یوهَنّا 18

ایسّائے دَزگیر بئیگ

(مَتّا 26‏:47‏–56؛ مَرکاس 14‏:43‏–52؛ لوکا 22‏:47‏–53)

1ایسّایا اے هبر کرتنت و نون گۆن وتی مُریدان کِدْرونئے دَرَگئے#18‏:1 دَرَگ، بزان وادی، گوَتر. آ دستا شت. اۆدا باگے هست‌اَت، ایسّا و آییئے مُرید همۆدا شتنت. 2ایسّائے دْرۆهۆک#18‏:2 درۆهۆک، بزان هما که وتی همراها رَدَ دنت و بها کنت. یَهودایا آ جاگهَ زانت، چێا که ایسّا و آییئے مُرید گێشتر همۆدا یکجاهَ بوتنت. 3گڑا یَهودایا، رومی پئوجی و پَریسی و مزنێن دینی پێشوایانی دێم داتگێن لهتێن سپاهیگ زرت و هما باگا برتنت. آیان چِراگ و مَشَل#18‏:3 مَشَل، بزان بَتّی، ٹارچ. و سِلاه گۆن اَت. 4ایسّایا زانت گۆن من چے بئیگی اِنت، دێما شت و جُستی کرت: ”شما کئیی شۆهازا اێت؟“ 5پسّئواِش دات: ”ایسّا ناسِریئے.“ گوَشتی: ”من آن!“ ایسّائے دْرۆهۆک یَهودا هم همۆدا اۆشتاتگ‌اَت. 6وهدے ایسّایا گوَشت: ”من آن،“ آ مردم پُشتا کِنزت و زمینا کپتنت. 7پدا گوَشتی: ”کئیی شۆهازا اێت؟“ آیان گوَشت: ”ایسّا ناسِریئے.“ 8ایسّایا درّاێنت: ”من وَه شمارا گوَشت که من آن. اگن منی شۆهازا اێت، اِشان بِلّێت که رئونت.“ 9ایسّایا چۆ گوَشت که آییئے پێسریگێن هبر راست و سَرجم ببیت: ”آ که تئو منا داتگ‌اَتنت، چه آیان کَسّ گار و بێگواه نبوت.“#18‏:9 بچار: یوهَنّائے اِنجیل 6‏:39.

10شَمون‌پِتْرُسا زَهمے گۆن اَت. همے وهدا، وتی زَهمی کَشّت، زْرابے جت و مسترێن دینی پێشوائے نئوکرئے راستێن گۆشی بُرّت. نئوکرئے نام مَلکاس اَت. 11ایسّایا گۆن پِتْرُسا گوَشت: ”وتی زَهما جُتکا#18‏:11 جُتک، بزان زَهم یا کارچئے جِلد، پۆش، نیام. کن! من آ پیالها نۆش مکنان که پتا منا داتگ؟“

12گڑا رومی پئوجی و آیانی سرمستر و یَهودی سپاهیگان، ایسّا دَزگیر کرت و بَست. 13ایسّااِش پێسرا هَنّائے کِرّا برت. هَنّا کئیاپائے جَنئے پت اَت و آ سالا کئیاپا مسترێن دینی پێشوا اَت. 14اے هما کئیاپا اَت که یَهودیانا اے سۆجی داتگ‌اَت که کئومئے جاها یکّ مردمێئے مِرَگ شرتر اِنت.

پِتْرُسئے اِنکار

(مَتّا 26‏:69‏–70؛ مَرکاس 14‏:66‏–68؛ لوکا 22‏:54‏–57)

15شَمون‌پِتْرُس و دگه مُریدے ایسّائے پدا رئوان بوت و شتنت. آ دگه مُریدا گۆن مسترێن دینی پێشوایا پَجّارۆکی هست‌اَت، پمێشکا گۆن ایسّایا مسترێن دینی پێشوائے لۆگئے پێشگاها#18‏:15 پێشگاه، بزان پێشجاه، لۆگئے چاردیوال، سَهن. پُترت. 16بله پِتْرُس ڈنّا دَروازگئے نزّیکّا اۆشتات. گڑا آ مُرید که گۆن مسترێن دینی پێشوایا پَجّارۆک اَت، ڈنّا در آتک، گۆن دَروازگپانێن مۆلدا چیزّے گوَشتی و پِتْرُسی تۆکا برت. 17دَروازگپانێن مۆلدا گۆن پِتْرُسا گوَشت: ”زانا، تئو چه اے مردئے مُریدان نه‌ائے؟“ آییا گوَشت: ”نه، نه‌آن!“ 18هِزمتکار و سپاهیگان آسے رۆک کرتگ‌اَت، چێا که شپ سارت اَت. آسئے کِرّا اۆشتاتگ‌اَتنت و وتا تاپگا اَتنت. پِتْرُس هم آیانی کِرّا اۆشتاتگ‌اَت و وتا تاپگا اَت.

