Piiligu 19

Sodom dima yabeeri yela

1Dindaari maa zaanoori, malaakasi bayi la ta Sodom, ka Loti ba n zi tiŋŋa maa voori noori. Noba maa niŋi, o nye ba, ka nyisigi n wa ti tuusi ba. A gba, ka zulisi o zu tiŋŋa. 2Ka yeli ba, “Ya gaafira, m bani kpe n tumini ya, a zu, ya jaande, ka ta m laanta. Ni ti ya koom, ya pegi ya noba, ka do bee o chee ya nyisigi n wara.” Ba yeli u, “Akai, kulooni ŋa zu n na ti n ya do yiiŋaa.” 3O suusi ba ga, ba sagi, ka we o laanta, o niŋi bindira ti ba, ba di.

4Poin, ka saamba maa ba do, tiŋŋa maa dabsi ti poli n jili laanta maa. Dabsi zaa, bipola ni dabkura. 5Ba booli Loti tasi n boosi u, “Dabsi la n ta e saani yiiŋaa la ba ya? Mari ba yi n ta, ti mari ba do.”

6Loti yi, ka yo dinoori maa, ka ta ba saani. 7O yeli ba, “M zodima, m suusira ya ni, ya da pa ti niŋi niribaa, n ŋa yabeegaa. 8Ya nyaasi, m mari suŋgurisi bayi, seesi na n bi baŋŋi dabsi. Ya cheli m mari ba yi n ti ya, ya n tee n niŋi ba seema zaa ya n kpabira. Ama, ya da niŋi dabsaa yelli zaa, m saamba n na, ka a daga ni kogi ba.”

9Niŋi n na, ba yeli u, “Maali n za ti nufu niŋi, ka ti ti soori, nyini saana, ŋani n niŋi i, e wusi ti bunso ti n di niŋi? Ti ni namsi i gaa ba.” Ba turi Loti basi nyaaŋa, ka gaa ba wa ti saami dinoori maa. 10Dabsi bayi maa ba laanta ka darigi Loti kpe, ka yo dinoori maa. 11Ka ba ti niriba maa zaa, nivukura ni bipola, n ba yaŋŋa la zoomi, ba kpabi dinoori maa je.

Loti zo n yi Sodom

12Dabsi bayi maa yeli Loti, “Ka e mari niriba kpe, biduusi, bipunsi, deendabsi koo e nira zaa n ba tiŋaa niŋi, mari ba zaa yi kpe. 13A kpali, ti ya n saami u ni. Duuma wumini yabeseesi tiŋaa dima ni niŋina, ka tumi ti, ti ti saami u.”

14Niŋi n na, Loti wa ti yeli o deendima seesi n belimina o bipunsi la, “Ya yi kpe yomyom, Duuma ya n saamini kpe.” Ba nyaasi maa o yomsira ba ni.

15Bogufiili, nodakumisi jemani, malaakasi maa yeli Loti, ni ba yi yoom. “Mari e poga ni e bipunsi bayi ŋa yi, lala jemani ya ki koŋŋi ya nyevuya, jemanso tiŋaa n ya n saami a.” 16Loti na mari nagima, ama Duuma zo u nimbaa, lala zu, dabsi bayi maa gbaa o ni o poga ni biisi nuusi darigi ba yi tiŋŋa maa puwa. 17Malaakasi maa yindaana yeli ba, “Ya chee, a moligi ya nyevuya. Ya da pa loobi n nyaasi nyaaŋa, ka da pa za nantaŋaa puwa. Ya chee n du zoogaa, lala wune, ya ki kpi.”

18Niŋi n na, Loti yeli u, “Jaande, da ti ti chee lala. 19Ya niŋi yatintaa ga ti ma, ya ni moligi n nyevuraa. Ama, zoori maa zu ba wogilim ga, ka m n ya n chee paa nisaaniŋi, daaŋu maa ni gbaa ma, m kpi, ka m na bi paa nisaaniŋi. 20Nyaasi tiŋbilaa. Wune n leeli, ka bi zoo. Cheli m du n gaa niŋi. Niŋi n na, ma ni nye moligirisim.”

21O yeli u, “O veela, m sagiya, m ki saami lala tiŋŋa maa. 22Chee yomyom, m ki tee n niŋi bunso zaa, ama, e paani niŋi poin.” A kpali Loti ni booli u tiŋbila la zu, ba boona u Zowa.

Sodom ni Gomora mutigu yela

23Wuluŋu daa n si n pusirini, ka Loti paa zowa. 24Noba maa niŋi, Duuma ti jiribi ni bugum yi saa ti sigi Sodom ni Gomora niŋi, 25a di tiŋsi ayi maa ni a tiŋgbana, a ni a niriba ni bumbula zaa nyem, 26Ama, Loti poga loobi n nyaasi, ka loobi yaarim kugiri.

27A n chee bee boguuniŋi, Ibrahim chaŋŋi yoom ta seela o ni Duuma n si n za la, 28ka nyaasi Sodom ni Gomora a ni tiŋgbaŋŋu maa zaa, o nyeni bugum karigu wusi n duura tiŋgbaŋŋu maa niŋi.

29Jemanso Naawunni n daa n muri tiŋgbaŋŋu maa ni tiŋsi ayi la, o teesi Ibrahim yela, ka nyisi Loti yi tiŋŋa maa mutigu niŋi, o nye tuligirisim.

Loti ni o bipunsi bayi yela

30Loti daa n zorini dabeem, a kpali o n zi Zowa la zu, o ni o bipunsi bayi maa yi tiŋŋa maa puu zo n wa ti ba zovoori puwa. 31Bikpeema daana la yeli o sunzo, “Ti ba kurigiya, dabsi mi ka tiŋgbaŋaa niŋi ti n di n kulisi ba, a dogi biisi seema n daga. 32Ti ti m ba o kuuli, lala ti ni tee n mari u do, a dolli o niŋi dogi biisi.” 33A dindaari yiiŋu, ba ti u daam o ŋu, kpeemdaana la mari o ba do. Ama, o n daa kuuli n gali zu, o bi baŋŋi bunso n niŋi.

34Bee n chee, bikpeema la yeli o sunzo, “M mari u do yiiŋu la, ti lee n ti o kuuli yiiŋaa, ka e mi nunu ya do. Lala jemani, ti zaa ni dolli m ba niŋi dogi biisi, ti baligaa o da muri.” 35A yiiŋu, ba lee n ŋuusi u, ka bibila daana maa mari u do. Kuuligu aligaaya zu, ŋala gba o bi baŋŋi. 36N ŋa soori a niŋi n na Loti bipunsi bayi ŋa dolli ba ba niŋi nye puusi. 37Kpeema daana la dogi biduwa, ka digili o yuuri Mowabi, nivuseesi ba n boona Mowabi dima la yaadaba n na la. 38Bibila daana la gba dogi biduwa, ka digili o yuuri Benami. Wune n niŋi Amoni dima yaadaba.

Currently Selected:

Piiligu 19: hag

Highlight

Copy