Matayo 18

Liekesi lia Yesu lioekesa ebande baeki

1Nda mbile ena baeki loya ende Yesu, iyo lofel’Inde mbo— Ndai yatolongela ofi nda Bɔkɔta wa Use? 2Yesu lota wainɛngɛ lioi mbo ayeke end’Inde, lamao Inde loemesa wana sisi yau, 3Inde mbo— Wewe isoonga lanu mbo sakolo ko ino kokikwa okinjwa kwa bana bakɛkɛ, ani ino angɔɔtɔ nda Bɔkɔta wa Use. 4Nde wao ona oyatoikamaka se, oto ona asolongela ofi nda Bɔkɔta wa Use. 5Oyatonyangela wana ɔmɔi kwa wana-yo, ko l’eoka ya lina liami, inde nd’atonyangela’mi, 6nde oyatokwesa wainɛngɛ ɔmɔi oyasoimela’mi, losoeta lande olau mbo litalɛ lifi likandomoko nda kingo yande, la mbo alindesomoko nda balia ba olundu ba eliya.

7Aeko wale nda wenda-bo eoka ya njasɔ yokwesaka bato. Yao angotakufaka, nde wale wa liömä boyaka ende boto oyatofɔɔlɔ yao. 8Eokao, lingasa liaɛ, kwa litindi liaɛ, likwes’aɛ, tenaka liao, umbolaka liao tungi, ndɔɔtɔ nda loiko ko eleme kwa ekoti losoeta ɔkɛsɔmɔ nda bösä wofya layalaya ani ole la bangasa bambale la bakolo bambale. 9Eyambo liso liaɛ likwes’aɛ nda obe, ömɔlɔkɔ liao, la umbolaka liao tungi; ndɔɔtɔ nda liwawi ko la liso limwito ko ɛtwɛlɛ kongo, losoeta ɔkɛsɔmɔ nda Ngehena ya bösä la baiso bambale.

10La wɛlï to, mbo otaolya ɔmwito wa ebakɛkɛ-ba, eoka Imi nd’asoonga lanu mbo— 11Nda Use bakitomo bau batoɛnɛkɛkɛ bɔmbɔ wa Sango wami lise la lise nda Use.

12¿Otoenyela nde moni? Boto eyala la bɛkɔkɔ kama liu; la ɔmwito wa yao kongo elota oeyaeya, inde angomacha yao kama libwa la libwa nda föngo okalukake ona ebosoeyaeya? 13Eya to mbo eoshana la wao, wewe Imi mbo, atoomala nda wao ɔmwito olongela ebimɔi kama libwa la libwa ebitieyaeyeke. 14Ko ongoma liti lisangi lia Sango wanu oyayali nda Use mbo ɔmwito wa ebakɛkɛ-ba asɛɛsɛlɛkɛ.

15Eyambo booto waɛ, ekeel’aɛ obe, takɛndɛkɛ okɛnɛs’inde litwanelo liande ko ino ambale wisisa; eok’aɛ la wɛlï, ambo osɔɔlɔ booto waɛ liasi. 16Nde eya to mbo aitook’aɛ, tafelaka oto wasi kwa bato bambale basi, mbo baɛkɛ laɛ mbo baoi batotina bakɔchɔmɔkɔ ko la bɛnɔkɔ ya bakulyi ambale kwa asatɔ. 17Efeka ndooka imɔ ko iyo, luwesaka Etanda; efeka ndooka ango Etanda, ayaleke laɛ kwa boto oyati waYuda, ango ewa bɔsɔmbi. 18Itoonga lanu wewe mbo njasɔ ebitokandak’ino ono se, yao bilakandomoko nda Use; la yao ebitofaikol’ino ono se, yao bilafaikolomoko ona nda Use. 19Itoonga lanu imɔ liasi mbo— Eyambo bato banu ambale bekuliana ono se eoka ya lɔasɔ lɔmɔi elotosombol’ino, loao lokelomoko ino ko la Sango wami oyayali nda Use. 20Eoka olo atosɔngɔmɔ ambale angoko asatɔ ko l’eoka ya lina liami, ambo Imi yende k’omao sisi yau.

21Lamao Petelo loya ende Yesu, inde mbo— Ngɛnɛ, booto wami ekeela’mi obe, imɛsɛlɛk’inde bamɛsɛlɛ banga, konda bosambale? 22Yesu mbo— Iitoonga laɛ mbo konda bosambale, kangä konda kama osambale osambale. 23Ko la litina-li Bɔkɔta wa Use botokweelomo la bɔkɔta wa tukela ɛmɔi oyalɛmbɛkɛ ndokomya njasɔ ya belima ya bɛkɔwa yande. 24Aakoläkä Inde ndokomya yao, bɔkɔwa wa oso loeshomo end’inde oyaaka la bolima wa pata bilɛfu liu; 25kongo ko atiyaleke la bieto yokamba, eokao Ngɛnɛ wande lota ndola mbo atambesomoko, lande la wali la bana la bitotina eyaaläkä lande mbo bolima bokambomoko. 26Inde loswa to balui se, inde lolɔmbɔkɔlɔ Ngɛnɛ mbo— Ngɛnɛ, lombakelaka’mi sumbu, fa’mi fofe yokamb’aɛ bieto bitotina fɛɛ. 27Limɔ Ngɛnɛ wa bɔkɔwa ona lookel’inde ngandi, inde lofaikol’inde, inde lɔmɛsɛl’inde bolima. 28Kongo ko bɔkɔwa-ao, akuswäkä inde, inde lokatowana la bɔkɔwa wasi booto wande oyaaka lande la bolima wa falanga kama liu. Inde lokusamel’inde la kingo, inde mbo— Kambaka to bolima ebole laɛ; 29la bɔkɔwa ebɔmɔi loswa balui se, inde lolɔmbɔkɔlɔ wina mbo— Lombakelaka’mi sumbu, fa’mi fofe yokamb’aɛ bitotina fɛɛ. 30Nde inde lofeka, inde lɔkɛ okat’inde nda bɔnyɔlɔlɔ, kond’akakambek’inde bolima. 31Limɔ ɛnɛkɛ bɛkɔwa ebamɔi lona elosokel’inde, iyo loka ikɛnɛnɛ sha likama, iyo loyakambesa ngɛnɛ wau bitotina ebikelomu. 32Lamao ngɛnɛ lot’inde lioi mbo ayeke, inde loonga lande mbo— Aɛ wende bɔkɔwa obe, imi nd’amɛsɛliki aɛ bolima waɛ bototina eoka olɔmbɔkɔliki’mi; 33lotiengane laɛ mbo okeeleke bɔkɔwa ona booto waɛ ngandi, kwa okeela’mi aɛ? 34Lamao ngɛnɛ wau lowa efango finɛ, inde lɔkɛs’inde ende betingani ya bɔnyɔlɔlɔ kond’akakambeke inde bolima bototina fɛɛ. 35Ko ongoma, Sango wami nda Use, ekelaka imɔ end’ino, sakolo ko ino otomɛsɛkɛlɛnɛ oto la oto booto wande nda botema wande.

Currently Selected:

Matayo 18: NTKE58

Highlight

Copy