Yoana 18
18
Yesu Endile ku Getesemane.
Mat. 26:36; Mk. 14:32.
1Gatendile Yesu mamo moki, endile na beigisibua bage lisilia lia kazi ka Kidilona, kuabezaga isoa, engidemo na beigisibua bage.
Bekukata Yesu.
Mat. 26:47-56; Mk. 14:43-50; Lk. 22:47-53.
2Nuwe Yudasa, mugabuzi, abezaga eizi kiziki kikio: kubuno Yesu abezaga ekuendako mambizi meingi na beigisibua bage. 3Yudasa avule na kibombo kia bakoloboyo, nu bakambi, batukile ku basankoga banene nu baFalese, bavule na tusuku nu bia bita. 4Yesu amenyine bunsania buamubasile, endile kubeli, ababuzizie bune, Mukulonda nazi? 5Bamuakuide bune, Yesu wa Nazaleta. Yesu ababuide bune, Unne gono. Nu Yudasa mugabuzi abezaga emana nabo. 6Gababuide bune, Unne gono, basubizie lumbusambusa, baguede gansi. 7We abatendile lingo bune, Mukulonda nazi? Nu batendile bune, Yesu wa Nazaleta. 8Yesu abakuide bune, Namubula lingo buno, unne gono, ndi mukundonda sigazi babo beiyendele: 9buno idagi lizindilile liatendile bune, Babano bawankasile nsiazimizizie umozi kubeli. 10Simona Petelo abezaga na bupanga abubasizie mu musagi, nu asesile kutuzi kua seidume kua mukambi wa sankoga munene. Izina lia wozo mukambi Malaku. 11Yesu abuide Petelo bune, Ingizia bupanga buobe mu musagi: ndi nsikanua kituma kiankasile Tatane?
Bekuenda na Yesu ku Sankoga Munene.
Mat. 26:57-68; Mk. 14:53-65; Lk. 22:66-71.
12Nu kibombo kia basankoga banene, nu bakoloboyo nu bakambi ba baYuda, bakatile Yesu nu bamukandile, 13nu bendile nage kulinga ku Anasa; kubuno we abezaga isibiala wa Kayafa, uwabezaga sankoga munene ku muaka wozo. 14Kayafa uwakasile baYuda menge bune, Buatananina muntu umozi kukuila bantu.
Petelo Ekutuna Yesu.
Yoana 18:25-27; Mat. 26:69-75; Mk. 14:66-72; Lk. 22:54-62.
15Nu Simona Petelo ayangile Yesu, nu ungo muigisibua. Muigisibua wozo amenyinue na sankoga munene, nu eingilide na Yesu gamozi mu lusu lua sankoga munene; 16tondo Petelo emanine kumbuga kua luibi. Muigisibua wamenyinue na sankoga munene, atukile nu atendile na wozo mukikulu walangaga luibi, nu eingide na Petelo. 17Mukikulu walangaga luibi, abuzizie Petelo bune, Ndi uwe uli umozi wa beigisibua ba muntu wono? We atendile bune, Tanne. 18Bakambi nu bakoloboyo bemanine kuko, bakongezie keiya ka makangania, kubuno kuabezaga mpego; bongule keiya; Petelo emene nabo, nu onguaga keiya.
Sankoga Munene Ekubuzia Yesu.
Mat. 26:57-68; Mk. 14:53-65; Lk. 22:66-71.
19Nu sankoga munene abuzizie Yesu musagu wa beigisibua bage, nu musagu wa meigisia mage. 20Yesu amuakuide bune, Nsiabisile bumozi ku kisi; nu bindi binsania neigisagia mu numba za musanganano nu mu numba nnene za kukumbamina, muabezaga baYuda bansania, nu nsiatendile bumozi ku lumbisombiso. 21Buni bukumbuzia? Buzia babo ubongule bunababuide, bo beizi bunababuide. 22Nu gatendile bubo, mukambi umozi wabezaga buigi nage, alibuide Yesu lugizi, atendile bune, Buni bukuakula sankoga munene bubo? 23Yesu amuakuide bune, Ndi natenda buli bubi, kasi bulongeki buli bubi: tondo ndi natenda busoga, kubuni kuwandibula? 24Anasa amusingile akandua ku Kayafa, sankoga munene.
25Simona Petelo abezaga emana nu ekungua keiya. Bamubuzizie bune, Ndi uwe uli umozi wa beigisibua bage? We atunine, nu atendile bune, Tanne. 26Mukambi umozi wa sankoga munene, mubuto wa wozo wasesagua kutuzi na Petelo, amubuzizie bune, Nsiakumonineko nage muisoa? 27Petelo atunine lingo: nu kazanga kongo mulume wa nkoko abikile.
Bekuenda na Yesu ku Pilato.
Mat. 27:14; Mk. 15:1-5; Lk. 23:1-7, 13, 16.
28Gabatukile na Yesu ku Kayafa, bendile nage mu Palatolia: #18:28 Buisulilua bua bubo, numba za bukota. buabezaga buse nindunindu, tondo babo tabeingide mu Palatolia, buno banavua kubigibua, tondo balie kisagulo kiesuluko. 29Pilato abavuilide, nu ababuzizie bune, Kubuni mukusongela muntu wono? 30Bamuakuide bune, Songo muntu wono ta mubi, tatunakugabulidewe. 31Bubo Pilato ababuide bune, Mukatazi, nu mumusungie inyue benyene ku mulembe weinyu, nu baYuda bamubuide bune, Tatuli na buangato bua muntu: 32buno bubo buatendaga Yesu buzindilile, alolesezie lukita lua lukuo luakakua.
33Pilato eingide mu Palatolia, nu amanine Yesu nu amubuide bune, Ndi uwe u Mukota wa baYuda? 34Yesu amuakuide bune, Ndi uwe ukutenda bubo, uwe wenyene, aba bango ubakusambalide musagu wane? 35Pilato amuakuide bune, Ndi nne nili muYuda? Kilongo kiobe nu basankoga banene ubakugabula kundi: wakitile kikizi? 36Yesu amuakuide bune, Bukota buane tabuli bua kisi kikino: songo bukota buane buabezaga bua kisi kikino, songo bakambi bane baneitene bita, nu nsinagabuidue ku baYuda: tondo bukota buane ta bua gano. 37Pilato amubuide bune, Ndi uli Mukota? Yesu amuakuide bune, Bubo uwe ukubutenda, kubuno nili Mukota. Ku bubo nabutilue, nu ku bubo navule ku kisi kikino; buno nikilongekele bulili. Nu muntu unsania wa bulili nti ekungua kuiyuki liane. 38Pilato amubuide bune, Kikizi bulili? Nu gasilile kutenda bubo, atukile, nu endile ku baYuda, nu ababuide bune, Nsiamumona na katati kampa.
Yesu aba Balaba.
Mat. 27:15-26; Mk. 15:6-15; Lk. 23:18-25.
39Tondo mukabezaga na lukita lumozi, buno mu nkungu za kisagulo kiesuluko nti namukandulila muntu umozi; ndi mukutunda nimukandulile Mukota wa baYuda? 40Tondo bansania balalukile bune, Ta wozo, tondo Balaba. Nu wozo Balaba abezaga munyagi.
Currently Selected:
Yoana 18: NTKI57
Highlight
Share
Copy
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
