مَتّا 28

ایسّائے پدا زندگ بئیگ

(مَرکاس 16‏:1‏–8؛ لوکا 24‏:1‏–12؛ یوهَنّا 20‏:1‏–10)

1شَبَّتئے رۆچا رَند، بزان یکشَمبِهئے#28‏:1 اَسلیگێن یونانی نبشتانکَ گوَشیت: ”هپتگئے ائولی رۆچئے“. گوَرباما#28‏:1 گوَربام، بزان رۆٹکّا پێسر، رۆچئے در آیگا پێسر. مَریَم مَگدَلینی و آ دگه مَریَم کبرئے چارگا شتنت. 2یکّ اَناگت مزنێن زمین‌چَنڈے آتک، چێا که هُداوندئے پرێشتگے چه آسمانا اێر آتک، کبرئے سرا شت، ڈۆکی لێٹێنت و ڈۆکئے سرا نِشت. 3آییئے رَنگ و سورت گِرۆکئے پئیما دْرپشگا اَت و گُد و پۆشاکی برپئے ڈئولا اِسپێت اَتنت. 4نِگهپانێن سپاهیگ چه بیمّا لَرزگا لگّتنت و چۆ مُردگا بوتنت. 5پرێشتگا گۆن جنێنان گوَشت: ”متُرسێت! منَ زانان شما ایسّائے شۆهازا اێت که سَلیب کَشّگ بوتگ. 6آ اِدا نه‌اِنت، اَنچُش که وت گوَشتگ‌اَتی زندگ بوتگ و جاهی جتگ. بیاێت هما جاگها بچارێت که اۆدا اێر اَت. 7مهتل مبێت، برئوێت و آییئے مُریدان سهیگ کنێت که آ چه مُردگان زندگ بوتگ و چه شما پێسر جَلیلا رئوت. همۆدا شما آییا گِندێت. نون من شمارا هال دات.“ 8گڑا جنێن چه کبرئے سرا تچانا شتنت که مُریدان اے هالا سر بکننت. جنێن تُرسگا اتنت بله گَلا بال اتنت هم. 9ایسّا اَناگت گۆن جنێنان دُچار کپت و گوَشتی: ”سلام و درۆت!“ آ نزّیکّا آتکنت، ایسّائے پادِش گپتنت و ستا و سنااِش کرت. 10ایسّایا گۆن آیان گوَشت: ”متُرسێت! برئوێت و منی براتان بگوَشێت که جَلیلا برئوێت، همۆدا شما منا گِندێت.“

دینی پێشوا و سپاهیگانی درۆگ

11هما وهدا که جنێن رئوگا اَتنت، لهتێن نِگهپانێن سپاهیگ دێم په شهرا شت که دینی پێشوایان اے سرجمێن هالان بدئینت. 12دینی پێشوایان کئومئے کماشانی گِند و نند و شئور و سَلاها رَند، سپاهیگانا مزنێن زَرّے دات. 13گۆن سپاهیگان گوَشتِش: ”مردمان بگوَشێت که شپا ما واب بوتگێن، آییئے مُرید آتکگ‌اَنت و جۆنِش دُزِّتگ و برتگ. 14اگن والی اے هالا سهیگ بوت، ما آییا سرپدَ کنێن. شما بێگَم ببێت.“ 15سپاهیگان زَرّ زرتنت و اَنچُش که سۆج دئیگ بوتگ‌اَتنت، هما پئیما کرتِش. اے کِسّه تان رۆچِ مرۆچی یَهودیانی نیاما شِنگ و تالان اِنت.

جهان و ایسّائے مِستاگ

(مَرکاس 16‏:14‏–18؛ لوکا 24‏:36‏–49؛ یوهَنّا 20‏:19‏–23؛ کاسِدانی کار 1‏:6‏–8)

16گڑا یازدهێن کاسد جَلیلئے هما کۆهئے سرا شتنت که ایسّایا گوَشتگ‌اَت. 17وهدے ایسّااِش دیست، ستا و سَنااِش کرت، بله لهتێن اَنگت شکّ اَت. 18ایسّا آیانی کرّا آتک و گوَشتی: ”آسمان و زمینئے سجّهێن واک و اِهتیار منا دئیگ بوتگ. 19پمێشکا، برئوێت و سجّهێن کئومان منی مُرید بکنێت، پت و چُکّ و پاکێن روهئے ناما پاکشۆدی بدئیێت و 20آیان همے تالیما بدئیێت که منی سجّهێن پرمانانی سرا اَمَل بکننت. دلجم ببێت، من تان دنیائے هلاسیا مُدام گۆن شما گۆن آن.“

Currently Selected:

مَتّا 28: HPKB

Highlight

Copy