Luka 9

Yesu Ekukasa Beigisibua Bage Magala ma Kutikia Basumbu nu Konia Nsambo za Nkita na Nkita.

Mat. 10:1-42; Mk. 6:7-13.

1Nu amanine babo ikumi na babili, nu abakasile magala nu buangato ku basumbu bansania, nu konia nsambo. 2Nu abasingile buno basambale musagu wa bukota bua Kalaga, nu konia basambi. 3Nu abatendile bune, Tamuende na kena mu nzila, musumbo, aba nsago, aba tumpampa, aba falanga; nu tamueke makoti mabili. 4Nu numba insania zimuingilemo, ikalazi muzo nu mumo nti umumuatukile. 5Nu ndi bantu tabamusekela nkungu zimuatuke mu wozo muino, nti muatitula mukungu wa ku magulu meinyu kuba bulongeki kubeli. 6Nu bendile, nu batimbile mu mino mikeke, kusambala musagu musoga, nu konia basambi kunsania.

7Nu gongule mukota Helode ku zezo misagu za bubo bunsania buakitagua angamine; kubuno bamozi batendile buno, Yoana ayuka ku bakuzi; 8nu bango bamozi buno, Eliya uwabasa; nu bamozi buno, umozi tugu ku babo balengania ba wakalazi uwayuka. 9Nu Helode atendile bune, Nasesile Yoana itoe; tondo nazi wono, unkungua ku misagu zage? alondile buno amumoneko.

Kusubia Kua Basingua ba Yesu, Yesu Ekulisia Bantu Tununu Tutano.

Mat. 14:13-21; Mk. 6:30-44; Yoana 1:14.

10Nu gasubizie basingua, bamutendile bunsania bubakitaga. Nu endile nabo bobenyene ku muino wa Betesaida. 11Nu gamenyinine bubo, musanganano wamuyangile: nu abasekeide, nu abasambalide musagu wa bukota bua Kalaga, onezie babo beyaninaga konibua. 12Nu galingile kuida busi; beigisibua bage ikumi na babili bamuvulide, nu bamutendile bune, Lagana na musanganano buno bende mu mino mikeke nu mu biziki bili buigi, buno embe banamona gabeiyombeka nu kubalia; kubuno tuli mu kalula. 13Tondo abatendile bune, Bakasazi kuidia. Nu batendile bune, Tuli tugu na tumpampa tutano nu biena bibili; kasi tuende kubakunzila idia. 14Kuabezaga bamulume bakuka tununu tutano. Nu atendile beigisibua bage bune, Beikaziazi bibombo bibombo na kibombo makumi matano matano. 15Nu bakitile bubo, nu babeikazizie bansania. 16Nu atolile tuto tumpampa tutano nu bibio biena bibili, nu agalamine kuigulu, nu abisegeide, nu abibunguide; nu akasile beigisibua buno bakase musanganano. 17Nu bansania balile, nu bembukile: nu basongezie nzi zasigeide ikumi nu ibili za zezo mbobu.

Petelo Ekuitabizia Buno, Yesu Muana wa Kalaga.

Mat. 16:13-20; Mk. 8:27-30.

18Nu gasegaga wenyene, nu beigisibua bage babezaga nage, ababuzizie bune, Musanganano ukumana buno nili nazi? 19Nu batendile bune, Yoana Mubatizi: tondo bango buno Eliya; nu bango buno, umozi wa ku balengania ba wakalazi u wayuka. 20Nu ababuzizie bune, Tondo mukutenda buno nili nazi? Nu Petelo amutendile bune, Uwe u Klisto wa Kalaga. 21Tondo we abakizizie buno, tabasambalile muntu wampa bubuno; 22atendile bune, Buatunganana Muana wa muntu ababazibue bubibu, nu kusombua na bakulu nu basankoga banene, nu basanzi, nu kuitua, nu kusila kua bindi bisatu ayukibue. 23Nu atendile bansania bune, Ndi muntu ekutunda kunyanga, eitune wenyene, nu eke muti wage wa magu busi na busi, nu anyange. 24Kubuno ndi muntu ekutunda konia kalamo kage nti akakazimizia, tondo unsania wazimizia kalamo kage ku kabamba kane, nti akakonia. 25Kubuno muntu eli na mutali mukizi, ndi angata kisi kinsania, nu kuizimizia wenyene aba kuibigia? 26Kubuno unsania ukankuaga nsoni nu ukakuaga nsoni ku malagi mane, Muana wa muntu nti akamukua nsoni gakavua mu lutanuno luage, nu luelsi, nu lua migenzi zasililila. 27Tondo namubula lebelebe bune, Bamozi bemana gano tabakakua; aba nu gabakamona ku bukota bua Kalaga.

Kugaluka kua Kilungi kia Yesu.

Mat. 17:1-18; Mk. 9:2-8.

