یوهَنّا 19

یَهودیانی کێنگ و پیلاتوسئے دودلی

(مَتّا 27‏:27‏–31؛ مَرکاس 15‏:16‏–20)

1رندا پیلاتوسا ایسّا زرت و شَلّاک و هئیزران جناێنت. 2پئوجیان چه ڈَنگر#19‏:2 ڈَنگر، بزان بێبَرێن کُنٹگی درچک و دار. و کُنٹگان تاجے اَڈّ کرت و ایسّائے سرا دات، جَمورنگێن#19‏:2 جَمو، رنگے که پارسیا بنفش و اردوا بنفشی گوَشنتی. کَباهے هم گوَرا داتِش. 3ایسّائے کِرّا شت و آتکنت و گوَشتِش: ”سلام و درۆت، او یَهودیانی بادشاه!“ شَهماتِش هم جت. 4پیلاتوس پدا یَهودیانی کِرّا ڈنّا در آتک و گوَشتی: ”بچارێت، اِشیا شمئے کِرّا ڈنّا کاران تانکه شما بزانێت که من په اِشیئے مئیاریگ کنگا هچّ بنیادے نگندان.“ 5ایسّایا کُنٹگێن تاج سرا اَت و جَمورنگێن کَباه گوَرا اَت و ڈنّا در آتک. پیلاتوسا گۆن یَهودیان گوَشت: ”بچارێت، اے مرد همِدا اِنت!“ 6وهدے مزنێن دینی پێشوایان و آیانی سپاهیگان دیست، کوکّارِش کرت: ”سَلیبی کَشّ! سَلیبی کَشّ!“ پیلاتوسا گوَشت: ”شما وت اِشیا بزورێت و سَلیب بکَشّێت. من په اِشیئے مئیاریگ کنگا هچّ بنیادے نگندان.“ 7یَهودیان گوَشت: ”مارا شَریَتے هست‌اِنت که آییئے رِدا،#19‏:7 رِدا، بزان مُتابکا. اے مرد الّما کُشگ ببیت، چێا که گوَشتگی: ’من هُدائے چُکّ آن.‘“ 8وهدے پیلاتوسا اے هبر اِشکت، گَنتر تُرستی.

9پیلاتوس پدا وتی کلاتا شت و اۆدا چه ایسّایا جُستی کرت: ”تئو چه کجا آتکگئے؟“ ایسّایا پَسّئو ندات. 10پیلاتوسا گوَشت: ”گۆن من هبرَ نکنئے؟ تئو نزانئے که تئیی آزات کنگ و سَلیب کَشّگئے اِهتیار منی دستا اِنت؟“ 11ایسّایا پَسّئو دات: ”اگن هُدایا ترا اے اِهتیار مداتێن، منی سرا ترا هچّ واک و اِهتیارے نێست‌اَت. پمێشکا هما که منا تئیی دستا داتی گێشتر مئیاربار اِنت.“ 12چه اِد و رَند، پیلاتوسا جُهدَ کرت که آییا آزات بکنت، بله یَهودیان کوکّارَ کرت: ”اگن تئو اے مردا آزات بکنئے، کئیسَرئے#19‏:12 کئیسر رومئے بادشاهانی پِرنام بوتگ، هچّ بادشاهئے جندئے نام نبوتگ. رومئے هر بادشاه کئیسر گوَشگ بوتگ. دۆست نه‌ائے. هرکَس وتا بادشاه سرپد ببیت، کئیسَرئے دژمن اِنت.“

13وهدے پیلاتوسا اے هبر اِشکت، ایسّایی ڈنّا آورت و وت یکّ جاهے په دادرسیا نِشت که آییا ”سِنْگپَرْشَ“ گوَشنت و اَرَمایی زبانا ”جَبّاتا“ بیت. 14سَرگوَزئے ائییدئے تئیاریئے رۆچا، نێمرۆچئے وهدا،#19‏:14 اَسلیگێن یونانی نبشتانکَ گوَشیت: ”ششمی ساهتئے وهد“. پیلاتوسا گۆن یَهودیان گوَشت: ”بچارێت، اِش اِنت شمئے بادشاه!“ 15بله آیان کوکّار کرت: ”گار و گُمساری کن! گار و گُمساری کن! سَلیبی کَشّ!“ پیلاتوسا گوَشت: ”شمئے بادشاها سَلیب بِکَشّان؟“ مزنێن دینی پێشوایان گوَشت: ”چه کئیسَرا اَبێد، مارا دگه بادشاهے نێست.“ 16آهِرا، پیلاتوسا ایسّا پئوجیانی دستا دات که سَلیب کشّگ ببیت. گڑا آیان ایسّا برت.

