مَتّا 27

سرۆکانی شئور

(مَرکاس 15‏:1؛ لوکا 23‏:1‏–2؛ یوهَنّا 18‏:28‏–32)

1سباها ماهلّه، سجّهێن مزنێن دینی پێشوا و کئومئے کماش ایسّائے کۆشا همشئور بوتنت. 2ایسّااِش بست، گِرّان کرت و رومی والی پیلاتوسئے دستا دات.

یَهودائے وتکُشی

(کاسِدانی کار 1‏:18‏–19)

3وهدے ایسّائے گراێنۆک یَهودایا دیست که ایسّااِش مئیاریگ کرت، چه وتی کرتگێن کارا پشۆمان بوت و سیێن نُگرهێن کُرشی برت و مزنێن دینی پێشوا و کئومئے کماشانا واپس داتنت. 4گوَشتی: ”من سکّ مئیاریگ آن که یکّ بێگناهێن مردمے په کۆشارێنگا گراێنتگ.“ بله آیان پَسّئو دات: ”ما چۆن کنێن، تئو بزانئے و تئیی کار.“ 5گڑا یَهودایا هما زَرّ مزنێن پرستشگاها دئور داتنت و شت، وتا گُٹلۆپ کرت و کُشتی. 6مزنێن دینی پێشوایان زَرّ زرتنت و گوَشتِش: ”اے پلیتێن#27‏:6 اَسلیگێن یونانی نبشتانکَ گوَشیت: ”هۆنیگێن زرّ“. زَرّ اَنت، پرستشگاهئے هزانَگا اِشانی اێر کنگ نارئوا اِنت.“ 7پمێشکا شئور و سَلاها رَند، چه آ زَرّان کُمبارێئے#27‏:7 کُمبار، بزان هما که کُمب و کونزگ اڈَّ کنت. ڈگارِش بها گپت که په دَرامدان کبرستانے بکننتی. 8تان رۆچِ مرۆچیگا آ ڈگارئے نام ”هۆنئے ڈگار“ اِنت. 9پمێشکا چُش بوت تان هما چیزّ که اِرِمیا نبیئے زبانا پێشگۆیی کنگ بوتگ، راست و پَدّر ببیت: من سیێن نُگرهێن کُرش زرتنت که اے زَرّ بنی اِسراییلئے چُکّان آییئے کیمّت بستگ‌اَت و 10چه اے زَرّان کُمبارئے ڈگارُن بَها گپت، اَنچُش که هُداوندا منا پرمان کرتگ‌اَت.#27‏:10 زَکَریا نبیئے کتاب 11‏:12 و رَند، اِرِمیا نبیئے کتاب 32‏:6 و رَند.

ایسّا پیلاتوسئے دێما

(مَرکاس 15‏:2‏–5؛ لوکا 23‏:3‏–5؛ یوهَنّا 18‏:33‏–38)

11نون ایسّا والیئے دێما اۆشتارێنگ بوت و والیا چه آییا جُست کرت: ”تئو یَهودیانی بادشاه ائے؟“ ایسّایا پَسّئو دات: ”تئو وت گوَشگا ائے.“ 12مزنێن دینی پێشوا و کئومئے کماش ایسّایا بِڈّ و بُهتام جنَگا اَتنت، بله آییا هچّ پَسّئو ندات. 13پیلاتوسا گوَشت: ”تئو نه‌اِشکنگا ائے که اے ترا چینچُک بُهتام جنَگا اَنت؟“ 14بله ایسّایا آیانی هچّ بُهتامئے پَسّئو هم ندات و والی سکّ هئیران مَنت.

