Luka 17

1Yesu loonga la baeki bande mbo— Angokɔkɔlɔ ndokufa mbo tolonga totakwesa bato nda obe, kongo ko aeko wale end’inde oyatotake twao. 2Loeti nde l’olau mbo litalɛ lifi likandomoko nda kingo yande, la mbo aumbolomoko nda balia ba eliya, eoka liwa lia oyatokwesa ɔmwito wa ebana-ba bakɛkɛ litolonga liwa lina.

3Tatichaka bekeeli yanu angɛnɛ. Eyambo etungani yaɛ ekela obe, imaka inde; ekalangana, mɛsɛlɛkɛ inde. 4Ango ekeel’aɛ obe bakela bosambale nda lise limɔi, nde einwaka end’aɛ bainwa bosambale oyaonga mbo— Isokalangana; otomɛsɛl’inde.

5Batomomu loonga la Ngɛnɛ mbo— Ulwesaka liimeli liasu. 6Limɔ Inde loonga mbo— Boyala la liimeli kwa lokoto lɔkɛkɛ loa mbasɛ, ani ino koonga la isandu sina mbo— Aɛ angɛnɛ uwolomo, lɔɔmɔ nda balia ba eliya; ongoma shao kolitesa lioi lianu.

7¿Ndai wanu eyala la bɔkɔwa oyatokuwa elanga, angoko oyatotingana la bɛkɔkɔ, akasokwek’inde nda elanga oyaya okenge, koonga lande mbo— Yauku, yalaka se lisasaya nda bieka? 8Mba, aitotaonga lande mbo— Takomyielaka’mi yeka yola, wataka esinda ya mɛsa, telaka’mi bieka nda mɛsa; akaleke la akainweke’mi, limɔ mbisa aɛ kola, aɛ komwa. 9¿Atofaka bɔkɔwa kelekëlë ko eoka asokeel’inde ko yao ebisokambesomo inde? 10Ino imɔ ko ongoma; akasilek’ino lotimbana lototina elokambesomuku ino, ongaka mbo— Tole bɛkɔwa ya bikwɛlɛ, tosokela ngo ko lotimbana eloengani nde lasu okela.

Bato liu ba baɛndi

11Akɛndɛk’Inde nda mboka ya Yelusaleme, Inde loetaka atiteni ya yese ya Samalia l’eya Ngalilai. 12Ɔtɔ̈kɔ̈ Yesu nda bokenge ɔmɔi, bato liu ba baɛndi loyatowana lande, iyo losikama ko esika, 13iyo loamama mbo— Yesu, Bɔkɔta, okelaka iso ngandi. 14Limɔ ɛnɛ̈kɛ̈ Inde wɛn’iyo, Inde loonga lau mbo— Kɛndɛkɛ okɛnɛsɛ BaKanga komba yanu. 15Loyaka nde mbo aɛk’iyo, iyo lotanesomo. Ɔmɔi wau, ɛnɛk’inde mbo asosäsesomo, inde loinwa ani inde loinela Mungu la limiki lifi, 16inde lotulia bɔmbɔ se nda batindi ba Yesu, inde lof’inde kelekëlë; boto ona aäkä wa Samalia. 17Yesu lomutoel’inde mbo— ¿Bato liu batitanesomuku; ebamɔi libwa anima to? 18¿Angwɛnɛ boto wasi woinwa oinela Mungu, sakolo ko oy’ati wa BaYuda? 19Yesu loonga lande mbo— Emalaka, kɛndɛkɛ eyaɛ; liimeli liaɛ lisouwes’aɛ.

Mbile eyetoya la Bɔkɔta wa Mungu

20Afelomökö Yesu ko la BaFalusi mbo— ¿Eni mbile eyekayeke la Bokota wa Mungu? Inde lomutoel’iyo mbo— Bokota wa Mungu botiye ko la botichakëlä, 21baitoonga mbo— Tɛnɛ bole eya, kwa anamana; Tɛnɛ ngo Bokota wa Mungu bole atiteni yanu!

22Limɔ Inde loonga la baeki bande mbo— Becho belayaka ebilokeke ino yɛmɛ yɔɛnɛ lise limwito lia Wana wa Boto, kongo ko botilɛnɛkɛ ngo wao. 23La beongaka lanu mbo— Tɛnɛ anamana; Tɛnɛ onomono! Ɔkɛ̈kɛ, otutëk’iyo! 24Eoka kwa atobalikima ibalibali fangi ɛmɔi ya use okaamela imɔ konda fangi eyɛmɔi ya use, kwa akayaleke imɔ ko Wana wa Boto nda lise liande. 25Kongo ko loengani nde lande mbo ataokesomoko biale wike la afekelomoko la efɛtɔ-ye.

26Kwa ayaläkä wenda nda mbile ya Noa, ko ongoma nda bacho ba Wana wa Boto; 27balakäkä bieka, bamwäkä, basɔngɔ̈kɔ̈ bali, basɔngɛsɔmɔ̈kɔ̈ konda bochoao ewaɔtɔ̈kɔ̈ Noa nda ndakɔ ya watɔ, limɔ fela efi loya oyaombes’iyo yaatotina hombe. 28Ongoma imɔ, kwa ayaläkä bato nda mbile ya Loti, baläkä, bamwäkä, basombäkä la baungesäkä liöngo, balɔɔ̈kɔ̈ bilanga, baswäkä ndakɔ 29kongo ko nda bocho ewasokwäkä la Loti nda bokenge wa Sodoma, bösä la kibiliti yatɔnɔ̈kɔ̈ nda use, la wao loombes’iyo yaatotina hombe. 30Loyalaka ongoma la lise likɛnɛlɛkɛ Wana wa Boto. 31Nda bocho ona boto eyala olikolo lia ndakɔ ani biengo yande bitikali nda tindo, asulwëke se ndɔɔsɔ yao; boto eyala nda elanga, ainwëk’imɔ bokenge. 32Enyelaka loaso loa wali wa Loti. 33Boto oyatolukä mboka yotekamesa liwawi liande, atolefesa nde liao; la oyatolefesa liao, inde nd’atoikesa liao.

34Itoonga lanu mbo— Nda bocho ona, bambale beingala nda tange ɛmɔi; ɔmɔi kosokolomo, oyɔmɔi komachana. 35Batomali bambale betwanga befonga amamwito nda lokulu ko lɔmɔi, ɔmɔi kosokolomo, oyɔmɔi komachana. 37Iyo lofel’Inde mbo— Anima to, Ngɛnɛ? Inde loonga lau mbo-Olo akayaleke bolyo, ambo toyoiyoli kosɔngɔkɔmɔ ngo ko omao.

Currently Selected:

Luka 17: NTKE58

Highlight

Copy