasima maa.” 9Niŋi n na, buŋŋuura nyaasira kpeema la yeli Yisifu o zaasim. “M zaasim puwa, m nyeni tiso wala ba n ŋmemsi n niŋina daam la n za n yiya. 10Wula ata n ba tii maa niŋi, ka o bosi vaari, a puumi, a wali wala, halli, a moo. 11Lala jemani, ka naaba maa kobee ba m nuusi puwa, ma po tii maa wala ŋmemsi a niŋi kobee la niŋi ti u.”

12Niŋi n na, Yisifu yeli u, “E zaasim maa gbinni n ŋa, tiwula ata la, niŋini dabaata. 13Dabaata sunsuuniŋi, naaba maa ni nyisi i yi diyoorigaa puwa, a we seela e n daa n be, a matira o kobee la. 14Ama, m suusirini, ka yela ti maali n ti i, e teesi m yela, ka e yeli naaba maa o nyisi ma yi diyoorigaa puwa. 15A kpali bo, ba daa n gbaa mani kpeeŋtiri yi Hiburu dima paaligu. M ni lee n ta kpe ŋa gbaa, m bi niŋi yaso n daga ba yo ma dii.”

16Paanu niŋina la ni nye seema Yisifu ni wusi o todaana la zaasim gbinni meesimtiri, o yeli Yisifu, “M gba zaasini zaasim, a nye m ni zi paanusi peeri ata. 17Peso n ba saa la, naaba maa bindira seera baligu baligu ba n naa paanu zum maali, a tomini m zu, ka niinsi ti dira a.”

18Niŋi n na, Yisifu yeli u, “E zaasim maa gbinni n ŋa, peeri ata la niŋini dabaata. 19Dabaata sunsuuniŋi, naaba maa ni ti ba nyisi i yi kpe, a wa ti ti ba ŋma e zu, ka le i yagili tii zu, niinsi, a ti dira i.”

20Dabaata nyaaŋa naaba maa dogim daa n na, o laŋsi o tumtuminiba, ba ti di ba noori. Niŋi n na, o nyisi o kobee matira kpeema, a ni o paanu niŋina kpeema la, a yi diyoorigu puu ta tumtuminiba maa zaa yiya.

21O pori so n daa n nyaasira o buŋŋuura la gaa seela o n daa be, a tumina, o lee n naa naaba maa kobee ni o buŋŋuura tira u. 22Ama, paanu daana la wune, o daa n tini ba ku u yagili tii zu, a maa seema Yisifu n daa yeli u la.

23Yela ŋa zaa nyaaŋa, buŋŋuura nyaasira kpeema la, daa n bi lee n teesi Yisifu yela.

Currently Selected:

Piiligu 40: hag

Highlight

Copy