Piiligu 25

Ibrahim biseesi yela

1Ibrahim daa n lee n naani poga, o yuuri n daa n niŋi Katuura. 2O dogi Zimaran, Jokasina, Medan, Midiyan Isibaka a ni Suwa. 3Jokasina dogi Seba ni Dedan. Dedan biduusi n daa n niŋi Asurum dima, Letusi dima, a ni Lumiti dima. 4Midiyan biduusi n daa n niŋi Efa, Efe Hanoki, Abida a ni Elidaa, ba ŋa zaa Katuura biisi ni o yaŋsi n daa n na la.

5Ibrahim naag o bunso zaa nyem ti Yisaaka. 6Ama, jemanso o n daa n na ba o nyevuri niŋi, o daa n pini o poga seesi biduusi piini. Ka nyisi n ŋa biduusi a gaari tiŋŋa yindaana n ba wuluŋpusigu, ka che o bii Yisaaka.

Ibrahim kum yela

7-8Ŋama zaa nyaaŋa, Ibrahim daa kurigiya ga, o yuma koowa ni pisiyapoin ni anu, ka vuusi o baasigu vuusim, ka kpi, a gaari o yaadima saani. 9-10O biisi, Yisaaka ni Isimeel, pi u yi Makipela zovoori niŋi, a leeli Mamiri. Tiŋgbanso Ibrahim n daa n da, Zoha bii Efuron n niŋi Hititi nira la saani, niŋi n na ba pi o ni o poga Saara. 11Ibrahim kum nyaaŋa, Naawunni nafa o biduu Yisaaka, ka o zi n leeli buluguso ba n boona nyevuri daana bulugu, so n nyaara ma. 12

Isimeel biisi yela

Isimeel, so Heega, Saara Yijipiti guruŋbipoga n dogi ti Ibrahim, biisi yela n ŋa. 13Isimeel biduusi yuya, a ni seema ba n pa taaba zu. Naboti, Keda, Adibeel, Mibisam. 14Misihama, Duma, Masa. 15Hadadi, Tema, Jetu, Nafisi a ni Kedema. 16Barima n daa niŋi pii ni ayi la, ka ba naa ba yuya digili ba tiŋsi ni seelasi ba n zi.

17Isimeel daa dini yuma koowa ni pisita ni ayapoin poin ka kpi. 18Isimeel baligu maa daa zinni Havila ni Suu sunsuuniŋi, Yijipiti wuluŋpusigu, Asiriya soori. Ba ni ba niriba daa n bi lagimi n zi.

Isawu ni Yakubu dogim yela

19Seema Ibrahim bii Yisaaka ni o baligu n piili n ŋa. 20Yisaaka daa niŋini yuma pisinaasi, ka naa Rabeeka, Betuwel biya, ka niŋi Leban sunzopoga. Betuwel daa n niŋini Aram nira, ka zi Mesopoteemiya paaligu. 21A kpali Rabeeka n daa n na bi dogi zu, Yisaaka suusi Naawunni. Duuma wumi o suusigu, Rabeeka mari puwa. 22Jaasi puu n na Rabeeka daa n mari, biisaa mugisira taaba ba ma puu niŋi. O boosi Naawunni, “Wula mini n na ŋa?” 23Niŋi n na, Duuma yeli u, “Balisi bayi n ba e puu niŋi, ba ni ti zabira taaba ŋuuri. Yinni ni mari kpeeŋu gaari o to, ka kpeema daana ni tumina bibila daana la.”

24Puu maa dogirisim n ti paa, Rabeeka dogi jaasi, dabsi. 25Yipaara maa daa n niŋini nivuzee, ka o niŋa zaa mari koba, a maa o ni pili gbaŋŋu tagite. Lala zu, ba digili o yuuri Isawu.

26O n yiira la, o sunzo gbaa o nosiŋkpaari mari. Lala zu ba digili o yuuri Yakubu. Jemanso Rabeeka ni dogi biisaa, ka Yisaaka niŋini yuma pisiyoobu.

Isawu koosi o wurikoŋtiri

27Biisaa n ti karigi, Isawu loobi toosa, a baŋŋi toosilim ga, ka kpabira moo puu chaŋinisim. Ka Yakubu ba boin, ka kpabira yiri ga. 28Yisaaka kpabira Isawu yela, a kpali o n kuura valiga o ŋobira la zu, ka Rabeeka mi kpabira Yakubu yela.

29Dindaso Yakubu daa dugira ziiri, ka Isawu yi moo puu ta, a ni kom. 30A zu, Isawu yeli Yakubu, “Ti ma e zimooma maa seesi, kom mari ma ga.” Lala zu n na ba boona u Idom la. 31Yakubu yeli u, “Naa e dogim kpebilim ŋa ti ma poin, ka m mi ti i ziiraa.” 32Isawu yeli u, “Nyaasi, kom n ya n ku ma, bo tono n na kpebilim mari?” 33Yakubu yeli u, “Pe.” Isawu sagi, ka pe, a naa o kpebilim maa tagi ziiri. 34Niŋi n na, Yakubu ti u paanu ni tuya ziiri, o ŋobi, ka pebi ziiri maa, ka nyisigi n gaari. Seema Isawu n daa n zagsi o dogim kpebilim n na la.

Currently Selected:

Piiligu 25: hag

Highlight

Copy