15والیا هر سال ائییدئے وهدا، چه یَهودی بندیگان یکّے، هما که مردمان بلۆٹتێن، آزاتَ کرت. 16آ وهدا یکّ نامدارێن بندیگے جێلا اَت که نامی باراباس اَت. 17نون که مردم مُچّ اَتنت، پیلاتوسا چه آیان جُست کرت: ”شما چے لۆٹێت؟ من کئیا آزات بکنان؟ باراباسا، یا ایسّایا که مَسیه هم گوَشنتی؟“ 18آییا زانتگ‌اَت که ایسّااِش په هَسَدّ و کُنّت آییئے دستا داتگ. پمێشکا چُش گوَشتی.

19وهدے پیلاتوس هَکدیوانا نِشتگ‌اَت، آییئے جَنا اے کُلئو راه دات که ”گۆن اے بێگناه و نێکێن مردا هچّ مکن، چێا که دۆشی من اِشیئے بارئوا سکّێن پرێشانێن وابے دیستگ.“ 20بله مزنێن دینی پێشوا و کئومئے کماشان مردمانی مُچّی سکّ شۆرێنت#27‏:20 شۆرێنگ، بزان پاد کنگ، تَهریک کنگ. و آشُپێنت#27‏:20 آشُپێنگ، بزان پاد کنگ، تَهریک کنگ. که ایسّائے مَرک و باراباسئے آزاتیا بلۆٹنت. 21والیا جُست کرت: ”چے لۆٹێت، چه اے دوێنان کجامیا په شما آزات بکنان؟“ آیان گوَشت: ”باراباسا.“ 22پیلاتوسا چه آیان جُست کرت: ”گڑا گۆن ایسّایا که مَسیه هم گوَشنتی، چے بکنان؟“ آیان په همتئواری پَسّئو دات و گوَشت: ”سَلیبی کَشّ!“ 23پیلاتوسا جُست کرت: ”چیا بارێن؟ مئیاری چے اِنت؟“ بله آیان گێشتر کوکّار کرت و گوَشتِش: ”سَلیبی کَشّ!“

24وهدے پیلاتوسا دیست که هچّ کارے کرتَ نکنت و مردم شۆرش کنگا اَنت، گڑا آییا آپ زرت، مُچّیئے دێما وتی دست ششتنت و گوَشتی: ”من چه اے مردئے هۆنا بێمئیار آن، شما بزانێت و شمئے کار.“ 25سجّهێن مردمان گوَشت: ”اِشیئے هۆن مئیگ و مئے چُکّانی گردنا ببیت.“ 26گڑا پیلاتوسا په آیانیگی، باراباس آزات کرت و ایسّا شلّاک جناێنت و داتی که آییا سَلیبئے سرا بدْرنجنت.

ایسّائے سرا کَلاگ و ریشکند

(مَرکاس 15‏:16‏–20؛ یوهَنّا 19‏:2‏–3)

27والیئے سپاهیگان ایسّا والیئے کۆٹ و ماڑیئے پێشگاها برت و سپاهیگانی سجّهێن لشکر آییئے چپّ و چاگردا مُچّ کرت. 28آیان، ایسّائے گوَرئے گُد کَشّتنت و بادشاهانی پئیمێن سُهرچکێن کباهے گوَرا دات، 29چه ڈَنگر و کُنٹگان تاجے جۆڑێنت و آییئے سرا اێر کرت، لَٹّے راستێن دستا دات و په کَلاگ و ریشکند، آییئے دێما کۆنڈان کپتنت و گوَشتِش: ”سلام و درۆت، او یَهودیانی بادشاه!“ 30آییئے دێما تُهِش کرت و هما لَٹِّش سرا جت. 31وهدے کَلاگ و مَلنڈِش هلّێنت، گوَرئے کباهِش کَشّت و آییئے جِندئے گُدِش پدا گوَرا داتنت. رندا دێم په سَلیب کَشّگا برتِش.

