پێدایش 28

1اِساکا آکوب لۆٹاێنت و برکت دات. هُکمی دات و گوَشتی: ”کَنهانی جنکّے سانگ مکن. 2زوتّ پَدّان‌اَراما برئو، وتی ماتئے پت بِتوێلئے لۆگا. همۆدا، گۆن وتی ماتئے برات لابانئے جنکّێا سور کن. 3پُرواکێن هُدا ترا بَرکت بدئیات و پُرسَمَر کنات. ترا گێشا گێش کنات و تئو کئومانی رُمبے باتئے. 4هُدا ترا و تئیی نَسل و پَدرێچا هما برکتا بدئیات که اِبراهێمارا داتگی، که هما سرڈگارئے واهند ببئے که انّون اۆدا دَرامدێئے پئیما زند گوازێنگا ائے، هما سرڈگار که هُدایا اِبراهێمارا بَکشاتگ.“ 5گڑا اِساکا آکوب راه دات و آکوب پَدّان‌اَراما بِتوێل اَرَماییئے چُکّ لابانئے کِرّا شت. لابان، ایسّو و آکوبئے مات رِبِکّائے برات اَت.

6ایسّو سهیگ بوت که اِساکا آکوب بَرکت داتگ و پَدّان‌اَراما رهادگ کرتگ که همۆدا جَنے بگیپت. آ اے گپّا هم سهیگ بوت که بَرکت دئیگئے وهدا اِساکا آکوب هُکم داتگ که: ”کَنهانی جنکّے سانگ مکن“ و 7آکوبا پت و ماتئے هبر گپتگ و پَدّان‌اَراما شتگ. 8نون ایسّو سرپد بوت که کَنهانی جنێن منی پت اِساکا چینچُک نادۆست اَنت. 9پمێشکا اِسماێلئے کِرّا شت و وتی پێسری جَنانی سَرا، اِبراهێمئے اِسماێلێن چُکّئے جنکّی گِپت. جنکّئے نام مَهالَت اَت و نِبایوتئے گهار اَت.

آکوبئے واب

10آکوب چه بێرشێبَها در آتک و دێم په هارانا شت. 11یکّ جاگهێا که رست، شپا همۆدا داشتی، چێا که رۆچ اێر شتگ‌اَت. هما جاگها سِنگے زرت و سرئے چێرایی کرت و تچک بوت. 12وابے دیستی تَه پَدانکے#28‏:12 پَدانک چه دار، آسِن یا سِمِٹّ و هِشتا جۆڑ کرتگێن پَدَگے که په سر کپگ و اێر کپگا کاریَ بندنت. که یکّ سَرے زمینا اِنتی و دومی سَر آسمانا و هُدائے پرێشتگ سرَ کپنت و اێرَ کپنت. 13هُداوند چه پَدانکا بُرزتر اۆشتاتگ‌اَت. گوَشتی: ”من هُداوند آن، تئیی پت اِبراهێمئے هُدا و اِساکئے هُدا. اے زمینئے سرا که تئو انّون وپتگئے، من اِشیا ترا و تئیی نَسل و پَدرێچارا دئیان. 14تئیی چُکّ و نُماسگ زمینئے هاکانی کِساسا بازَ بنت و شما رۆدراتک و رۆنند و شمال و جنوب، چارێن نێمگان تالانَ بێت. زمینئے سجّهێن کئوم تئیی و تئیی نَسل و پَدرێچئے سئوَبا بَرکتَ گرنت. 15بچار، من گۆن تئو گۆن آن و هر کجا که رئوئے تئیی چار و گُزارا کنان و ترا پدا همے سرڈگارا کاران. تانکه من گۆن تئو وتی کئول پوره نکرتگ، ترا یلهَ ندئیان.“ 16آکوب که چه وابا پاد آتک، گۆن وت گوَشتی: ”بێشَکّ هُداوند همے جاگها اِنت و من نزانتگ.“ 17تُرسِت و گوَشتی: ”اے جاگه دلا آپَ کنت. اے اَلّما هُدائے جندئے لۆگ اِنت، اَرشئے دروازگ اِنت.“ 18دومی سُهبا ماهلّه آکوب پاد آتک، وتی سرئے چێرئے سِنگی زُرت و چێدَگے#28‏:18 چێدَگ، بزان په نِشان مِکّ کرتگێن یا کۆت کرتگێن سِنگ و ڈۆک. اَڈّی کرت و رۆگنی پِر رێتک. 19آ جاگهئے نامی بئیت‌اێل#28‏:19 بئیت‌اێل، بزان هُدائے لۆگ. کرت. چۆناها آ شهرئے نام پێسرا لوز اَت.

20نون آکوبا کئولے کرت، گوَشتی: ”اے سپرا که من رئوَگا آن، اگن هُدا گۆن من گۆن ببیت و منی پاسپانیا بکنت، اگن منا په ورگا نگن و پۆشگا پُچّ بدنت، 21که په سلامتی پِر بترّان و وتی پتئے لۆگا برسان، گڑا هُداوند منی هُدا بیت. 22اے سِنگ که من په چێدَگ مِکّ کرتگ، هُدائے لۆگَ بیت. هرچے که تئوِ هُدا منا دئیئے، آییئے دَه‌یَکّا اَلّما ترا دئیان.“

Currently Selected:

پێدایش 28: HPKB

Highlight

Copy