پێدایش 43

دێم په مِسرا براتانی دومی سپر

1مُلک سکّ ڈُکّال اَت و 2وهدے آیان چه مِسرا آورتگێن دان وارت و هلاس کرتنت، پتا گوَشت: ”پدا برئوێت و په ما کَمّے وَرد و وراک بگرێت.“ 3بله یَهودایا گۆن آییا گوَشت: ”آ مردا مارا په ترُندی هبردار کرت و گوَشت: ’اگن شمئے برات گۆن شما گۆن نبوت، منی دێما مکپێت.‘ 4اگن تئو مئے براتا گۆن ما راه بدئیئے، ما رئوێن و په تئو وَرد و وراکَ گِرێن، 5بله اگن تئو آییا گۆن مکنئے، ما نرئوێن. چێا که آ مردا گوَشت: ’اگن شمئے برات گۆن شما گۆن نبوت، منی دێما مکپێت.‘“ 6اِسراییلا جُست کرت: ”شما چێا آ مرد هال دات که مارا دگه براتے هست و اے پرێشانی منی سرا آورت؟“ 7پَسّئوِش دات: ”آ مردا مئیگ و مئے هاندانئے بارئوا هر چیزّئے جُست کرت: ’شمئے پت اَنگت زندگ اِنت؟ شمارا دگه برات هم هست؟‘ ما آییئے جُستانی پَسّئو داتنت. ما چۆن بزانتێن که آ گوَشیت: ’وتی براتا اِدا بیارێت‘؟“ 8گڑا یَهودایا گۆن وتی پت اِسراییلا گوَشت: ”بچکّا گۆن من همراه کن. ما همے دمانا پادَ کاێن و رهادگَ بێن که ما و تئو و مئے چُکّ زندگ بمانێن و ممرێن. 9من وت آییئے سلامتیئے زِمّها زوران. آییا چه منی دستا بلۆٹ. اگن من تئیی چُکّ پدا نئیاورت و په تئو سر نکرت، تان زندگ آن تئیی گنهکار آن. 10اگن ما اینچُک مهتل مبوتێنێن، تان اے وهدی دو رندا شتگ و آتکگ‌اَتێن.“

11گڑا آیانی پت اِسراییلا گوَشت: ”اگن اَلّمی اِنت، گڑا چُش کنێت که چه مُلکئے شَرتِرێن چیزّان لهتێن وتی پێلِکان#43‏:11 پێلِک، بزان چه گُد یا پۆستا جۆڑ کرتگێن مزنێن کیسّگ، بئیگ. کنێت و په آ مردا ٹێکی برێت گۆن. کمّے بام، کَمّے بێنگ، سُسُرّ و پِسته و بادام و وَشبۆ برێت گۆن. 12دو سَری#43‏:12 دو سَری، بزان دو برابر، دو رندا، دو همینچُک. نُگره بَرێت گۆن که شمارا هما نُگره پدا دئیگی اَنت که شمئے گۆنیانی دپ دپا اێر کنگ بوتگ‌اَتنت. بلکێن په رَدی چۆ بوتگ. 13وتی براتا هم برێت گۆن. تَچکا آ مردئے کرّا برئوێت. 14پُرواکێن هُدا آ مردا په شما رهمدل کنات که شمئے آ دگه براتا و بِنیامینا گۆن شما آیگا بِلّیت. بله اگن من چُکّ باهێنتنت وَه منی بَهت و نَسیب.“

15گڑا مَردان ٹێکی و دو سَری نُگره و بِنیامین زرت و راه گِپتنت. مِسرا که رَستنت، ایسُّپئے دربارا آتک و اۆشتاتنت. 16وهدے ایسُّپا دیست که بِنیامین گۆن اِنت، وتی لۆگئے پێشکاری#43‏:16 پێشکار، بزان هما هِزمتکار که لۆگئے کارانی زِمّهوار اِنت و اے دگه هِزمتکارانی مستر اِنت. گوَشت: ”اے مردمان منی لۆگا بیار. پَس و کۆش کن و ورگے تئیار کن که اے مردم سُبارگا منی کِرّا اَنت.“ 17پێشکارا هما پئیم کرت که ایسُّپا گوَشت. مردمی ایسُّپئے لۆگا آورتنت. 18وهدے مردم ایسُّپئے لۆگا آرگ بوتنت، تُرس و لَرز اَتنت. گوَشتِش: ”مارا هما نُگرهانی سئوَبا اِدا آورتَگِش که پێسری رندا مئے گۆنیان مان کنگ بوتگ‌اَتنت. نون اے مَرد مئے سرا اُرُش کنگ و مارا زێردست کنگَ لۆٹیت که مئے جندا گُلام بکنت و هران هم ببارت.“