ایسّا و سَلیب

(مَرکاس 15‏:21‏–32؛ لوکا 23‏:26‏–43؛ یوهَنّا 19‏:17‏–27)

32وهدے رئوگا لگّتنت، شَمون نامێن مردے دیستِش که کِرینیئے شهرئے مردمے اَت. سپاهیگان آ په بیگار گپت که ایسّائے سَلیبا بَڈّا بکنت. 33وهدے ”جُلْجُتا“ بزان هما ”کامپۆل“ نامێن جاگها رَستنت 34اۆدا ایسّااِش مُرّ مان رتکگێن شراب دات، بله آییا چَشَگا رَند نئوارت. 35نون سَلیبئے سرا دْرتکِش، پُچّ و پۆشاکِش وت‌مان‌وتا بهر کرتنت و آیانی سرا شرتِش بست که بارێن کئیا برسنت. 36رَندا همۆدا نِشتنت و آییئے نِگهپانی‌اِش کرت. 37ایسّائے سربرا، سَلیبئے دارئے سرا، مئیارنامگے دْرَتکِش که آییئے سرا نبشتگ‌اَت: ”اے یَهودیانی بادشاه، ایسّا اِنت.“

38ایسّائے همراهیا دو یاگی و دُزِّش هم سَلیبئے سرا دْرتک، یکّے راستێن و دومی چَپّێن نێمگا. 39رهگوَزان دژمان دئیان، وتی سر چَنڈێنت و 40گوَشتِش: ”او مزنێن پرستشگاهئے کرۆجۆک که گوَشتگِت: ’سئے رۆچا پدا آییا اڈَّ کنان‘. اگن تئو هُدائے چُکّ ائے، گڑا چه سَلیبا اێر آ و وتا برَکّێن.“ 41همے ڈئولا مزنێن دینی پێشوا، شَریَتئے زانۆگر و کئومئے کماش هم آییئے سرا ریشکند و مَسکرا کنگا اَتنت. 42گوَشتِش: ”آ دگه مردمی رَکّێنتنت، بله وتا رَکّێنتَ نکنت، اے وَه اِسراییلئے بادشاه اِنت، اگن نون چه سَلیبا اێر بکپیت، ما آییئے سرا باوَرَ کنێن. 43اۆست و اُمێتی په هُدا بستگ، اگن هُدایا دۆست اِنت، برَکّێنیتی، چێا که گوَشتگ‌اَتی: ’من هُدائے چُکّ آن.‘“ 44همے پئیما ایسّائے همراهیا سَلیب کَشّتگێن یاگی هم آییا بَد و رَد گوَشگا اَتنت.

ایسّائے مَرک

(مَرکاس 15‏:33‏–41؛ لوکا 23‏:44‏–49؛ یوهَنّا 19‏:28‏–30)

45نێمرۆچا بگر تان بێگاهئے سئیا،#27‏:45 اَسلیگێن یونانی نبشتانکَ گوَشیت: ”ششمی ساهتا بگر تان نُهمی ساهتا“. سجّهێن مُلک اَناگت تهار بوت. 46بێگاهئے ساهت سئیا،#27‏:46 اَسلیگێن یونانی نبشتانکَ گوَشیت: ”نُهمی ساهتا“. ایسّایا چیهال#27‏:46 چیهال، بزان دردناکێن کوکّار. جت: ”اِلی، اِلی، لِما سَبَکْتَنی؟“ بزان: او منی هُدا، او منی هُدا! تئو چێا منا تهنا اِشت؟#27‏:46 زَبور 22‏:1. 47اۆدا، لهتێن اۆشتاتگێن مردما وهدے اِشکت، گوَشتِش: ”اِلیاسا تئوار کنگا اِنت.“ 48چه آیان یکّے تچانا شت، اسپنجے زرتی و تْرپشێن شرابا میسّێنتی، دارێئے سرا بست و په چوسّگا ایسّائے نێمگا شهارتی. 49بله اے دگه مردمان گوَشت: ”سَبر کن، بچارێن بارێن اِلیاس اِشیئے رَکّێنگا کئیت یا نه؟“ 50ایسّایا دومی برا بُرزێن تئوارێا چیهال کَشّت و ساه دات. 51هما وهدا مزنێن پرستشگاهئے پرده، بُرزادا بگر تان جَهلاد، دِرت و دو بهر بوت، زمین لَرزت و تَلار ترَکِّت و کپ بوتنت، 52کبرانی دپ پَچ بوت و بازێن پاک و پهرێزکارێن مردم که مُرتگ‌اَتنت، پدا زندگ بوتنت. 53ایسّائے جاه جنَگ و زندگ بئیگا رَند، چه وتی کبران در آتکنت، اورشَلیمئے پاکێن شهرا شتنت و وتا په بازێنێا زاهر و پَدّرِش کرت. 54هما پئوجی اَپسر و آییئے همراهێن سپاهیگ که ایسّائے پانگ اَتنت، وهدے زمین‌چَنڈ و اے دگه سرگوَستِش دیستنت، سکّ تُرست و گوَشتِش: ”بێشکّ اے مرد هُدائے چُکّ اَت.“