چه ایسّایا جُست و پُرس

(مَتّا 26‏:59‏–68؛ مَرکاس 14‏:55‏–65؛ لوکا 22‏:63‏–71)

19همے درگتا مسترێن دینی پێشوایا چه ایسّایا، آییئے مُریدانی بارئوا و تالیمئے بارئوا جُست و پُرس کرت. 20ایسّایا پَسّئو دات: ”من سجّهێن دنیائے دێما وتی هبر کرتگ‌اَنت. مُدام کَنیسَهان و مزنێن پرستشگاها تالیمُن داتگ، همۆدا که سجّهێن یَهودی مُچَّ بنت. من چێرُکایی هچّ هبرے نکرتگ. 21گڑا چێا چه من جُستَ گرئے؟ چه همایان جُست بگر که منی هبرِش اِشکتگ‌اَنت. آ زاننت که من چے گوَشتگ.“ 22وهدے ایسّایا اے هبر کرتنت، همۆدا اۆشتاتگێن سپاهیگێا ایسّائے دێما شَهماتے جت و گوَشتی: ”مسترێن دینی پێشوایا اے ڈئولا پَسّئوَ دئیئے؟“ 23ایسّایا درّاێنت: ”اگن من رَدێن هبرے کرت، منا مئیاریگ بکن. بله اگن من راست گوَشت، چێا منا جنئے؟“ 24گڑا هَنّایا ایسّا مسترێن دینی پێشوا کئیاپائے کِرّا دێم دات. ایسّائے دست اَنگت بَستگ‌اَتنت.

پِتْرُسئے دومی و سئیمی اِنکار

(مَتّا 26‏:71‏–75؛ مَرکاس 14‏:69‏–72؛ لوکا 22‏:58‏–62)

25شَمون‌پِتْرُس همۆدا اۆشتاتگ‌اَت و وتا تاپگا اَت. جُستِش کرت: ”زانا، تئو چه آییئے مُریدان یکّے نه‌ائے؟“ آییا نمَنّت و گوَشتی: ”نه، نه‌آن.“ 26چه مسترێن دینی پێشوائے هِزمتکاران یکّے هما مردئے سیاد اَت که پِتْرُسا آییئے گۆش بُرِّتگ‌اَت. گۆن پِتْرُسا گوَشتی: ”من وَه ترا گۆن آییا هما باگا دیست. تئو هما نه‌ائے؟“ 27پِتْرُسا پدا نمَنّت. هما دمانا کرۆسا بانگ دات.

ایسّا پیلاتوسئے دێما

(مَتّا 27‏:11‏–26؛ مَرکاس 15‏:1‏–15؛ لوکا 23‏:1‏–5‏؛ 23‏:13‏–25)

28ایسّااِش چه کئیاپائے کِرّا رومئے والیئے کلاتا برت. اے وهدا سُهب ماهلّه اَت و یَهودی والیئے کلاتا نشُتنت که ناپاک مبنت و سَرگوَزئے ائییدئے ورگا وارت بکننت. 29گڑا پیلاتوس ڈَنّا در آتک و چه آیان جُستی کرت: ”اے مردئے سرا شمئے بُهتام چے اِنت؟“ 30آیان پَسّئو دات: ”اگن مئیاریگ مبوتێن، ما تئیی دستا نداتگ‌اَت.“ 31پیلاتوسا گوَشت: ”اِشیا ببرێت و وتی شَریَتئے هسابا په اِشیا شئور و هُکمے ببُرّێت.“ یَهودیان گوَشت: ”مارا اے اجازت نێست که کَسێا مَرکئے سزا بدئیێن.“ 32اے ڈئولا بوت تانکه ایسّائے هما هبر راست و سَرجم ببیت که وتی مرکئے وَڑ و پئیمئے بارئوا کرتگ‌اَتی.

33نون پیلاتوس وتی کلاتا شت و ایسّایی همۆدا لۆٹاێنت و گوَشتی: ”هئو! تئو یَهودیانی بادشاه ائے؟“ 34ایسّایا گوَشت: ”اے تئیی جندئے هبر اَنت یا دگران منی بارئوا ترا اے ڈئولا گوَشتگ؟“ 35پیلاتوسا گوَشت: ”زانا، من یَهودیے آن؟ تئیی وتی کئوم و مزنێن دینی پێشوایان ترا منی دستا داتگ. تئو چے کرتگ؟“ 36ایسّایا گوَشت: ”منی بادشاهی دنیایی بادشاهیے نه‌اِنت. اگن منی بادشاهی دنیایی بادشاهیے بوتێن، منی هِزمتکاران جنْگ کرتگ‌اَت که من یَهودیانی دستا مکپان. بله منی بادشاهی دنیایی بادشاهیے نه‌اِنت.“

37پیلاتوسا گوَشت: ”اَچه، تئو بادشاهے ائے؟“ ایسّایا گوَشت: ”تئو وت منا بادشاهے گوَشگا ائے. من پێدا بوتگ و دنیایا آتکگان که په راستیا گواهی بدئیان. هرکَسا که راستی دۆستَ بیت، منی هبران گۆشَ داریت.“ 38پیلاتوسا درّاێنت: ”راستی چے اِنت؟“ اے هبرئے کنگا رند پیلاتوس پدا یَهودیانی کِرّا شت و گوَشتی: ”من هچّ چُشێن بُنیادے نگندان که اے مردا مئیاربار بکنان. 39بله شمارا رسمے هست که من سَرگوَزئے ائییدئے رۆچا یکّ بندیگے په شما آزات بکنان. شما لۆٹێت که من یَهودیانی بادشاها په شما آزات بکنان؟“ 40آیان کوکّار کرت و پسّئو دات: ”نه، آییا نلۆٹێن! بَرَبّاسا آزات کن!“ بَرَبّاس یاگیے اَت.

Currently Selected:

یوهَنّا 18: HPKB

Highlight

Copy