Piiligu 24

Yisaaka ni Rabeeka kulisigu yeli

1Ibrahim daa n kurigi n kpe kpebilim niŋi, Naawunni mi daa n nafa u soori zaa niŋi. 2O yeli o gurunsi zaa kpeema, so n nyaasira o yiri bunso zaa, ni o naa o nuu niŋi o kpiiligu gbinniŋi. 3“M kpabirini maa, e pe, a yi Naawunni so n niŋi saazu ni tiŋŋa zaa Duuma la yuuri niŋi, maa e ki naa Keenan paaligu poga ti m bii Yisaaka. 4Ama, e gaa m yiri paaligu, m niriba gbagba puwa, a wa ti naa poga ti ti m bii Yisaaka.”

5Niŋi n na, guruŋu maa boosi u, “Ka poga maa bi kpabira o pa n zu ta kpe, ni tee n mari e bii maa pori n gaa niŋi?”

6Ibrahim yeli u, “Da pa ti ti m bii maa nobiri no nisaaniŋi. 7M Duuma Naawunni n ba alizaana, so n nyisi ma yi m ba yiri, a yi ti paaligu niŋi, ka togsi m saani, a digili noori ti ma maa, o ni naa kpe tiŋgbaŋaa ti m yaŋsi. O ni ti malaaka pa i yiya, e wa ti naa poga yi nisaaniŋi, a ti ti m biya. 8Ka poga maa bi kpabira o pa e zu ta, naŋgbandigiligu maa bi lee n pa i. Ama, da pa mari m bii pori n gaa nisaaniŋi”. 9A zu, guruŋu maa naa o nuu niŋi Ibrahim kpiiligu gbinniŋi, ka pe, seema o n yeli u maa.

10Niŋi n na, guruŋu maa naa o yidaana nyogimasi piiya, ka naa piinisuma baligu zaa paasi n gaari Mesopoteemiya paaligu, Naho yiri.

11O n wa ti paa tiŋŋa maa, o ti nyogimasi maa gba tiŋŋa, bulugu see, zaanoori jemani, jemanso pogiba ni wara kulisi.

12Niŋi n na, o suusi Naawunni, “M Duuma, m yidaana Ibrahim Naawunni, ti ma zusuŋŋu zinaa, a wusi m yidaana Ibrahim e nivumantiri. 13Nyaasi, m zani begi bulugaa, tiŋaa suŋgurisi ni ta n ti ŋoo koom. 14Ti ba so zaa ni ya n yeli maa o ti ma koom n ŋu, o sagi n ti ma, ka o lee n yeli ni o ni ŋoo koom ti m nyogimasi gba, cheli lala poga maa o niŋi so e n nyisi n ti e guruŋu Yisaaka. Ka lala yi niŋi, ni baŋŋi maa nyini n niŋi m yidaana Ibrahim yasuŋŋu yamonsitiri.”

15O na suusirini Naawunni maa, ka Rabeeka bugi yuuri ta bulugu maa puwa, o ti ŋoo koom. (Rabeeka daa niŋini Betuwel biya, ka Betuwel mi daa niŋi Naho ni o poga Milika biya. Naho daa n niŋini Ibrahim sunzo.) 16Bipuŋŋu maa daa n veela pogisara ga, ka mi na bi baŋŋi dabsi. O sigi kuliga maa puu wa ti ŋoo koom pori n du.

17Guruŋu maa chee n tuusi u, ka suusi u, “Jaande, ti ma koom beela m ŋu.”

18O tuu koom maa yoom, ka yeli u, “M yidaana, dee n ŋu.”

19O n ti u koom maa, o ŋu n baasi, o yeli u, “Ni ŋoo n ti e nyogimasi ŋa gba, a ŋu.” 20O kpaa koom maa yomyom niŋi buŋkobiri maa koŋuurigu buŋ niŋi, ka lee n chee wa ti ŋoo koom ti kpaa n paasira, a zaa ti ŋu n piri. 21Daba maa naa nufu digili tiŋŋa nyaasira u boin, a nye? Naawunni wumi o suusigu maa?

