Luka 15

BaFalese Bekugamba Yesu.

1Nu bandelelombe bansania nu bagi bavule buigi nage buno bamunguilile. 2Nu baFalese nu basanzi beizuzumine, nu batendile bune, Wono muntu ekusekela bagi, nu kulia nabo.

Musumo wa Mukoko Waziminaga.

Mat. 18:12-14.

3Tondo abeisile musumo bune, 4Nazi kumuli, ndi eli na mikoko lukama, nu ndi umozi wamuzimina, ndi ntanasiga zezo makumi mubula nu mubula mu kalula, nu kulonda wozo wazimine, aba nu gagumone? 5Nu gagumone, nti aweka ga matuli mage na mbogimbogi. 6Nu gasubie kuage ku numba, nti amane beida bage nu banyage, nu nti ababule bune, Bogazibogazi nanne, kubuno namona mukoko wane wazimine. 7Ububo, bunkumubula, kukaba mbogimbogi nene muigulu ndi muagi umozi eiyania, kutinga beisanana makumi mubula nu mubula, beteli na mpipi ku kuiyania.

Musumo wa Kakulo Kazimine.

8Nazi mukikulu, ndi eli na falanga zage ikumi, nu ndi aziminua na lumozi, ndi ntanagulumizia kasuku, nu kuyagila mu numba, nu kulonda na komanizia, aba nu galumone? 9Nu galumone amane beida bage nu banyage, nu nti ababula bune, Bogazibogazi nanne, kubuno namona lufalanga luane luazimine. 10Ububo, bunkumubula, kuli mbogimbogi kuko kuikile migenzi za Kalaga ndi muagi umozi eiyania.

Musumo wa Muana Wazimine.

11Nu abatendile lingo bune, Muntu umozi abezaga na bana babili bamulume: 12nu muana muto abuide isi bune, Tatane, mpe kiane kindi kia bikulo, nu isibo ababeganizizie bikulo biage. 13Gatingile bindi bimozi, muana muto, akungikile biage, nu endile mu kingo kilongo kia bulazi; nu akasene bibio bikulo kuko ku kabamba ka misako mibi. 14Nu gabede bikulo biage binsania biasila, munganda munene wabede mu kikio kisi; nu alingile kuiyania. 15Nu endile kukita mulimo wa muntu umozi wa kikio kisi; nu amusingile ku masoa mage buno alisie ngulube. 16Nu atundile kuembuka na bisugu bialiaga ngulube: nu takuli muntu umozi wamukasile kena. 17Nu geiyanizie, atendile buno bakambi banga beli na tatane beli neidia lingi, nu nne nili gano nkukua na nzala! 18Nkuzanzuka, nu nende ku tatane, nu namubule bune, Tatane, nagile kuigulu nu kuguli: 19nsiatananina lingo kumanua muana wobe; mbike anga umozi wa bakambi bobe. 20Nu azanzukile, nu avule kuisi. Tondo gabezaga ekili bulazi, isi amumueineko, nu amukuilide kiombo, nu eitumine lubilo nu amukatile geikosi nu amusekeide. 21Nu muana wage amutendile bune, Tatane, nagile kuigulu nu nakuagide: nsiatananina lingo kumanua muana wobe. 22Tondo isi abuide bakambi bage bune, Vuazi yiliyili na nkanzu nsoga nunse, nu mumuvualikiezo; nu muambalikiazi kakomu ku munue, nu bisalapata ku magulu; 23nu vuazi na kiana kia ngombe kianona, nu mukite, nu tuliazi nu tubogazibogazi: 24kubuno wono muana akule, nu alama lingo, azimine, nu amoneka lingo. Nu balingile kubogaboga. 25Nu wozo muana wage wa nkula abezaga ku masoa: gavule nu gakundile buigi na numba, ungule ku nimbo nu ku mamina. 26Nu amanine umozi wa ku bakambi bage, nu amubuzizie buabeide. 27Nu wozo amubuide bune, Muto wobe asubia; nu so eitile kiana kia ngombe kianona, kubuno amumonako lingo bulonge bukata. 28Tondo ongilue, nu ntazigile kuingila: nu isi abasile kumbuga, nu amusegile. 29Tondo akuide isi bune, Unguilila, miaka mingi zinakukambila, nu nsiagide kukakizia kumozi kuobe, nu ntunkasa muana wa mpene buno nibogeboge na beida bane: 30tondo gabasa wono muana wobe, wozo wazikizie bikulo biobe ku lukita lua butazi, uguwitila kiana kia ngombe kianona. 31Nu amuakuide bune, Muana wane, uli nanne bindi binsania, nu binsania biane bili biobe. 32Tondo buli busoga ndi tuabogaboga nu kuba na mbogimbogi; kubuno wono muto wobe akule, nu alama lingo, azimine, nu amoneka lingo.

Currently Selected:

Luka 15: NTKI57

Highlight

Copy