Luka 2
2
Kubutuakua Yesu.
Mat. 1:18-25; 2:1; Yoana 1:14.
1Ku bindi bibio mulembe watukile ku Kaisa Augusto, buno kisi kinsania kisanzue meina. 2Lilio liabezaga isanzo lia kulinga ulilio isanzo liabezaga mu nkungu za Kuilino, mukota wa Sulia. 3Nu bantu bansania bendile kusanzua, na muntu na muntu mu muino wage. 4Nu Yosefu bubo nuwe atukile ku Galela, kutuka ku muino wa Nazaleta, nu endile ku Yudaya, mu muino wa Davidi wamanagua Betelehema, kubuno abezaga muntu wa numba nu kikanga kia Davidi; 5buno asanzue na Malia, kubuno amuandile, nuwe abezaga neiyimi. 6Nu gabeikede kuko, kindi kiage kia kubuta kiakukile. 7Nu abutile muana mutangi wamulume; nu amugondile neisusi, nu amuyombekizie mu sanduku zalilaga mu nyama, kubuno takuamonekile kiziki mu numba za bageni.
Balangi ba Mikoko Bekuvua Kulola Yesu.
8Nu mu kisi kikio muabezaga balangi ba mikoko bazilangaga mu kindi. 9Nu mugenzi wa Mukota wababaside kitangala besi, nu malebo ma Mukota mabasanine kunsania: nu bakule boba nunse. 10Nu mugenzi wabuide bune, Tamunakua boba; kubuno namuvuila na musagu musoga wa mbogimbogi nene zikaba ku bantu bansania: 11kubuno abutua lelo mu muino wa Davidi, U Monia, Klisto Mukota. 12Nu kakano keli kalolesio kumuli: buno muamone muana agondua neisusi, ayombekibua mu sanduku zaliaga mu nyama. 13Nu kazanga kongo gababezaga na wozo mugenzi, iyombo lia muigulu liavule, nu liaganuine Kalaga, nu batendaga bune,
14Lutanuno ku Kalaga wa muigulu nunse,
Nu bubobelelo ku kisi nu ku bantu bamutananizia.
15Nu gabeide migenzi zasubia kuigulu, babo balangi batendeine, bune, Tuendazi ku Betelehema, nu kumona ku bubo buabako, buatumenesia Mukota. 16Nu basasizie kuvua, nu bamonine ku Malia nu Yosefu nu muana mu sanduku zalilaga mu nyama. 17Nu gabamumonineko, nu basambeide misagu zibatendagua za wozo muana. 18Nu bansania gabongule ku bubo bangamine ku bubo bubabulagua na balangi. 19Tondo Malia akengede bitondo bibino binsania nu abibisile mu mutima wage. 20Nu balangi basubizie nu batanuine Kalaga ku bitondo binsania bibonguleko nu bibamonineko.
Yesu Ekumonesibua.
Lk. 1:59.
21Nu gakukile bindi kinana bia kumumonesia, einikilue izina buno, YESU, anga buatendagua na mugenzi nti nteba muiyimi.
22Nu gakukile bindi bia kuengibua ku mulembe wa Mose bendile nage ku Yelusalema, kumukasana ku Mukota 23(anga buasanzilue ku mulembe wa Mukota buno, Na muana na muana mutangi wamulume wabutua amanue buno, wasililila ku Mukota), 24nu kukasana kisansa anga buatendilue mu mulembe wa Mukota buno, Nkulimba ibili aba bilinga bibili.
Simeona Ekukasana Yesu ku Kalaga.
25Nu kuabezaga muntu umozi mu Yelusalema, izina liage Simeona; nu wozo abezaga wisanana nu mukatizia, nu alindilaga mbogimbogi za balsalele: nu Muuza Wasililila abezaga gantata gage. 26Nu akengelesizibue na Muuza Wasililila buno, ntakue ndi ntemona ku Klisto wa Mukota. 27Nuwe avule ku numba za kukumbamina asondelezizibua na Muuza: nu babo bamubuta bavule na Muana Yesu mu numba, buno bamukite anga buabezaga lukita lua mulembe, 28nu wenyene amulelile mu maboko mage, nu aganuine Kalaga, nu atendile bune,
29Mukota, kano kaluma itabizia mukiti wobe ende,
Anga buwatendile, mu bubobelelo;
30Kubuno meiso mane mamona ku lonio lobe,
31Lulo luwalongekile ku bansania;
32Luli Kiengi kikasana ku baBilongo, nu malebo ku bantu bobe, baIsalele.
33Nu isi nu nina bangamine na bitondo biatendagua; 34nu Simeona abakitile mponga, nu atendile nina Malia bune, Unguilila, wono muana abikua buno asigulizie nu kusakika beingi beli mu baIsalele; nu kuba kakengelezio kakatendua. 35Nu uwenyene bupanga buakusumite ku mutima wobe; buno makengelo ma mitima za beingi malolesibue.
Ana Ekuganuna Yesu.
36Nu kuabezaga mulengania umozi wa mukikulu Ana, muana wa Fanuele, muntu wa kilongo kia Ase (abezaga mukungu nunse, abezaga na wamulume miaka mutabalamo kutukila bukinga buage, 37nu abezaga musigala miaka zakuka makumi kinana nuinazi), nu ntatukaga mu numba za kukumbamina, aganunaga mu kindi nu mu musi, ntaliaga tondo asegaga. 38Mu nkungu zezo aganuine Kalaga asambalilaga bansania balindilaga bukuluzi bua Yelusalema musagu wage. 39Nubo gabasilile kuzindilizia ikakizio lia mulembe wa Mukota, basubizie ku Galela, kuabo ku muino wa Nazaleta.
40Nu muana akulile, nu abeide na magala, eizeide na menge: nu mponga za Kalaga zabezaga gantata gage.
Yosefu nu Malia nu Yesu Beli Kuisuluko lia Kalaga.
41Nu bamubuta bendaga muaka na muaka ku Yelusalema, ku kisagulo kiesuluko. 42Nu gabezaga ese miaka ikumi nu ibili, bendile anga buabezaga lukita lua kisagulo; 43nu gasilile bibio bindi, basubizie, nu wozo muana Yesu asigeide ku Yelusalema; nu bamubuta tabamenyine buno asigala; 44tondo bakengeide buno abezaga na banyage mu lugendo, nu batingizie busi bumozi mu nzila; nu bamulondile mu mibuto zage nu mu banyage: 45nu gabatamumonineko, basubizie ku Yelusalema, kumulonda. 46Nu kusila kua bindi bisatu bamumonine mu numba za kukumbamina, abezaga eikile gansi gasamba basozi, abonguililaga nu kubabuzia mbuzio: 47nu babo bansania bamunguililaga bangamine na bumenyinino buage, nu ku kuakula kuage. 48Nu bamubuta, gabamonine ku bubo bangamine; nu nina amubuide bune, Muana wane, kubuni kuwatukitila bubuno? nne nu so tuakulondaga na kabebe. 49Nu abatendile bune, Kikizi kimuandondelaga? Ndi tamuizi buno buantananina kuikala mu numba za Tatane? 50Tondo tabamenyinine buabatendaga. 51Nuwe endile nabo ku Nazaleta, nu abanzile; nu nina abikile bitondo binsania mu mutima wage.
52Nu Yesu abeide na menge nu akulile, nu atananizizie Kalaga nu bantu.
Currently Selected:
Luka 2: NTKI57
Highlight
Share
Copy
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