19گڑا آ ایسُّپئے پێشکارئے کرّا شتنت و لۆگئے دروازگئے دپا گۆن آییا هبرِش کرت. 20گوَشتِش: ”واجه! ائولی رندا که ما اِدا په وراکئے گرگا آتکێن، 21پِر تَرّگا ما شپا یکّ جاگهێا داشت. ما وتی بار که بۆتکنت، دیستِن که چه ما هرکَسئے نُگره سَرجمیا آییئے جندئے گۆنیئے دپ دپا اێر اَنت. نون ما اے نُگره پدا آورتگ‌اَنت گۆن. 22ما په وراکئے گِرَگا دگه نُگره هم آورتگ گۆن. نزانێن بارێن کئیا اے نُگره پدا مئے گۆنیان مان کرتگ‌اَنت.“ 23پێشکارا گوَشت: ”پَرواه نێست. متُرسێت. شمئیگ و شمئے پتئے هُدایا اے گَنج گۆنیان مان کرتگ. شمئے نُگره منا رَستگ‌اَنت.“ نون شَمونی آیانی کِرّا آورت.

24پێشکارا آ ایسُّپئے لۆگا برتنت، آپی داتنت که وتی پادان بشۆدنت و په آیانی هران کاه و کدیمئے تئیاری‌ای هم کرت. 25تان ایسُّپئے آیگا، نێمرۆچئے وهدا، آیان وتی ٹێکی تئیار کرتنت، چێا که اِشکتگ‌اَتِش که ما سُبارگا همِدا اێن.

26ایسُّپ که لۆگا آتک، آیان وتی آورتگێن ٹێکی داتنت و ایسُّپئے دێما سَرِش په اَدب جَهل کرت. 27ایسُّپا آیانی هال جُست کرت و گوَشتی: ”شمئے پیرێن پت که شما آییئے بارئوا گۆن من هبر کرتگ‌اَت، چۆن اِنت؟ اَنگت هست و سَلامت اِنت؟“ 28آیان پَسّئو دات: ”تئیی هِزمتکار، مئے پت اَنگت هست و سَلامت اِنت.“ آیان ایسُّپئے دێما په اَدب سر جَهل کرت. 29ایسُّپا سر چست کرت، چمّی وتی هَکّیگێن برات بِنیامینا کپتنت. جُستی کرت: ”اے شمئے هما کَسترێن برات اِنت که شما نام گِپتگ‌اَت؟“ ایسُّپا گۆن بِنیامینا گوَشت: ”هُدا په تئو مهربان بات، منی چُکّ!“

30گۆن براتئے گِندگا ایسُّپا وتی دل داشت نکرت. زوتّ زوتّا پاد آتک و په گرێوَگا جاگهێئے شۆهازا بوت. گڑا وتی جندئے کۆٹیا شت و همۆدا گرێتی. 31رندا چمّی شُشتنت و در آتک. دلی داشت و گوَشتی: ”وَرگان بیارێت.“ 32په ایسُّپا جتا پَرزۆنَگے#43‏:32 پَرزۆنَگ، بزان سُپره. پَچِش کرت و په آییئے براتان جتا. هما مِسری که اۆدا ورگا اَتنت، آیانی پَرزۆنَگ هم جِتا اَت، چێا که مِسریان گۆن اِبرانیان هۆر ورگَ نئوارت. آیانی نِزّا اے سکّێن بَژّناکێن کارے اَت. 33برات، ایسُّپئے دێما اُمرئے هسابا نادێنگ بوتگ‌اَتنت، مستر مسترێنا بگر تان کَستر کَسترێنا. ائولی چُکّ وتی پێدائِشی هَکّئے هسابا و کَسترێن، وتی کَستریئے هسابا. پمێشکا برات په هئیرانی یکدومیا چارگا اَتنت. 34وهدے چه ایسُّپئے پَرزۆنَگا آیانی بهرا دئیگا اَتنت، بِنیامینا چه آ دگران پنچ سری گێشتر رست. گۆن ایسُّپا شرابِش وارت و وشّێن وهدے گوازێنتِش.

Currently Selected:

پێدایش 43: HPKB

Highlight

Copy