Mateo 22

1Yesu bebālulwile dimonyi na miele, bakwile’shi: 2Bufumu bwa mwiilu mbuhwandjikile na nfumu kampanda, batekyele mwan’e bidibwa bia kubamba. 3Batumine bahika be kwitanyina’bo abakyebibwe ku bidibwa; ank’abahele kufika. 4Dimonyi, batumine bangi bahika’shi: Lungulai abetanyinwe’shi; Talai, nahu kulumbula bidibwa biande, ñombe, na nyama yande yinune ngihaibwe, bintu bioso mbimēne, fikai kwibambo. 5Ank’abo abasābulanga, abayile mashinda’bo, umune kwifuba die, mungi ku būsunga bwe; 6Bangi namu abashēle abakwete bahika be, abebakitshine bibubi, na kwibehā. 7Anka nfumu habahushishe biabia, bakwatshile nsungu; batumine efita die, abehayile baba bantahanyi, kibalo kiabo abekishikile kālo. 8Henyihaha bakwile kwi bahika be’shi; Bi’ebambo mbimēne, anka’abo abadi betanyinwe tababadi bahwandjikile, ooo. 9Binyibiabia, ndai ’masanka a misese, na boso banukasañana nwibetanyine ku bidibwa bi’ebambo. 10Biabia baba bahika abayile mu misese, abakongwele boso bābasañene, bebubi na bebuwa; na nshibo y’ebambo yibadi yiule na bakyebībwe.

11Habatwelele nfumu mu kutala bakyebībwe, bamwene mwanka muntu shīmufwale mutwelo w’ebambo. 12Bamwihwishe’shi: A kūku, botwele na minyi muno koshī na mutwelo w’ebambo? N’e bakutshilwe biakwakula. 13Henyihaha nfumu balungwile bafubi be’shi; mwanyei ku maboko na ku mikolo, numwibweshe, numusumbule mu mufito wi fututu hasha. Akemwīkala na kudila na kwisuma meno. 14Mwanda bebungi abetanyinwe, anka buhela abasangwilwe.

15Henyihaha Bafadiseo abayile mu kumudila lukuku lwa kumwanyina ’moso mwakakwila. 16Biabia abatumine kwadi bana babo ba bukishi, na Bena Heloda hamune’shi: A Mulambukishi, atwiuku’shi, obe we a binyibinyi, olambukisha eshinda di’Efile-Mukulu mu biabinyibinyi; sunga totshinyi muntu: mwanda tobasukā mahala a bantu, ooo. 17Binyibiabia etulungule motentekyesha’shi; Nyi nkishila kuha Kesala mulambu su mbisumanga? 18Anka Yesu bashingulwile bubi bwabo, bakwile’shi: A nkinyi kianuntompo anwe bansesa? 19Ndeshei nfalanga ya mulambu. Biabia abamufwishishe ndenadi. 20E bebālulwile’shi: Kino kihwandjikisho na kifundjilo mbia anyi? 21Abamulungwile’shi: Nyi mbia Kesala. Henyihaha bebālulwile’shi: Lambulai biabia kwi Kesala bintu bia Kesala; na kw’Efile-Mukulu namu lubwilai bintu bi’Efile-Mukulu. 22Hababahushishe (bino bishima), abakanyine; abamulekyele, abayile.

23Mu dinyi efuku diadia Basadusea abafikile kwadi, abo abakulā’shi: Ta kwi lusangukilo lwa ku lufu; abamwihwishe’shi: 24A Mulambukishi, Mosesa bakwile’shi: Su muntu bafu, te na bana, mukwabo mulume akabamba mukashi e, amutandjile bana. 25Tala, munkatshi mwetu mubadi bana-balume musambobidi b’ēfu dimune; A kwibedi hababambile mukashi bafwile, na ha mwanda tabadi na bana, balekyēle mukwabo mpian’e, 26Biabia namu a kabidi anka hamune, akasatu namu mpaa n’ā musambobidi. 27Kumongo kwa boso, mukashi winyi bafwile namu. 28Binyibiabia ha lusangukilo lwa bafwe, akekala mukashi a nanyi a ku’ba musambobidi? mwanda boso babadi n’e. 29Yesu bebālulwile’shi: Anwe anuluba mwanda wa kukutwa kwiuka Bifundwe bi’Efile, sunga katshintshi k’Efile-Mukulu. 30Mwanda ha lusangukilo lwa ku lufu, tababambā, sunga mbahebwe mwibambo, anka’bo be bu bamwikeilu b’Efile-Mukulu be mwiilu. 31Anka ha mwanda wa lusangukilo lwa bafwe, tanwi babale akia kibākwile Efile-Mukulu kwanudi’shi: 32Ami nyi Efile-Mukulu a Abalahama, n’ā Isaka, n’Efile-Mukulu namu a Yakoba? Efile-Mukulu te Efile-Mukulu a bafwe, ooo, anka a abatala. 33Habahushishe kibumbu biabia, babakanyine lulambukisho lwe.

34Anka habahushishe Bafadiseo’shi, E bauminyishe Basaduseo, abekoñene hamune. 35Biabia, umune abo, muhatudi a bishila, bamwihwishe (lwihusho) lwa kumutompa’shi: 36A Mulambukishi, mulangilo kinyi ukile milangilo yoso bukata mu mukanda wa bishila? 37Yesu bamwālulwile’shi: Okafule Yehowa, Efile-Mukulu obe kifulo n’eshimba diobe dioso, na muwa wobe woso, na binangu biobe bioso. 38Uno nyi mulangilo ukata wa kwibedi. 39Wa kabidi wi hamune na uno’shi; okafule mukwenu kifulo, bu modi mwifule obe na mwinyi. 40Ha yino milangilo yibidi nyi ngihudikwe mukanda-wa-bishila na ya Batemuki.

41Bafadiseo hababadi bekoñene hamune, Yesu bebehwishe’shi: 42Anutentekyesha kinyi ha mwanda wa Kidisitu? E mwan’a anyi? Babamwālulwile’shi: E mwan’a Dafidi. 43E bebalungwile’shi: A biabia’nyi, mu Kikudi-E-Selelee Dafidi amutemuna’shi bu Nfumu na minyi’shi; 44Yehowa bakwile kwi Nfumwami’shi: Shala ku mboko yande yi balume, mpaa na hangalula be n’obe ngo, bu kitudilo kia ngwa yobe? 45A biabia’nyi, su Dafidi amutemuna bu Nfumw’e ekala’nyi bu mwan’e na minyi? 46Kubanga ku’diefuku, mpaa na a kumpala, takubadi muntu beukile kumwalula sunga kishima kimune, tabakumanga namu kumwihusha lungi (lwihusho).

Currently Selected:

Mateo 22: NTLK52

Highlight

Copy