Piiligu 20

Abimeliki mari Ibrahim poga gaa o laanta

1Ŋama nyaaŋa, Ibrahim nyisigi Mamiri gaa Keenan sazu kiŋkagili wa ti zi Kadesi ni Sora sunsuuniŋi. A nyaaŋa, o lee n wa ti zi Gera, 2ka wusi maa Saara niŋini o sunzopoga. Gera naaba, Abimeliki ti ba naa Saara ti ti u. 3Dindaso yiiŋu Naawunni ta o saani yi zaasim niŋi, a ti yeli u, “E ni kpi, a kpali e n naa poga a, o kulisirini.”

4Ama, Abimeliki daa na bi kpabi u. Niŋi n na, o yeli, “Duuma, nivupeeli n niŋi ma. E ni ku m ni m niriba a? 5Ibrahim gbagba n yeli maa o sunzopoga n na, ka o gba yeli lala, m naagi u ni a ni feresuŋŋu, m bi niŋi yabee.”

6Naawunni yeli u zaasim maa niŋi, “Mm, m baŋiya maa e naagi u ni, a ni feresuŋŋu, a zu ma ti e bi kpabi u, a niŋi yabee kpe n niŋi la. 7Pimparaŋa, pori n naag u ti o sira, Naawun tumu n na, ka o suusi Naawunni ti i, lala jemani, e ki kpi. Ama ka e yi bi pori u ti u, m kpaasira e tubiri maa e ni kpi, e ni e niriba zaa.”

8Bee n chee boguuniŋi, Abimeliki booli o kpemba zaa, a yeli ba bunso zaa n ba niŋi, dabeem gbaa ba. 9Niŋi n na, Abimeliki booli Ibrahim, a ti boosi u, “Bo n na e niŋi ti n ŋa? Bo yabee n na ma niŋi i, a taasi e ti yadagaa o ta m ni m paaligu zaa niŋi? E niŋi ma yaso n bi daga nira zaa, o niŋi o todaana. 10Wula zu e niŋi lala?”

11Ibrahim yeli u, “M fe ni maa nira zaa bi zora Naawunni kpe, a kpali lala zu, ba ni ku ma ka naa m poga maa. 12M sunzopoga n na yamonsi, m ba bii n na, ama, ka m ma biya. Ka ma naag u. 13A zu jemanso Naawunni n nyisi ma yi m ba laanta wara paaligu yindaana tiŋgbaŋŋu niŋi la, m yeli u ni maa ka ti si n gaa seela zaa o paasi m niŋi yeli maa o sunzodaba n niŋi ma.”

14Niŋi n na, Abimeliki naag o poga pori n ti u, ka ti u peeri, naagi a ni gurunsi. 15Ka yeli Ibrahim, “M tiŋgbaŋŋu n na la, seela zaa n peri i, e zima.” 16O yeli Saara, m naa ni gbitisi tusiri ti e sunzodaba, a wusi maa nivupeeli n niŋi i, a yi seesi zaa n ba kpe, so zaa ni baŋŋi maa e zu pegiya.

17A kpali ya so n niŋi, a yi Ibrahim poga Saara la zu, Naawunni niŋi u maa poga zaa o da tee n dogi, a yi nayiri maa. A zu, Ibrahim suusi Naawun ti Abimeliki. 18Naawun tibi u, ka tibi o poga ni guruŋpogiseesi zaa n ba niŋi, lala jemani, ba zaa ni tee n dogi biisi.

Currently Selected:

Piiligu 20: hag

Highlight

Copy