28Nu gatingile buigi na bindi kinana kusila kua bubo, endile na Petelo, nu Yoana, nu Yakobo, nu abakamine ku muiduko kusega. 29Nu gabeide esasega kilungi kiage kiagalukizibue, nu nsulu zage zabeide zenga nunse, nu zakelimine. 30Nu bamueine ku bantu babili basambalaga nage, babezaga Mose nu Eliya; 31bamonekile mu lutanuno, nu batendile misagu za kukua kuage bulukazindilila mu Yelusalema. 32Nu Petelo nu banyage bazenzeide na tulo: tondo gabayukile, bamonine ku lutanuno luage, nu babo bantu babili bemana nage. 33Nu gabalekanukile nage, Petelo atendile ku Yesu bune, Mukota, buli busoga tuikale gano; nu tobakazi nusu isatu; lumozi luobe, nu lumozi lua Mose, nu lumozi lua Eliya, nuwe ntamenyinine buatendaga. 34Nu gatendile bubuno, kuabeide kimpa, nu kiabakukide: nu bakule boba gabeingide mu kimpa. 35Nu iyuki liatukile mu kimpa, liatendile bune, Wono eli Muana wane, Musombolua wane: munguililazi. 36Nu iyuki lilino galiasilile, Yesu amonekileko wenyene. Nubo bekeide kibibi, nu tabasambalide muntu wampa mu bitondo bibio bubamonine kubio.

Yesu Ekonia Muana Wabezaga na Lusambo lua Musumbu wa Nsese. Nu Ekusambalila Beigisibua Bage Kukua Kuage.

Mat. 17:14-23; Mk. 9:14-32.

37Nu gakeide busi bagelile ku muiduko, nu musanganano munene wamukundamanine. 38Nu muntu umozi mu musanganano alalukile neiyuki inene bune, Musozi, nkukusega buno ulole muana wane wamulume; kubuno eli ngomo zane: 39kubuno, akatua na musumbu, nuwe mambizi meingi ekulilaga; nu ekumugusagia, nu ekubasaga iyulo, nu ntekumumenkelaga, nu ekumubabazia bubibu. 40Nu nasegile beigisibua bobe buno bamutikie: nu tabavuamine. 41Nu Yesu atendile bune, Inyue kibuti kikio kia busombi, nu kiteli na bukatizio, ndi nkeikalaga neinyu kankanka? Gani gankakutilua? Vua na muana wobe wamulume. 42Nu gavule, musumbu amugusizie, nu amubulubutizie. Tondo Yesu azugide musumbu wa nsese, nu onezie wozo muana wamulume nu amusubizie kuisi.

43Nu bansania bangamine na magala ma Kalaga. Tondo bansania gabangamine ku bunsania buakitile, atendile beigisibua bage bune, 44Bikazi malagi mamo mu matuzi meinyu: kubuno Muana wa muntu agabulue ku maboko ma bantu. 45Tondo tabamenyinine buatendaga nu buabisilue kubeli, buno tababumenyinine; nu bakule boba kumubuzia buisulilua bua bubo buatendaga.

Yesu Ekutenda Beigisibua Bage bua Muana Muto.

Mat. 18:1-5; Mk. 9:33-37.

46Nu balingile kuakanania buabo buabo buno, nazi ukaba munene kubeli. 47Tondo Yesu gamenyinine makengelo mabo, atolile muana muto, nu amubikile buigi nage, 48nu abatendile bune, Unsania ukasekela muana wono muizina liane, nti ansekela: nu unsania wansekela, nti asekela wozo wansingile: kubuno wozo uli mukeke kumuli, akaba munene.

Yesu Ekutunda Bantu Bakukita Busoga.

Mk. 9:38-40.

49Nu Yoana atendile bune, Mukota, tuamonine muntu akutikia basumbu kuizina liobe; nu tuamunanizie, kubuno ntakutuyanga. 50Tondo Yesu abatendile bune, Tamumunanie; kubuno wozo utakumutuna nti eli bumozi neinyu.

Yesu Ekutuka ku Galela.

Yoana 7:2-10.

51Nu gabeide bindi biage biakusekelua muigulu bise buigi na kukuka, alimbanizie mutima kuenda ku Yelusalema, 52nu alingile kusinga migenzi luabusio luage: nu bendile, nu beingide mu muino wa baSamalia, kumulongekela kiziki. 53Nubo tabamusekeide, kubuno alimbanizie mutima kuenda ku Yelusalema. 54Nu gamueine beigisibua bage Yakobo nu Yoana ku bubo, batendile bune, Mukota, ndi ukutunda tukakizie keiya katuke kuigulu nu kugisia bansania anga buakitile Eliya? 55Tondo agalukile, abazugide; atendile bune, Buni buli lukita lua mitima zimuli nazo? 56Kubuno Muana wa muntu ntavule kuzimizia tulamo tua bantu tondo kutonia. Nu bendile ku ungo muino.

Yesu Ekutenda na Bantu Bekutunda Kumuyanga.

Mat. 8:18-22.

57Nu gabendaga mu nzila, muntu umozi amutendile bune, Nakuyange kunsania kuwendage. 58Nu Yesu amutendile bune, Mikala zili na matengu, nu tuzoni tua mumpelela tuli na bizumba; tondo Muana wa muntu nteli na kiziki kiakukukika itoe. 59Nu atendile ungo bune, Nyange. Tondo atendile bune, Mukota, nkase buangato nende kuisa tatane. 60Nu amutendile bune, Siga bakuzi beisane buabo buabo; tondo uwe enda usambale musagu wa bukota bua Kalaga. 61Nu ungo amutendile bune, Mukota, nakuyange; tondo mpe tanga buangato nende kulaga bantu beli ku numba zane. 62Tondo Yesu amutendile bune, Takuli muntu ukubika maboko mage kukulima, nu kulola lumbusambusa, watananina na bukota bua Kalaga.

Currently Selected:

Luka 9: NTKI57

Highlight

Copy