Yoana 17

Yesu Ekusegela Beigisibua Bage ku Kalaga.

1Gatendile Yesu bubuno, agalamine kuigulu, atendile bune, Tatane, nkungu zika; ganuna Muana wobe, buno Muana akuganune; 2anga buwamukasile buangato gantata ga bansania, buno bansania bawamukasile abakase kalamo katanakuzinda. 3N u kakano u kalamo katanakuzinda, buno bakumenye buno uwe u Kalaga tugu wa bulili, nu Yesu Klisto uwasingile. 4Nakuganuine ga kisi, nu nazindilizie wozo mulimo uwankasile buno nigukite. 5Nu kano kaluma, Tatane, nganunie gamozi nobe ku lutanuno lunabezaga mulo nobe nti kisi takiba. 6Namenesizie izina liobe ku bantu bawankasile mu kisi: babezaga bobe, nu wankasilebo, nu bakokomezizie idagi liobe. 7Kano kaluma beizi buno, bunsania buwankasile buatukile kuguli: 8kubuno malagi mawankasile nabakasilemo; nu bameitabizizie, nu bamenyine nunse buno, natukile kuobe, nu bakatizizie buno, uwe uwansingile. 9Nkubasegela: nsikusegela ba ga kisi, tondo kusegela bawankasile; kubuno beli bobe: 10nu binsania biane bili biobe, nu biobe bili biane: nunne niganunue mubio. 11Nunne nsili ga kisi lingo, tondo babano beli ga kisi, nunne nkuvua kuguli. Tatane Wasililila, langa babano bawankasile kuizina liobe, buno babe umozi anga butuli nuisue. 12Ganabezaga nabo, nalangile babano bawankasile muizina liobe: nu nabakungile, nu takuli umozi wazimina, tugu wozo muana wa buzimizi, buno masanzo mazindilile. 13Tondo kano kaluma nkuvua kuguli; nu nkutenda bubuno ga kisi, buno mbogimbogi zane zizindilile mubeli. 14Nabakasile idagi liobe; nu kisi kiabasombile, kubuno bo tabeli ba kisi, anga nne nsili wa kisi. 15Nsikukusega buno, ubatikie ga kisi, tondo nkusega buno, ubalange na wozo mubi. 16Tabeli ba kisi, anga nne nsili wa kisi. 17Basuagie ku bubo bulili: idagi liobe lili bulili. 18Anga buwansingile mu kisi, ububo bunabasinga mu kisi lingo. 19Nu ku kabamba kabo neisuagizie, buno nubo basuagibue mu bulili. 20Aba tababano umpanga ubenkusegela, tondo babo bakankatizagia ku kabamba keidagi liabo; 21buno bansania babe umozi; anga uwe, Tatane, buli mundi, nunne muguli, nubo babe mutuli: bubo ba kisi bakatizie buno, uwe uwansingile. 22Nu luganuno luwankasile nabakasalo; buno babe umozi, anga butuli umozi. 23Nne mubeli, nu uwe mundi, buno bazindilile mu umozi, buno ba ga kisi bamenye buno, uwe uwansingile, nu uwe wabatundile anga buwantundile. 24Tatane, nkutunda babano bawankasile babe nanne, buno balole luganuno luane, luwankasile: kubuno uwe wantundile nti kisi takikitua. 25Tatane wisanana, ba ga kisi tabekuizi, tondo nne nikuizi; nubo bamenyine buno, uwe uwansingile; 26nu nkubakengelezia izina liobe, nu nkabamenesialio lingo, buno lutundo luwantundile lube mubeli, nunne mubeli.

Currently Selected:

Yoana 17: NTKI57

Highlight

Copy