Luka 10

Kusingua kua Beigisibua Makumi Mutuba Kamo. Nu Kusubia Kuabo.

Mat. 10:1-42.

1Kusila kua bubo, Mukota abikile makumi mutuba kamo, nu alingile kusinga babili babili luabusio luage ku muino na muino nu ku kiziki na kiziki, kuakengelaga kuenda wenyene. 2Nu abatendile bune, Matubulo meli meingi, tondo bakambi tabeli beingi; segazi Mukota wa matubulo, buno asinge bakambi mu matubulo mage. 3Endazi; namusinga anga mikoko munkatini mua mboa za mu lubanda. 4Tamueke nsago, aba falanga, aba bisalapata; aba tamusekele muntu mu nzila. 5Nu numba insania zimuingilage muzo, tendazi tanga bune, Bubobelelo bube mu numba zeno. 6Nu ndi muli muana wa bubobelelo, nti bubobelelo bueinyu bube kueli; tondo ndi tamuli, nti buasubie kumuli lingo. 7Nu ikalazi mu numba zili bubo, liazi nu nuazi bibamukasa: kubuno mukambi atananina kuligua lukalilo luage. Tamutuke mu zezo numba nu kuenda kuingo. 8Nu muino na muino gumuabasage mugo, ndi bamusekela, liazi kuidia libamukase: 9nu oniazi basambi beli mumo, nu batendazi bune, Bukota bua Kalaga buse buigi. 10Tondo muino na muino umuingilage mugo, nubo tabamusekela mumo, nuinyue gamuatinge mu nzila zago tendazi bune, 11Mukungu wa wozo muino weinyu, wabezaga ku magulu meitu, tuagutitula gantata geinyu: tondo menyazi buno bukota bua Kalaga buse buigi. 12Nkumubula bune, Lusungio lua wozo muino lukatinga lua Sodomo mu busi bubo.

Yesu Ekubula Lusungio ku Mino Zikusomba Kalaga.

Mat. 11:20-24.

13Kabebe ku Kolazina! kabebe ku Betesaida! songo makitilo manene makitilue kumuli, songo umakitilue ku Tula nu Sidona, songo beyanizie kalazi, banekeide mu nsulu za nsago nu mu luito. 14Tondo lusungio lua Tula nu Sidona lukaba neibineibi, ku busi bua lusungio kutinga lusungio lueinyu. 15Nu uwe Kapenuma, ndi ukabakamibua aba kuigulu? ukakegibua ku Kiziki kia Bakuzi. 16Wamungua nti anungua, nu wamusomba nti ansomba; nuwe wansomba nti asomba wozo wansingile.

17Nu babo makumi mutuba kamo basubizie na mbogimbogi nunse, nu batendile bune, Mukota, basumbu batuanzile kuizina liobe. 18Nu abatendile bune, Namonine ku Satana anga nkuba akoloka kutuka kuigulu. 19Unguililazi, namukasa buangato bua kunyanta nzoka nu nkutu, nu kuangata muiti: nu takuli kampa kakamuita nunse. 20Tondo tamubogeboge kubuno basumbu bakumuanza; tondo bogazibogazi buno, meina meinyu masanzua muigulu.

21Mu nkungu zezo abogilebogile mu Muuza Wasililila, nu atendile bune, Nkukusima, Tatane, Mukota wa muigulu nu wa kisi, kubuno wabisile bubuno ku beli na menge nu beli na bumenyinino, nu wabulolesizie ku bana; Tatane; kubuno bubo ubuakutananizizie. 22Nakasilue binsania na Tatane; nu takuli muntu wizi Muana, tugu Isi; nu takuli muntu wizi Isi, tugu Muana, nu unsania Muana ekutunda kumulolesia, 23Nu agalukile ku beigisibua bage nu abatendile ku lumbisombiso bune, Mbogimbogi ku meiso mamo mamona ku bumukumona kubo: 24Kubuno nkumubula bune, Balengania beingi nu bakota batundaga kumona ku bumukumona kubo, nu tababumueineko; nu kunguilila ku bumukunguilila kubo, nu tababunguleko.

Yesu Ekutenda bua Milembe za Kalaga.

Mat. 22:34-40; Mk. 12:28-34.

25Nu ngatu za mulembe azanzukile buno, amulindike, atendile bune, Musozi, buni bunikita nipiene kalamo katanakuzinda? 26Nu amubuide bune, Mu mulembe muasanzilue buni? ukusoma kikizi? 27Nu amutendile bune, Tunda Mukota Kalaga wobe na mutima wobe unsania, nu mu kalamo kobe kansania, nu na magala mobe mansania, nu mu menge mobe mansania; nu tunda munyobe anga buwitunda uwenyene.#Dutelenome 6:5. 28Nu amutendile bune, Wakula busoga; kita bubuno nu walame. 29Tondo we atundaga kuibingia nu atendile Yesu bune, Banazi banane?

Musumo wa Muntu wa Samalia.

Lk. 7:41.

30Yesu akuide bune, Muntu umozi atukaga ku Yelusalema endaga ku Yeliko; akatilue na banyagi, nu bamutikizie nsulu, nu bamususuide, nu bamusigile ku kalengue. 31Nu gabasile sankoga umozi agelaga mu zezo nzila, nu gamumueineko atingilide. 32Nu muLewi, nuwe gabasilego amumueineko nu atingilide lingo. 33Tondo, mu Samalia umozi endaga, abasile gago gabezaga wozo; nu gamumueineko amukuilide kiombo, 34nu asigeleide buigi nage, nu akandile biulu biage, abisikile na makiti nu maku; nu amubakamizie ga nyama zage, nu amuekile ku numba za bageni, nu amukungile. 35Nu gakeide busi endile nu asigide wozo nyene numba falanga ikumi neitano, #Lk. 7:41. nu amutendile bune, Kunga wono; nn kinsania kiwasegage ku kumukunga, nti nakukasekio ganasubie. 36Ukukengela buno, nazi gasamba babano basatu, wabezaga muida wa wono wakatilue na banyagi? 37Nu atendile bune, Wono wamukuilide kiombo. Nu Yesu amutendile bune, Enda, nu ukite bubo.

Malata nu Malia.

38Nu gabezaga esenda, abasile mu muino umozi: nu mukikulu umozi izina liage Malata amusekeide mu numba zage. 39Nu abezaga na muto wage wamanagua Malia, ikeide buigi na magulu ma Yesu, nu onguiliaga buatendaga. 40Tondo Malata azangagazangaga na mulimo muingi; nu amuvuilide nu atendile bune, Mukota, ndi ntukumona tugu buno muto wane ansiga nkukita mulimo nnenyene? Mubule buno ankasie. 41Tondo amutendile bune, Malata, Malata, ukulemanina nu ukuzangazanga na bitondo bingi; 42tondo kimozi tugu kikutundua: nu Malia asombola kikio kisoga, nu kiatakatikibua.

Currently Selected:

Luka 10: NTKI57

Highlight

Copy