22Nyogimasi maa n ti ŋu n baasi, daba maa naa suga kunde niŋi o ŋoya, ka naa suga bensi ayi niŋi o nusogsi. 23Ka boosi u, “Ŋani bii n niŋi i? Jaande, ka wusi ma, ti ni nye dii yi e ba laanta do?”

24O yeli u, “M ba n niŋi Betuwel, Naho ni Milika biya.” 25Ŋama nyaaŋa, o lee n yeli, “Ti mari buŋkobiri bindira, a ni a bindoori, a ni saamba dii, ya n di n do.”

26Daba maa n wumi n ŋa, o gba tiŋŋa, a kpeesi Naawunni. 27Ka yeli, “Kpeesigu niŋini Duuma, m yidaana Ibrahim Naawunni la toori, so n bi zagsi o nivumantiri ni yamonsitiri yi m yidaana Ibrahim niŋi. Ama, ma wune, Duuma pa ma ni yii soori maa puu ta m yidaana niriba yiri.”

28Bipuŋŋu maa chee n gaa o ma laanta, a wa ti yeli yela maa zaa. 29-30Rabeeka sunzodaba Leban n si n nye o ŋoya kunde la ni bensi la n ba o sunzopoga nuusi, ka wumi seema Rabeeka n yeli bunso daba maa n yeli u, o yi yoom gaa daba maa saani, a wa ti nye o n za n begi o nyogimasi, a yi kuliga maa noori. 31O yeli u, “Chena, nyini so Duuma n nafa, bo n na e za yaŋŋa? M maali dii zaali i, e nyogimasi ŋa gba zii ba niŋi.”

32Niŋi n na, daba maa gaa laanta, ka Leban lerigi nyogimasi la ziiri, ka naa kaga ni bindira ti ti a, ka ŋoo n ti ti daba maa ni niseesi n pa o zu la, ba pegi ba noba. 33Ba mari bindira ti ti u, ni o di, o yeli, “M ki di, ama m nyisini m soori baaru.” Leban yeli u, “Togsima.”

34Niŋi o yeli, “Ibrahim guruŋu n niŋi ma. 35Duuma nafa m yidaana ga, o loobi bindaana, o ti u peeri, buusi, naagi, gbitisi, sugasi, gurunsi dabsi ni pogiba, nyogimasi, a ni buŋsi. 36M yidaana poga Saara, nivukuritiri jemani n na o dogi biduu ti Ibrahim, ka o naag o bunso zaa ti bii maa. 37Pimparaŋa, m yidaana ti ma pe maa, ni m da pa ti naa poga yi Keenan paaligu, seela o n zi ŋa, a ti o bii maa. 38Ama m gaari o ba yiri, o dogim puwa, o niriba gbagba saani, a naa poga ti ti o biya.

39“Niŋi n na, ma boosi m yidaana, ka poga maa yeli o ki pa m zu ta? 40O yeli ma, ni Duuma so o n wumi n tira la ni tumi malaaka o paa ma gaari, bunso zaa, a maali, m naa poga yi o niriba puwa, a yi o ba laanta ti ti o biya. 41Ni ka m yi gaari o niriba saani, peebu maa ki lee n gbaa ma, halli ka ba moŋŋi ma poga maa, naŋgbansamini maa bi lee n pa ma.

42“Jemanso m ni paa kuligaa puu zinaa, ma yeli, ‘M Duuma, m yidaana Ibrahim Naawunni, ka a niŋi e kiperi, jaande, ti m nye zusuŋŋu, m cheni ŋa puwa. 43Nyaasi, m zani kuligaa puu n na la, ka suŋguri zaa taya, o ti ŋoo koom, ka ma yeli u, “Jaande, ti ma e koom maa beela m ŋu.” 44Ka o yeli ma, “Ŋuma, ka m ŋoo n ti e nyogimasi ŋa gba,” cheli o niŋi so Duuma n nyisi n ti m yidaana Ibrahim biya.’

45“M na bi baasi Naawunni suusigu maa m sufu niŋi, ka Rabeeka bugi o koom yuuri ta, a sigi kuliga ŋoo koom, ma yeli u, ‘Jaande, ka ti ma koom beela m ŋu.’