ایسّایا سلیبَ کشّنت

(مَتّا 27‏:32‏–37؛ مَرکاس 15‏:21‏–26؛ لوکا 23‏:32‏–38)

17ایسّایا سَلیبِش بَڈّا دات و ”کامپۆل“ نامێن جاگهێا بُرتِش. اے جاگه اَرَمایی زبانا ”جُلْجُتا“ گوَشگَ بیت. 18همۆدا سَلیبِش کشّت. گۆن آییا دگه دو مردمِش هم سَلیب کَشّت، یکّے اے کَشا و یکّے آ کَشا. ایسّا، آ دوێنانی نیاما اَت. 19پیلاتوسئے هُکما مئیارنامگێئے سرا نبشته‌اِش کرت و سَلیبئے سرا دْرتکِش. نبشته اے ڈئولا اَت: ”ایسّا ناسِری - یَهودیانی بادشاه.“ 20چه یَهودیان بازێنێا اے مئیارنامگ وانت، چێا که ایسّائے سَلیب کَشّگئے جاگه چه شهرا دور نه‌اَت و مئیارنامگ اِبرانی و لاتینی و یونانی زبانان نبیسگ بوتگ‌اَت. 21گڑا یَهودیانی مزنێن دینی پێشوایان گۆن پیلاتوسا گوَشت: ”’یَهودیانی بادشاه‘ نبشته مکن، نبشته کن که اے مردا گوَشتگ من یَهودیانی بادشاه آن.“ 22پیلاتوسا گوَشت: ”آ چیزّ که من نبشته کرتگ، بدلَ نبیت.“

23سَلیب کَشّگئے وهدا، پئوجیان ایسّائے پُچّ زرتنت، چار بهرا بهر کرتنت، په هر پئوجیێا یکّ بهرے. بله ایسّائے جامگ مَنت که هچّ چاکی پِر نه‌اَت، سَرا تان پادا یَک‌گواپ اَت. 24گڑا آیان وت‌مان‌وتا گوَشت: ”بیاێت، اِشیا ندِرّێن، اِشیئے سرا لاٹری و کُرَه‌کشّیَ#19‏:24 لاٹری و کُرَه‌کشّی بزان چِک و پُشت، تَرّ و هُشک. کنێن، چارێن بارێن کئیا رسیت؟“ هما ڈئولا که هُدائے پاکێن کتابَ گوَشیت، هما ڈئولا بوت:

”منی پُچِّش وت‌مان‌وت بهر کرتنت و

جامگئے سرا کُرَه‌کشّی‌اِش کرت.“ # 19‏:24 زَبور 22‏:18.

پئوجیان همے کار کرت.

25سَلیبئے نزّیکّا ایسّائے مات و ماتئے گهار و کْلیوپاسئے جَن مَریَم و مَریَم مَگدَلینی اۆشتاتگ‌اَتنت. 26وهدے ایسّایا وتی مات دیست که هما دۆستێن مُریدئے کِرّا اۆشتاتگ، گۆن ماتا گوَشتی: ”او بانُک! اے تئیی چُکّ اِنت.“ 27رَندا گۆن وتی مُریدا گوَشتی: ”اے تئیی مات اِنت.“ آ مُریدا چه هما وهدا مَریَم برت و وتی لۆگا داشت.

ایسّا ساهَ دنت

(مَتّا 27‏:45‏–50؛ مَرکاس 15‏:33‏–37؛ لوکا 23‏:44‏–46)

28نون ایسّایا دیست که سجّهێن چیزّ سَرجم بوتگ‌اَنت گڑا پاکێن کتابئے هبرئے راست و سَرجم بئیَگئے هاترا گوَشتی: ”تُنّیگ آن.“#19‏:28 بچار: زَبور 22‏:15؛ 69‏:21. 29چه تْرپشێن شرابا پُرّێن کونزگے اۆدا اێر اَت. آیان اِسْپنجے#19‏:29 اِسْپنج، بزان پُژّ، پُکّی. زرت و شرابێن کرت، زوپائے#19‏:29 زوپا کسانێن درچکے که اِنگرێزیا ”hyssop“ و پارسیا ”زوفا“ گوَشنتی. ٹالێئے سرا بست و ایسّائے لُنٹان پِر مُشت. 30وهدے ایسّایا شراب دپ جت، گوَشتی: ”کار هلاس بوت!“ رَندا سری جَهل کرت و ساهی دات.

