Piiligu 18

Ibrahim biduu dogim noori tiibu yela

1Dindaso wuntonkpaligu, Duuma daa n ta Ibrahim saani, a leeli Mamiri titintaasi. Ka Ibrahim daa n zinni o gbana sugiri noori. Jemanso zii n bii. 2Ka lalli o zu saa, o nyeni dabsi bata n za n leeli u. Noba maa niŋi o n si n nye ba, o chee n we ba saani, a wa ti gba, a naag o gbee zulisi tiŋŋa. 3O suusi ba yeli, “M yidaana jaande, ka m yela peri i, da pa ti saa m yiri. 4M ni ti ba ŋoo koom ti ti ya, ya pegi ya noba, ya zi tiyaa gbinni vuusira, m chena. 5M ni mari bindira beela gba ta, a ni paasi ya niŋi, ya cheni ŋa puwa. Ya naa mani saa, ya n ta m laanta ŋa.” Ba sagi, ka yeli u, “Niŋi seema e ni yeli maa.”

6Ibrahim zo yomyom kpe o gbana sugiri puwa yeli Saara, “Naag e zumsuma la bowate niŋi paanu yoom.” 7Ka chee n gaari o naagi puu wa ti gbaa nagipolli, so n mari kpaam, a ti ti o guruŋsi yindaana, o ku u, a maali u nene yoom ta. 8O gbagba naa bisimkpaam, nagibisim, a ni valiga ti ti ba tii maa gbinni, ba dira, ka o za ba saani, tii maa gbinni.

9Niŋi n na, ba boosi u, “E poga Saara baya?” O yeli ba, ni o ba sugiri puwa.

10Ba yindaana yeli u, “Yumini jemanaa zu, m ni pori n ta e saani kpe, e poga Saara ni dogi biduwa.” Ka Saara begi dinoori wumina seema o n yetira maa. 11Ibrahim ni Saara zaa daa n kurigini, haali, Saara daa n bi lee n pegira. 12A la zu, Saara la o maŋŋa, a yi o sufu niŋi, ka yeli, “Pimparaŋa, seela m ni m sira zaa n kurigi n paag a, ni lee n tee n dogi?”

13Niŋi n na, Duuma boosi Ibrahim, “Wula n na Saara la, ka yeli ni o ki lee n dogi jemanso o n kurigaa? 14Ya bo n ba toom ti Duuma? A maa seema ni yeli la, yumini jemani a zu, m ni lee n pori n ta, ka Saara dogi biduwa.”

15A kpali Saara n daa zora dabeem zu, o chisi, “M bi la.” O yeli u, “Yamonsi, e laya.”

Ibrahim suusi Naawun ti Sodom

16Niŋi n na, niriba maa yi nisaaniŋi wa ti paa seela ba n di n za, ka nye Sodom, ka Ibrahim pa ba zu, o zaali ba soori. 17Ka Duuma yeli o sufu niŋi, “M ki naa n sogi Ibrahim bunso ni ya n niŋi. 18O yaŋsi ni ti niŋi zaaziikara dima ni kpeena baligu, o niŋi n na ma ni dolli n nafa balisi zaa. 19M nyisi u ni, o wusi o biisi ni o yaŋsi ba mari wumintiibu ti ma, ka niŋini bunso zaa ni tooli, a ni yamonsi. Ka ba yi niŋi lala, m ni niŋi n paali naŋgbanseesi zaa ni digili u la.”

20Niŋi n na, Duuma yeli Ibrahim, “Yadagiri seesi Sodom ni Gomora dima n niŋina la ti ba yabeeri zoo ga. 21A daga ni wa ti nyaasi, jiri n na bee yamonsi.”

22Niŋi n na, dabsi bayi nyisigi n yi ba saani, a naa ba nufu to Sodom soori wara, ama ka Duuma wune na ba Ibrahim saani. 23Ibrahim vuu n paa Duuma, ka boosi u, “Yamonsitiri, e ya n murini yasuma ni yabeeri dima zaa? 24Ka nivusuma pisinu ba tiŋŋa maa puwa, e ni muri tiŋŋa maa zaa? E ki cheli u kpali niriba pisinu maa zu? 25Yamonsitiri, e ki ku nivusuma ni nivubeeri maa zaa. Lala ki tee n niŋi. Ka e yi niŋi lala, nivusuma la ni nye tubidarigirisim paasi nivubeeri la niŋi. Lala ki tee n niŋi. Durinye ŋa zaa seriya dira daga o niŋi yela ni a soori.”

26Duuma yeli, “Ka nivusuma pisinu yi ba Sodom, a kpali ba zu, m ni che tiŋŋa maa.”

27Ibrahim lee n togsi, “M Duuma, jaande, che n paŋŋi ma, dabilim so ni kpari n ma n togsira e saani a, nisaala n niŋi ma, m ka soori zaa m tee n yeli i sen. 28Ama ka nivusuma pisinaasi ni banu n ba niŋi, ka ba bi paa pisinu, e ni muri tiŋŋa maa?” Duuma yeli, “M ki muri tiŋŋa maa, ka nivusuma pisinaasi ni banu n ba niŋi.”

29Ibrahim lee n boosi u, “Ka a niŋi maa niriba pisinaasi ko n na?” O yeli, “M ki muri ba, ka ba paa niriba pisinaasi.”

30Ibrahim suusi u, “Jaande, da je suuri, Duuma, a daga m na togsi. Ka ba niŋi maa nivusuma pisita ko?” O yeli u, “M ki muri tiŋŋa maa, ka ba ba pisita.”

31Ibrahim yeli u, “Jaande, M Duuma, cheli n togsi e saani. Ka niriba pisiyi ko n ba niŋi?” O yeli u, “M ki muri tiŋŋa maa, ka niriba pisiyi ko ba niŋi.”

32Ibrahim yeli u, “Jaande, da ti e suuri nyisigi, Duuma, m kpabira n togsi bunluŋko paasi. Ka nivusi pii ko ba niŋi?” O yeli u, “M ki muri ba, ka niriba pii ko ba niŋi.” 33O ni Ibrahim ni togsi n baasi, Duuma gaari, ka Ibrahim pori n gaari o yiri.

Currently Selected:

Piiligu 18: hag

Highlight

Copy