Matayo 19

Lisɔngɔni

1Asiläkä Yesu liekesi-li, Inde losokwa nda Ngalilai, Inde lɔkɛ nda liko lia Yudea, nda boili wasi wa Yaledene. 2Bikuke ya bato lotutak’Inde la Inde louwekes’iyo k’omao.

3BaFalusi loya end’Inde oyafel’Inde felo yokɔtɔlɔ Inde, iyo mbo— ¿Loengani nde la Bikela mbo otolome asokoleke wali’ande la litina elikalɛmbɛk’inde? 4Inde lomutoel’iyo mbo— ¿Otitange nde mbo ko nda liako Bokeli akeläkä la botolome la botomali la imɔ mbo— 5eokao botolome atomacha nde sango la nyango’ande la atowatema la wali’ande, la iyo yaambale batoyala oto (bindo) ɔmwito? 6Kwanyɔ bat’imɔ imbale, kanga bindo ɛmwito. Eokao eyesowacha Mungu, bato angowatola yao.

7Iyo loonga lande mbo— Eokao, monito Mose atäkä ndola mbo olome afeke wali lokasa losenyana la ndosokol’inde? 8Yesu loonga lau mbo— Ko l’eoka ya betema yanu bewaü, Mose nd’amacheläk’ino ndosokola bali banu, kongo ko nda liako litiaaka ongoma. 9Itoonga lanu mbo— Boto oyatosokola wali’ande, sakolo ko l’eoka ya nyongo, la kosɔngɔ wasi, inde nd’atochwela wali’ande nyongo.

10Baeki bande mbo— Eya to mbo loyala ongoma la olome la wali’ande, loti to lolau ndosɔngɔ. 11Nde Inde loonga lau mbo— Bato batotina angoöndo okulia lioi-li, kangä ko ebasofomo isosha. 12Bamɔi to bende bitenga eoka baotomökö ongoma, bamɔi basosɛlɔmɔ ani ko la bato, bamɔi basoyales’iyo angɛnɛ ongoma ko l’eoka ya Bɔkɔta wa Use. Boto oyasokɔkɔlɔ okulia lioi-li akulieke to liao.

Yesu la bainɛngɛ

13Lamao bana bakɛkɛ loeshelomo end’Inde mbo atalieke iyo bangasa bande la mbo asomboelek’iyo, nde baeki loimaka bato ana; 14nde Yesu mbo— Machaka bana bakɛkɛ bayeke ende’mi, okufesëk’iyo, eoka Bɔkɔta wa Use wende ende bɔfɔnɔ-bo. 15Lamao Inde lotaliaka iyo bangasa limɔ Inde losokwa omao.

Boto wa Lifoka

16Futuku boto ɔmɔi loyela Yesu, inde mbo— Boekesi, ikeleke to loni lolau mbo yɔ̈lɛkɛ loiko loa layalaya? 17Yesu loonga lande mbo— ¿Monito otofela’mi loasɔ loa bolau? Angwɛnɛ ango ɔmɔi olau sakolo ko Mungu angɛnɛ, nde boyala la yɛmɛ yɔɔtɔ nda liwawi, litesaka to Bikela; 18boto loonga lande mbo— ¿Bini to Bikela? Yesu mbo— Wolëke boto, Ochwëke nyongo, Wiyëke, Otëke nanga, 19Litesaka sango waɛ la nyango waɛ, Samaka boyalani laɛ kwa aɛ angɛnɛ. 20Isenge sina loonga mbo— Isolitesa bikela-bi bitotina, ¿Loni to imɔ loasɔ eloomelu nde’mi? 21Yesu loonga lande mbo— Bɔlɛmbɛ ndɔɔlɔlɔ hɔlɔ, takɛndɛkɛ okatambesa ebiomani laɛ, faefaka yao ende bato touwe, -ongoma otɔɔlɔ bondanda nda Use— limɔ yauku, tutaka’mi. 22Okäka isenge e-lioi-li, inde lɔkɛ la ikɛnɛnɛ nda botema eoka aaka lifoka lia likama.

23Yesu loonga nde la baeki bande mbo— Wewe, itoonga lanu mbo ende la owaü ende oto wa lifoka ndɔɔtɔ nda Bɔkɔta wa Use. 24Itoonga imɔ lanu mbo bowaü wa ngamela woeta nda lifola lia iolo, botiengane la bowaü wa oto wa lifoka ndɔɔtɔ nda Bɔkɔta wa Mungu. 25Okäkä baeki bande ongoma, iyo lomwaala finɛ, iyo mbo— ¿Ndai to atokɔkɔlɔ ouwesomo? 26Nde Yesu lotingana lau, Inde mbo— Lona losolongela bato, kongo ko Mungu atokɔkɔlɔ bitotina. 27Lamao Petelo lomutola la Yesu mbo— ¿Tɛnɛ, toisomacha bitotina yasu la toisotutak’aɛ, eokao iso kɔɔlɔ to iye? 28Yesu loonga lande mbo— Wewe, itoonga lanu mbo ino ebasotutaka’mi, akayaleke Wana wa Boto nda kɛka ya tala yande, nda baotelomu liasi lia wenda, ino imɔ bolayalaka amao nda kangala liu la imbale ndokomia tukela liu la imbale ya BaIsalaele; 29la boto la boto oyamachi ndakɔ kwa baloo kwa baelo, kwa sango, kwa nyango, kwa bana, kwa bilanga, ko l’eoka yami, ɛɔlɔkɔ nde kama liu ya yao ina la loiko loa layalaya lisangai 30Nde wike ebale betoli oso bende ko mbisa, la eba mbisa betolaka oso.

Currently Selected:

Matayo 19: NTKE58

Highlight

Copy