Luka 16

Musumo wa Mulangi wa Bikulo.

1Nu atendile lingo beigisibua bage bune, Kuabezaga muntu umozi mugumi, abezaga na mulangi: nu bamubingile kueli buno, agabula bikulo biage. 2Nu amumanine nu amubuide bune, Musagu mukizi wono? tuganze maganzo ma bikulo biguli nabio; kubuno ntualange lingo bikulo biane. 3Nu wozo mulangi eitendile bune, Buni bunikita kubuno mukota wane antikia ku bulangi? Nsinavuama kulima; nu nkukua nsoni kusega. 4Nizi bunakite, buno, gantikie ku bulangi, bansekele ku numba zabo. 5Nu amanine babezaga na nsombi za mukota wage, umozi umozi, atendile wozo mutangi bune, Uli na nsombi inga ku mukota wane? 6Nu atendile bune, Bilingiko lukama bia makiti, nu amutendile bune, Tola mukanda wobe nu usasie kuikala gansi, nu nti wasanza makumi matano. 7Nu atendile na wongo bune, Nuwe, uli na nsombi inga? Nu amutendile bune, Bilingiko lukama bia mumpunge. Nu amutendile bune, Tola mukanda nu usanze makumi kinana. 8Nu wozo mukota aganuine mulangi uteisanana, kubuno akitile na menge: kubuno bana ba kisi kikino nu ba kibuti kiabo beli na menge kutinga bana ba kiengi. 9Nu nne nkumubula bune, Katazi buida na bikulo biteisanana; kubuno, gabikeida, bakamusekela mu biziki bitanakuzinda. 10Nu wono uli mukatizia mu bikeke nunse, nti anaba mukatizia nunse mu bingi; nu wono uteisanana mu bikeke nti ntaneisanana mu bingi nunse. 11Ndi tamuli bakatizia ku bikulo biteisanana, nazi unalemanina kumukasa bikulo biasuaga? 12Nu ndi tamuabezaga bakatizia mu bikulo bia ungo muntu, nazi ukamukasa bienyu mubenyene? 13Takuli mukambi unakitila bakota babili: kubuno asombe umozi, nu kutunda ungo; aba nti anza umozi, nu kubenga ungo. Tamunavuama kukitila Kalaga nu bikulo.

Yesu Ekutenda na baFalese.

14Umpanga baFalese, babo babezaga belami ba bikulo, gabongule kububo bamuzuguide. 15Nu abatendile bune, Inyue mukuibingia ku bantu; tondo Kalaga eizi mitima zeinyu; kubuno kinsania kikutanunua na bantu kili lusombo ku Kalaga. 16Mulembe nu balengania biabezaga aba nu ku Yoana: kutukila nkungu zezo, musagu wa bukota bua Kalaga wasambedue, nu na muntu na muntu nokuiyingizia na magala. 17Tondo buli neibineibi igulu nu kisi bitinge, kuisanzo limozi ikeke lili mu mulembe kutinga.

Yesu Ekutenda bua Kuita Isonga.

Mat. 5:31, 32; 19:3-11; Mk. 10:2-12; I Kol. 7:10-15.

18Na muntu na muntu ukatikagia mukazi, nu kusonga ungo, nti eita meiga: nu unsania wasonga wozo watukibua kuiba, nti eita nuwe meiga.

Musumo wa Lazalo nu Mukota Munene.

19Kuabezaga muntu umozi mugumi, wabezaga wavuala nsulu nsoga zakisimana, nu na busi na busi aliaga busoga; 20nu muzambi umozi izina liage Lazalo abezaga ikala ga kitiko, abezaga na biulu bingi, 21nu atundaga kuembuka na mbobu zakolokaga ku meza za wozo mugumi; nu mboa zavuaga kumulamba ku biulu biage. 22Nu gabede wozo muzambi alekana, migenzi zamuekile ku bukuba bua Abalahama: nu wozo mugumi nuwe alekene nu ayikilue. 23Nu mu Kiziki kia Bakuzi alambuide meiso, ababalagua nu amonine ku Abalahama bulazi, nu Lazalo ku bukuba buage. 24Nu alilile liu atendile bune, Tatane Abalahama, nkue kiombo, nu singa Lazalo, atobe munue wage mu mazi, nu ozie lulami luane; kubuno nkubabalua mu keiya kakano. 25Tondo Abalahama atendile bune, Muana wane, kengela tanga buno wabezaga na bisoga bingi mu kalamo kobe, nu Lazalo nuwe abezaga na bibi: tondo kano kaluma esabogaboga, nu uwe usababala. 26Nu lingo, gatusamba neinyu geli mpembue nnene zabikilue, nu babo bekutunda kutuka kuno nu kuvua kuko kumuli tabanavuama, aba ba kuko kumili tabanabasa kuno. 27Atendile bune, Tatane, nkukusega tanga buno, buli busoga ndi wasinga Lazalo ku numba za tatane; 28kubuno nili na bato bane batano; ende kubasambalila buno, banavua kubabalua kuno. 29Tondo Abalahama amutendile bune, Beli na Mose nu bango balengania; bonguilile tanga babo. 30Nu atendile bune, Tabubo tatane Abalahama; tondo ganenda umozi wa bakuzi, baneiyania. 31Nu amutendile bune, Ndi tabongua ku Mose nu ku bango balengania, aba tondo ganayuka umozi ku bakuzi tabanakatizia.

Currently Selected:

Luka 16: NTKI57

Highlight

Copy