46“O tuu o koom yuuri maa yomyom yi o bogu niŋi, ka yeli ma, ‘Ŋu ma, m ni ŋoo n ti e nyogimasi ŋa gba.’ A zu, ma ŋu, ka o ti nyogimasi maa gba.

47“Ma boosi u, ‘Ŋani bii n niŋi i?’ O yeli, ‘M ba n niŋi Betuwel, Naho ni Milika biya.’ Niŋi n na, ma naa kunde niŋi o ŋoya, ka naa bensi niŋi o nusogsi. 48Ma gba tiŋŋa puusi Duuma, m yidaana Ibrahim Naawunni, so n pa ma yiya, a ni seema n daga, ma nye m yidaana Ibrahim mabii yaŋŋu ti o biya.

49“A zu, ya yeli ma, ka ya ni wusi m yidaana nivumantiri ni yamonsitiri, ya ti m baŋŋi, ka ya mi ki lee ti, ya yeli ma, m baŋŋi, soso m di n dolli.”

50Niŋi n na, Leban ni Betuwel yeli, “Yela ŋa zaa yini Duuma saani, a zu, ti wune bi lee n mari sen ti n di n yeli. 51Rabeeka n ŋa, mari u wa ti ti e yidaana bii maa, o niŋi o poga, a maa seema Duuma ni zaali la.”

52Ibrahim guruŋu maa ni wumi seema ba ni yeli la, o gba tiŋŋa, a naa puusigu ti Duuma. 53Niŋi n na, o nyisi sugasi ni gbitisi pogisara bini, a ni bimpinna ti Rabeeka, ka ti o sunzodaba ni o ma piiniseesi n mari ligiri ga.

54O n niŋi n ŋa baasi, o ni niseesi n daa n na la di, ka ŋu, ka do niŋi.

A n kaa bee boguuniŋi, Ibrahim guruŋu maa suusi soori, “Ya ti ma soori, m gaa m yidaana saani.”

55Niŋi n na, Rabeeka sunzodaba ni o ma yeli, “Cheli Rabeeka o na ba kpe dapii poin, ka ya mari u wara.”

56O yeli ba, “Ya da laŋŋi ma nyaaŋa. Duuma ti ma ni zusuŋŋu, a yi m cheni ŋa puwa, a zu, ya basi ma soori m gaa m yidaana saani.”

57Niŋi n na, ba yeli, “Cheli ti booli bipuŋŋu maa gbagba boosi u.” 58Ba booli Rabeeka boosi u, “E ni paa dabaa gaari? O sagi Mm, m ni gaa.”

59A zu, ba sagi, ka ti Rabeeka ni o bipoga paa Ibrahim guruŋu la ni o niriba maa gaari. 60Ba suusi Naawunni ti Rabeeka ka yeli, “Sunzopoga, Naawunni n nafa i, ka ti e biisi wasi tusatusa, ka e dogim puu dima zaa ni nyaŋŋi ba dindima, a ni ba tiŋsi.”

61Niŋi n na, Rabeeka ni pogiseesi n pa o zu niŋi siriya du ba nyogimasi, a paa daba maa gaari.

62Yisaaka daa n yini buluguso ba n boona nyevuri daana bulugu so n nyaara ma, tambisigu tiirigu, a wa ti ba Keenan kiŋkagili sazu Negef. 63Dindaso zaanoori, Yisaaka yi n we laŋgari, a wa ti poli n jinna, ka nye nyogimasi n chena. 64Rabeeka gba nyaasi, o nyeni Yisaaka, ka sigi nyogima maa niŋi, 65ka boosi guruŋu maa, “Yasaani daba n ŋa, so n tuusira ti ŋa?” Guruŋu maa yeli u, “M yidaana n na.” O naa o saata muuri o nufu.

66Ba n ti paa Yisaaka saani, guruŋu maa yeli u yaseesi zaa o ni wa ti niŋi. 67Yisaaka mari Rabeeka kpe o ma gbana sugiri puwa, a naag u loobi o poga, ka daa n kpabira u ga. O ma kum sufusaaŋu n daa mari u, sufupeelim pa ta.

Currently Selected:

Piiligu 24: hag

Highlight

Copy