Yoana 10

Yesu eli Mulangi Musoga.

Luimbo 23; Ebelo 13:20; I Pet. 5:4.

1Lebelebe, lebelebe, nkumubula bune, Wozo utengilila ku luibi lua mukumba wa mikoko, tondo ekubakamina kungo, nti eli muibi nu munyagi. 2Tondo wingilila ku luibi nti eli mulangi wa mikoko. 3Mulangi wa luibi ekumuigulilaga; nu mikoko nti zungua kuiyuki liaga; nu nti esazimana ku miena mazo, nu nti azisondelezia. 4Kungua azigula, nti atinga luabusio luazo, nu mikoko nti zamuyanga: kubuno zizi iyuki liage. 5Tondo tazinayanga mugeni, kubuno nti zikumutina: kubuno tazizi iyuki lia bageni. 6Yesu abeisile musumo wozo: tondo tabamenyinine bubo buatendaga.

7Yesu ababuide lingo bune, Lebelebe, lebelebe, nkumubula bune, Nne nili luibi lua mikoko. 8Bansania balingile kuvua luabusio luane beli beibi nu banyagi: tondo mikoko tazongule ku moki mabo. 9Nne nili luibi; ndi muntu engila kundi, akonibua, akengila, nu kubasa, nu akamona idia. 10Muibi ekuvua kuiba, nu kuita, nu kubigia: nne navule buno babe na kalamo nunse. 11Nne nili mulangi musoga; mulangi musoga akasene kalamo kage ku kabamba ka mikoko. 12Tondo muntu wa mulimo nteli mulangi, kubuno mikoko tazili bikulo biage, ndi amona ku ngozi zikuvua, nti asiga mikoko nu nti atina, nu ngozi nti zazikata, nu kuzibalangania: 13nuwe ekutina, kubuno nteli mulangi wa mikoko, kubuno eli muntu wa mulimo, nu ntakuikutia ku kabamba ka mikoko. 14Nne u mulangi musoga; nizi mikoko zane, nuzo zinizi, 15anga bunizi Tatane, nunne nizi Tatane; nu nkukasana kalamo kane ku kabamba ka mikoko. 16Nili neingo mikoko ziteli za mukumba wono: buatunganana kuzitola, nu zongue kuiyuki liane, zabe kibombo kimozi, nu mulangi umozi. 17Bubo Tatane anelamine, kubuno nakasana kalamo kane buno, nikatole lingo. 18Takuli muntu unantikiako, tondo nakakasana nnenyene. Nili na buangato bua kukakasana, nu nili na buangato bua kukatola lingo. Bubo ubunakakizizibue na Tatane.

19Kuabede lingo malekanuko munkatini mua baYuda ku bubo buatendaga. 20Nu bango beingi babulaga bune, Eli na musumbu, eli muluba; kubuni mukimuamunguilila? 21Bango batendile bune, Mamano tameli moki ma muntu uli na musumbu. Ndi musumbu anamenya kuzibula meiso ma kiuku?

Yesu Ekubula Bune, Nili Kalaga.

Yoana 14:9; 20:28, 29.

22Kisagulo kia kusuagibua kiabezaga ku Yelusalema; 23nkungu zezo zabezaga mpego nkali; nu Yesu atabangaga mu numba nnene za kukumbamina mu kabelabela ka Solomona. 24BaYuda bamutimbile, nu bamubuzizie bune, Nkungu nkizi ziukatuikilizia mitima? Ndi uwe u Klisto tubule. 25Yesu abakuide bune, Nkumubula, tondo tamukunkatizia; tondo milimo zinkukita muizina lia Tatane, uzikundongekela. 26Tondo inyue tamukukatizia, kubuno inyue tamuli mikoko zane. 27Mikoko zane zikunguaga kuiyuki liane, nunne nizizi, nu zikunyangaga; 28nu nkuzikasaga kalamo katanakuzinda; nu tazikazimina nunse, nu takuli muntu unazinyaga mu kuboko kuane. 29Tatane wankasilezo atinga bansania magala; nu takuli umozi unazinyaga mu kuboko kua Tatane. 30Nne nu Tatane tuli umozi. 31Nu kububo baYuda basongezie lingo makozi buno bamulekelemo. 32Yesu ababuide bune, Namulolesezie milimo mingi misoga, zatukaga ku Tatane; nu mulimo mukizi umukundibulila makozi? 33BaYuda bamuakuide bune, Tatukukulibulila makozi ku mulimo musoga uwakitile, tugu ku kulinga Kalaga; kubuno, uwe uli muntu, nu ukuibula buno, uli Kalaga. 34Yesu ababuide bune, Ndi tabuasanzilue mu mulembe weinyu bune, Nne natenda bune, Inyue muli tulaga? #Luimbo 82:6. 35Ndi ekubamana buno tulaga, babo basingilue neidagi lia Kalaga (isanzo lia Kalaga talikatikibua), 36ndi mukubula wozo wasuagizibue nelsi nu wasingilue ku kisi buno, akulinga kubuno mukutenda Kalaga; kubuno nkuibula bune, Nili Muana wa Kalaga? 37Ndi nsikukita milimo za Tatane, kasi tamunkatizie. 38Tondo ndi nkuzikita ndi tamunkatizia, katiziazi zezo milimo: buno muamenye nu kumenyinina buno, Tatane eli mundi, nunne mu Tatane. 39Batundile kumukata lingo: tondo abasogonyokile mu maboko.

Yesu Ekuenda Kuabatizizibagua.

Mat. 3:1, 13, 17.

40Nu endile ku lisilia lia Yadene kuko kualingaga kubatizizia Yoana; nu eikeide kuko. 41Nu bantu beingi bamuvuilide; nu babuide bune, Lebelebe, Yoana ntakitile migeleko, tondo bunsania buatendile Yoana bua wono muntu buligo. 42Nu beingi bamukatizizie kuko.

Currently Selected:

Yoana 10: NTKI57

Highlight

Copy