Luka 3

Bulongeki bua Yoana Bualongekede Yesu.

Mat. 3:1-12; Mk. 1:1-8; Yoana 1:6-8, 15-36.

1Mu muaka wa ikumi neitano wa kuangata kua Tibelio Kaisa; nu Pontio Pilato abezaga muangati wa Yudaya, nu Helode muangati wa Galela, nu Filipo muto wage muangati wa Itulaya, nu Takoniti, nu Lusania muangati wa Alibene, 2nu Anasa nu Kayafa babezaga basankoga banene, idagi lia Kalaga Iiabaside Yoana muana wa Zakalia mu kalula, 3Nu abasile ku kisi kinsania kili buigi na Yadene, asambalaga kubatizibua kua kuiyania kuisigililo lia misako za buagi; 4anga buasanzilue mu mukanda wa malagi ma mulengania Yesaya bune,

Iyuki lia muntu likulaluka mu kalula,

Kungazi nzila za Mukota,

Isiazi matingilo mage,

5Mpinga na mpinga zizazibue,

Nu muiduko na muiduko ukagezibua.

Nu gatimba gakeisibua.

Nu nzila zitutulututulu nti zikeisanana;

6Nubo bansania bamone ku lonio lua Kalaga.#Yesaya 40:3-5.

7Nuwe abuide musanganano babatizibue nage bune, Inyue kikanga kia mpoma nazi wamutendile buno, mutine bongoa bukavua? 8Kolamazi biguma bia kuiyania nu tamukengele kutenda mubenyene buno, tuli na Tateisue Abalahama kubuno Kalaga anavuama kubasizia Abalahama bana mu makozi mamano. 9Kano kaluma isaga liabikua gansi na miti: nu muti unsania utakolama biguma bisoga nti wasesua nu nti weisua mu keiya. 10Nu musanganano wamubuzizie bune, Tukite buni? 11Nu abakuide bune, Muntu uli na nsulu ibili, akase wozo uteli na kampa; nu wono uli neidia akite bubo lingo. 12Nu lingo bandelelombe bavule kubatizibua, nu bamubuide bune, Musozi tukite buni? 13Nu ababuide bune, Tamutikie kampa kutinga bumuakakizizibue. 14Nu bakoloboyo bamubuzizie bune, Tukite buni, nuisue? Nu ababuide bune, Tamubenge muntu umozi nu tamumukandike bitondo; lingo mube na mbogimbogi na lukalilo lueinyu lumukuligua.

15Nu galindilaga bantu bubo buabe, nu bantu bansania bakengeide mu mitima zabo misagu za Yoana, buno embe we U Klisto; 16Yoana akuide bansania bune, Lebelebe nkumubatizia na mazi; tondo wozo wavue antinge, nsiatananina kukandula mizigi za bisalapata biage: nu akamubatizia na Muuza Wasililila nu keiya: 17nu lueli luage luli mu kuboko kuage, nuwe akengia mulungu wage nunse, nu akakundamania mumpunge wage mu kigenge kiage, tondo akagisia mpepa mu keiya katakuzimaga.

18Nu wono abanine mano meingi, nu kubasambalila musagu musoga; 19tondo mukota Helode, azugidue nage ku kabamba ka Helodia mukazi wa muto wage, nu ku bubi bunsania buakitaga Helode, 20atalikide bubuno lingo gantata ga bunsania, akandile Yoana mu kikando.

Yesu Ekubatizibua.

Mat. 3:13-17; Mk. 1:9-11.

21Gabeide bantu bansania basila kubatizibua, Yesu nuwe abatizizibue, nu asegaga, nu igulu liakanduidue, 22nu Muuza Wasililila agelile gantata gage mu mubili wa kisusania kia nkulimba, nu iyuki liatukile muigulu bune, Uwe uli Muana wane, Ngoli zane, nakomana nobe.

Kibuti kia Yesu Klisto.

23Nu gabeide Yesu akuka miaka makumi masatu, alingile kuigisia, bamukengeide buno eli muana wa Yosefu, muana wa Eli, 24muana wa Matata, muana wa Lewi, muana wa Meleke, muana wa Yana, muana wa Yosefu, 25muana wa Matatia, muana wa Amasa, muana wa Nahuma, muana wa Eseli, muana wa Nagei, 26muana wa Mata, muana wa Matatia, muana wa Simi, muana wa Yoseke, muana wa Yoda, 27muana wa Yoana, muana wa Lesa, muana wa Zelubabela, muana wa Salatiele, muana wa Neli, 28muana wa Meleke, muana wa Adi, muana wa Kasama, muana wa Elemadama, muana wa Eli, 29muana wa Yose, muana wa Elieze, muana wa Yolima, muana wa Matata, muana wa Lewi, 30muana wa Simona, muana wa Yuda, muana wa Yosefu, muana wa Yona, muana wa Eleyakima, 31muana wa Melea, muana wa Mena, muana wa Matata, muana wa Natana, muana wa Davidi, 32muana wa Yese, muana wa Obede, muana wa Boaza, muana wa Salamona, muana wa Nasona, 33muana wa Aminadaba, muana wa Ani, muana wa Heselona, muana wa Pelese, muana wa Yuda, 34muana wa Yakobo, muana wa Isaka, muana wa Abalahama, muana wa Tela, muana wa Nako, 35muana wa Seluga, muana wa Leu, muana wa Pelege, muana wa Ebe, muana wa Sela, 36muana wa Kanana, muana wa Apakasade, muana wa Seme, muana wa Noa, muana wa Lemeke, 37muana wa Metusela, muana wa Enoke, muana wa Yelede, muana wa Mahalalele, muana wa Kanana, 38muana wa Enosa, muana wa Sete, muana wa Adama, muana wa Kalaga.

Currently Selected:

Luka 3: NTKI57

Highlight

Copy