Piiligu 39

Yisifu ni Potifa poga yela

1Isimeel baligu dima n daa da Yisifu la, ba mari u gaa Yijipiti paaligu, a koosi u ti dabso ba n boona Potifa. Dabaa daa n niŋini Yijipiti paaligu zaa naaba guuriba la kpeema. 2Duuma daa n bani Yisifu saani, o yela wara yiya, o ba o yidaandaba Yijipiti nira maa laanta. 3O yidaandaba nye maa Duuma ba ni o saani, ka bunso zaa o n niŋina, Duuma tira u nyaama.

4Yisifu yela paali o nufu, o naag u zaali wune Potifa zaa ziya, o naag o laanta ni bunso zaa nyem pobi o nuusi. 5Jemanso o n naag o laanta ni o bunso zaa pobi o nuusi la, Duuma nafa Yijipiti nira maa laanta maa zaa, a kpali Yisifu zu. Nafa maa daa n ba ni Potifa bunso zaa niŋi, o laanta ni o pu zaa.

6A zu, o naa bunso zaa o n mari ti Yisifu nyaasira, o n si n ti Yisifu nyaasira a, kpeemaa bi lee n niŋina sen zaa, ama bindira dirisim ko. Yisifu daa n meya nene, ka veela nachiima. 7A n ti paa jemani yinni, o yidaana poga nyaasi u, ka yeli u, “Ti mari ma do.” 8O zagsi, ka yeli u, “Nyaasi, m yidaana bi lee n niŋina bunso zaa yiri a puwa, a kpali bunso zaag o n mari, o naani a zaa pobi m nuusi. 9Nira zaa n bi lee n gaari ma laanta ŋa puwa. Bunso zaa n ka laanta ŋa puwa, ka m yidaana bi naa n pobi m nuwa, ama, e ko, a kpali, o poga n niŋi i. Wula n na ma ya n niŋi yadagaa, ka niŋi yabee kpe Naawunni niŋi.?” 10Bee zaa, o yetirini Yisifu ni o mari u do, o mi zagsi, ka bi kpabira o kpatira u.

11Dindaso, o kpe laanta, o tumi o tuma, ka yiri maa puu gurunsi maa yindaana zaa ka niŋi. 12Poga maa ti gbaa Yisifu tagite, ka yeli u, “Ti mari ma do.” O chee n yi dii maa puwa, ka che tagite maa pobi o nuusi. 13Poga maa n nye seema o n pirigi o tagite basi u, ka yi n chee la, 14o booli o laanta maa gurunsi, a ti yeli ba, “Ya nyaasi, Hiburu biyaa m sira n ma n ta ŋa nyaasira tini jaga, o ya n ti puri ma ni, ma chaari kpeeŋu. 15Jemanso o n wumi ni chaari kpeeŋtiri, a kpabira faara la, o chee n yi, ka che o tagite ŋa basi.”

16O naa tagite maa zaali n guri Yisifu yidaandaba o ta. 17O yeli o sira, “Hiburu bii la e n ma n ta la, ya n ti puri ma ni. 18Ama, ni si n chaari kpeeŋutiri, o naag o tagite basi, ka chee n yi.” 19O yidaandaba n wumi seema o poga n yeli u, “E guruŋu maa n niŋi ma seem n na la,” o suuri nyisigi u ga. 20Yisifu yidaana naag u wa ti niŋi diyoorigu puwa, seela naaba n yoora o niriba, Yisifu daa bani diyoorigu maa puu gba, 21ka Duuma daa n ba o saani, ka wusira u o nivumantiri, a ti niso n nyaasira diyooriba maa kpabira o yela. 22A zu, kpeema maa naa bunso zaa yi diyoorigu maa puu pobi Yisifu nuusi, wune n daa n niŋi tuma maa yipaara. 23Kpeema maa bi lee n nyaasira Yisifu yela niŋi, a yi tuma maa pelli, a kpali Duuma daa bani Yisifu saani, ka ti o yela wara yiya, bunso zaag o n niŋina.

Currently Selected:

Piiligu 39: hag

Highlight

Copy