55بازێن جنێنے هم، که چه جَلیلا په ایسّائے هِزمت و چلۆپگا آییئے همراهیا آتکگ‌اَت، دور اۆشتاتگ و چارگا اَتنت. 56گۆن آیان مَریم مَجْدَلیَه، آکوب و ایسُّپئے مات مَریم و زِبْدیئے چُکّانی مات گۆن اَتنت.

ایسّائے کَبر و کَپن

(مَرکاس 15‏:42‏–47؛ لوکا 23‏:50‏–56؛ یوهَنّا 19‏:38‏–42)

57رۆنِندا، اَریماتیائے شهرئے ایسُّپ نامێن زَردارێن مردے آتک که ایسّائے مریدے اَت. 58پیلاتوسئے کِرّا شت و ایسّائے جۆنئے برگئے اِجازتی لۆٹت. پیلاتوسا پرمان دات که جۆنا آییا بدئینت. 59ایسُّپا جۆن زرت و ساپێن لیلُمێن#27‏:59 لیلُم، گُدئے تَهرے که اَنگرێزیا ”linen“ گوَشگَ بیت. گُدێا پتات و 60هما نۆکێن کبرئے تها اێر دات که په وت چه تَلارا تراشتگ‌اَتی. مزنێن ڈۆکے لێٹ دئیانا کَبرئے دپا اێری کرت و شت. 61بله مَریم مَجْدَلیَه و آ دگه مَریم، همۆدا کبرئے دێم په دێما نِشتنت.

کَبرئے نِگهپانی

62دومی رۆچا، بزان شَمبِها،#27‏:62 اَسلیگێن یونانی نبشتانکَ گوَشیت: ”شَبَّتئے تئیاریئے رۆچا رند“. مزنێن دینی پێشوا و پَریسی یکجاه بوت و پیلاتوسئے کِرّا شتنت. 63گوَشتِش: ”او واجه! مارا یات اِنت که اے درۆگبندا وتی زِندا گوَشتگ‌اَت که ’سئے رۆچا رَند من پدا زندگَ بان و جاهَ جنان.‘ 64پمێشکا پرمان بدئے که تان سئے رۆچا کبرئے سرا نِگهپانی کنگ ببیت، چۆ مبیت که آییئے مرید جۆنا بدُزّنت و ببرنت و گۆن مردمان بگوَشنت که آ چه مُردگان پدا زندگ بوتگ و اے گُڈّی رپک و درۆگ، چه پێسریگێنا اَنگت گَندگتر ببیت.“ 65پیلاتوسا دَرّاێنت: ”نِگهپان وَه اِش اَنت، وتی همراهیا ببرێت و همینچُک که گۆن شما بوتَ کنت، کبرئے نِگهپانیا بکنێت.“ 66گڑا شتنت و کبرئے دَپئے مزنێن ڈۆک مُهر و مۆمبند کرت و سپاهیگِش پانگ کرتنت.

Currently Selected:

مَتّا 27: HPKB

Highlight

Copy