ایسّایا نئیزهَ جننت

31آ رۆچ، شَبّتئے تئیاریئے رۆچ اَت. یَهودیان نلۆٹت که سلیب کَشّتگێنانی جۆن و جَسَد شَبَّتئے رۆچا سَلیبئے سرا لۆنجان ببنت، چێا که اے هاسێن شَبَّتے اَت. پمێشکا چه پیلاتوسا دَزبندی‌اِش کرت که آ سئیێنانی پادان پرۆش و چه سَلیبانی سرا اێرِش گێج. 32گڑا پئوجی دێما آتکنت و هما دوێنانی پادِش پرۆشتنت که گۆن ایسّایا سَلیب کَشّگ بوتگ‌اَتنت، پێسرا یکّێئے و پدا دومیئے. 33ایسّائے کِرّا که آتکنت، دیستِش که آییا ساه داتگ. پمێشکا آییئے پادِش نپرۆشتنت. 34بله چه پئوجیان یکّێا، نئیزَهے#19‏:34 نئیزه، بزان نێزه. ایسّائے کَش و پهناتا جت و هما دمانا چه آییئے جۆنا هۆن و آپ در آتک. 35هما کسا که چَمِّ وت اے چیزّ دیستگ‌اَنت، شاهدیَ دنت تانکه شما ایمان بیارێت. آییئے شاهدی راست اِنت. آ زانت که من راستَ گوَشان. 36اے کار هما ڈئولا بوت تانکه پاکێن کتابئے اے هبر راست و سَرجم ببیت که گوَشیت: ”آییئے هچّ هڈّ پرۆشگَ نبیت.“#19‏:36 دَررئو 12‏:46. 37پاکێن کتاب دگه یکّ جاگهے هم گوَشیت: ”آ هماییا چارنت که آییئے جانِش ٹُنگ ٹُنگ کرتگ.“#19‏:37 زَکَریا نبیئے کتاب 12‏:10.

ایسّائے کَبر کنگ

(مَتّا 27‏:57‏–61؛ مَرکاس 15‏:42‏–47؛ لوکا 23‏:50‏–56)

38رَندا، ایسُّپ نامێن مردے که اَریماتیائے شهرئے نندۆک اَت، پیلاتوسئے کِرّا شت و ایسّائے جۆنی لۆٹت. آ ایسّائے مُریدے اَت بله چێرُکایی، چێا که چه یَهودیانَ تُرسِتی. پیلاتوسا اِجازت دات و آییا جۆن برت. 39نیکودیموس، هما که پێسرا شپے ایسّائے گِندگا شتگ‌اَت، آتک و گۆن وت لهتێن هۆر و هئوارێن مُرّ و ائوود و کَرْزاَرواهی آورت که سی کیلوئے کِساسا#19‏:39 اَسلیگێن یونانی نبشتانکَ گوَشیت: ”سد لیترا“. یکّ لیترے کِساس سئے سَد گِرام اِنت. اَتنت. 40نون آیان ایسّائے جۆن زرت و یَهودیانی کَبر و کَپنئے رسمانی رِدا، گۆن آ وشبۆان لیلُمێن#19‏:40 لیلُم، گُدئے تَهرے که اَنگرێزیا ”linen“ گوَشگَ بیت. پٹّیان پتات. 41هما جاگهئے نزّیکّا که ایسّا سَلیب کشّگ بوت، باگے هست‌اَت که اۆدا نۆکێن کَبرے جتگ‌اَتِش و اَنگت کَسّ آییئے تها کَبر کنگ نبوتگ‌اَت. 42یَهودیانی تئیاریئے رۆچ اَت و کَبر نزّیکّا اَت، پمێشکا ایسّائے جۆنِش همۆدا کَبر کرت.

Currently Selected:

یوهَنّا 19: HPKB

Highlight

Copy