Yoana 9

Yesu Ekonia Muntu Wabutilue Kiuku.

1Nu gabezaga ekutinga, amonine ku muntu wabutilue kiuku. 2Nu beigisibua bage bamubuzizie bune, Labi, nazi wagile, ndi muntu wono, aba ndi bamubuta, ukinsa abutilue kiuku? 3Yesu abakuide bune, Wono muntu ntagile aba bamubuta tabagile, tugu milimo za Kalaga zimoneke mueli. 4Buatunganana kukita milimo zawansingile, kungua musi ukili: ndi busi buida muntu ntanavuama kukita mulimo, 5Gendi mu kisi, nili kiengi kia kisi. 6Gatendile bubo, asuide matazi gansi, nu asuede na bisogo, nu amubongezie ku meiso, 7nu amubuide bune, Enda, woge mu kiziba kia Siloama (buisulilua buabo, Musingua). Endile kuko, ogile, asubizie esamona. 8Banyage nu babo balingaga kumumonako buno abezaga musegi, batendile bune, Ndi ta uwozo wikalaga gansi nu kusega? 9Bango batendile bune, Uwozo; bango bune, Kilo, tondo basusanania. Tondo we atendile bune, Unne wono. 10Bamubuzizie bune, Buni buazibuide meiso mobe? 11Abakuide bune, Muntu ukumanua Yesu, asuede bisogo, nu ambongeziebio ku meiso, nu ambuide bune, Enda woge mu kiziba kia Siloama, bubo nendile koga, nu namonine. 12Bamubuzizie bune, Kuni kueli? Atendile bune, Nsizi.

13Bavule na wozo wabezaga kiuku ku baFalese. 14Busi buasuede Yesu bisogo, nu kumuzibula meiso buabezaga busi bua sabato. 15BaFalese bamubuzizie lingo bune, Buni buwamonine? Nu ababuide bune, We ambongezie bisogo ku meiso, nu nogile, nu kano kaluma nisenamona. 16Bango BaFalese batendile bune, Muntu wono ntatukile kua Kalaga, kubuno ntakuanza busi bua sabato. Nu bango batendile bune, Ndi muagi anamenya kukita migeleko zeno? Nubo bengukene mu miango zabo. 17Nu babuzizie wozo muntu wabezaga kiuku bune, Uwe ukutenda buni ku wozo wakuzibuide meiso? Nu ababuide bune, We eli mulengania. 18BaYuda tabakatizizie buno we abezaga kiuku nu kuzibulua meiso, nu bamanine babo babutile wozo wazibulua meiso, 19nu bababuzizie bune, Ndi wozo eli muana weinyu umukutendaga buno, abutilue kiuku? kubuni kano kaluma esamona? 20Bamubuta babakuide bune, Tuizi buno, wono muana weitu abutilue kiuku: 21tondo buesamona, isue tatuizi; nu tatuizi nazi wamuzibula meiso; we esalengania; mubuziazi wenyene; atende bueizi. 22Bamubuta batendile bubo, kubuno bakuaga baYuda boba; BaYuda babezaga bakala luango buno, ndi muntu amuitabizia buno, u Klisto, nti atikibua mu numba za musanganano. 23Ku bubo bamubuta batendile bune, We esalengania; mubuziazi wenyene. 24Bubo bamanine lingo wozo wabutilue kiuku, nu bamubuide bune, Ganuna Kalaga; isue tuizi buno wozo eli muagi. 25We ababuide bune, Ndi wozo eli muagi, nsizi: nizi bumozi tugu, bune, Nabezaga kiuku, kano kaluma nise namona. 26Bamubuzizie bune, We akukitide kikizi? Nu buni buakuzibuide meiso? 27Abakuide bune, Namubuide kalazi, nu tamungule; ndi mukutunda kungua lingo? aba ndi mukutunda kuba beigisibua bage? 28Bamuililikile bune, Uwe u muigisibua wage; tondo isue tuli beigisibua ba Mose. 29Tuizi buno Kalaga atendile na Mose: tondo muntu wono, tatuizi kuatukile. 30Wozo muntu abakuide bune, Bubuno buli buakuangamia, tamuizi kuatukile, tondo we anzibuide meiso. 31Tuizi buno, Kalaga ntekunguilila bagi; tondo ndi muntu akumbamina Kalaga, nu kukita kusombola kuage, uwozo wakunguilila. 32Kutukila ku kulinga kua kisi aba nu kano kaluma tatunguaga buno, muntu azibula meiso ma muntu wabutilue kiuku. 33Songo muntu wono ntatukile kua Kalaga, songo ntanamenya kukita buampa. 34Bamuakuide bune, Uwe wabutilue na misako za buagi lebelebe, ndi ukutuigisia? Bamubasizie kumbuga.

35Gongule Yesu buno, bamubasia kumbuga; nu gamumonineko, amubuzizie bune, Ndi ukukatizia Muana wa Kalaga? 36Amuakuide bune, Mukota, nazi wozo nimukatizie? 37Yesu amubuide bune, Wamumueneko, unugukutenda nage. 38Nu atendile bune, Mukota, nakatizia. Nu amukumbamine. 39Nu Yesu amubuide bune, Navule ku kisi na lusungio buno batekumona bamone nu bekumona babe kiuku. 40BaFalese babezaga nage, gabongule ku bubo bamubuzizie bune, Ndi nuisue lingo tuli biuku? 41Yesu ababuide bune, Gamunabeide biuku, tamunabeide na buagi; tondo kano kaluma mukuibula buno, mukumona: kasi mukili na buagi.

Currently Selected:

Yoana 9: NTKI57

Highlight

Copy