Mateo 21

1Hababefubwile hehi na ku Yelusalema, na hakufika ku Betehaje, ku ngulu ya Olefeta, biabia Yesu batumine balondi be babidi, 2Bebalungwile’shi: Ndai mu’kia kibalo kinutadīle, na binobino anukahete mpunda mushitshikwe, na mwan’e: nwiishitule, nwiifwishe kwandji. 3Su muntu enwihusha, numulungule’shi: Nfumu e yi kyebe; na binobino akeyitakula. 4Bino bioso bibakitshinwe’shi, kikumbashwe kiakia kibākwilwe kwi mutemuki’shi: 5Lungulai mwana mukashi a Siona eshi: Talai, Nfumwobe afiki kodi’ be, muhohele, mutentame ha mpunda, na mwan’e; 6Bana ba-bukishi abayile, abakitshine bibebalungwile Yesu, 7Abafwishishe mpunda na mwan’e, abeyitentekyele mitwelo yabo, abamwinamishe hanka. 8Kibumbu kikata kibadishe mitwelo yabo mwishinda, bangi namu abatshokwele mahuhwa a mitshi, abādishe mwishinda. 9Bibumbu bibadi abiende ku mpala, na kimo kibamulondanga, bibēle musase’shi: Hosana kwi Mwan’a Dafidi; Mwabi kwi yawa afiki mwishina dia Yehowa. Hosana mwiilu! 10Binyibiabia habadi atwele mu Yelusalema, kibalo kioso kibaungakene’shi: A uno nanyi? 11Kibumbu kibakwile’shi: Uno nyi Yesu, mutemuki a ku Nasaleta mu Ngadilea.

12Henyihaha Yesu batwēlele mu ntempelo y’Efile-Mukulu, babingile boso abadi abahana na kuula mu ntempelo, baubikile mesa a bashintudi ba nfalanga, na bishalelo biabahananga nkudimba. 13E bebalungwile’shi: Kibafundjilwe’shi: Nshibo yande ayikatemunwa bu nshibo ya nteko; anka’nwe nubeialula bu mwa kwikoñgyela bangifi. 14Biabia bampofu na balemane abafikile kwadi mu ntempelo; E bebahwishishe. 15Anka habamwene batshiite-bakwidi bakata na bafundji-ba-mikanda, binyi biakukanya bikata bibakitshine, na bana bakinga namu abadi abele musase mu ntempelo’shi: Hosana kwi Mwan’a Dafidi; abakwatshile nsungu yi moo. 16Abamwambile’ shi: Bohusha biabākula 31 A nanyi a baba babidi bakitshine abikyebele eshimba dia su? Yesu bebālulwile’shi: Uolo; tanwibabale’shi: Mu kanwa mwa bana bahela na bana bakiabōmwa boloñamisha milangwilo su?

17Bebalekyele kwanka, bakatukile mu kibalo, bayile mu Betane, balele mwanka. 18Namashika habadi āluka mu kibalo, nsala yibamukwete. 19Habamwene mutshi wa kikūku mwishinda, behengyele kwaudi, beusañene bisumanga, anka mabishi; beulungwile’shi: Tokaha bikuba mpaa na kwikala-ika; anka henyiha mutshi wa kikūku ubaumine’nka hoo. 20Habeumwene bana-be-ba-bukishi, abakanyine’shi; A ee, mutshi wa kikūku ubaumu lubilo biabia na minyi? 21Yesu bebālulwile’shi: Binyibinyi nenulungula’shi: Su nwi na lukuluhilo, na kushī kwalashena mwishimba, tanukakitshi anka bu bibakitshinwe ku mutshi wa kikūku, anka anukalungula namu yino ngulu’shi; yikatushwe, yiedibwe mwishiba, biabia akikakitshibwe. 22Bintu bioso namu bianukatekye na lukuluhilo, anukebitambula.

23Henyihaha, habatwelele mu ntempelo, batshiite-bakwidi bakata, na bakulu ba bantu abafikile hadi habadi alambukisha, tabamulungula’shi: Ku matalwa kinyi okitshi yino myanda? A nanyi bakuhele ano matalwa? 24Yesu bebālulwile’shi: Ami namu nankenwihusha mwanda umune, biabia su anundungula, ami namu nankenulungula hamune kubatukile matalwa’nde a kukita yino myanda. 25A lubatshisho lwa Yoano lubatukile kwi kunyi? Kwiilu, su nkwi bantu? Abo abanangushene bana bene’shi, Su atwakula’shi, kwiilu, biabia aketualula’shi; A nkinyi biabia tanwibamukumine? 26Anka su atwakula’shi, lubatukile kwi bantu, biabia atutshinyi bantu; mwanda boso abahwandjikisha Yoanobu mutemuki. 27Biabia abamwalulwile’shi: Tatwiuku. E namu bebalungwile’shi: Ami namu tanyinulungula kubatukile matalwa ande a kukita yino myanda.

28Anka nutentekyesha kinyi? Muntu badi na bana balume babidi; bafikile kwi akwibedi, eshi; A mwanande, nda lelo ku mufubo mwifuba dia nfinyo yande. 29E bālulwile’shi: Tanende, ooo. Anka kumongo bālulwile’shimba die, bayile. 30Bafikile namu kwi ākabidi, bakwil’anka hamune. E bālulwile’shi: Eyo Mwanana, nende; 31anka tamwende, oooshye? Abamwambile’shi, Ank’awa a kwibedi. Yesu bebalungwile’shi Binyibinyi nenulungula’shi: Basangishi-ba-milambu na basha masandji bana bakashi, abenubadidilā’nka kutwela mbufumu bw’Efile-Mukulu. 32Mwanda Yoano bafikile kwanudi mwishinda dia kululama, ank’anwe tanwibamukumine, ooo; anka basangishi-ba-milambu na basha masandji bana bakashi abamukuminyine, n’anwe hanubeumwene, tanwibelangye ku mashimba kumongo’shi, bianudia kumukumina, ooo.

33Hushai ungi mwele; Kubadi muntu kampanda, sha nshibo, bakunyine efuba dia nfinyo, bedifunyishe luhoho lwa mitshi ayimene, babundwile mwanka kiengyelo baibakile nshibo kia kwengyela bikuba, yila, bu musūngo, bedilekyele balami, bayile ku nsenga yibadi kula. 34Habafikile kihindji hehi kuha bikuba, batumine bahika be kwi badjimi mu kuata bikuba biadio. 35Anka badjimi abakwete bahika be, umune abamukuhile, mungi abamwihayile, mungi’nyi abamwashile mabwe. 36Dimonyi, batumine bangi bahika, bakile bakwibedi bungi, abebakitshine’nyi anka hamune. 37Kumongo, batumine mwan’e eshi, abakanemeka mwan’ande. 38Anka badjimi, habamwenene mwan’e, abelungushene’shi: Au nyi mpianyi e, twende tumwihē tumwate buhyanyi. 39Henyihaha abamukwete, abamukatushe mwifuba dia mitshi ya nfinyo, abamwihayile. 40Biabia ahakafiki shē’fuba, akakitshi na minyi na baba badjimi? 41Abamwalulwile’shi, Akalwisha baba bantu babi na malwa e moo, akalekye’fuba die kwi bangi badjimi, baba benyi abakamuha bikuba mu bihindji biabio. 42Yesu bebalungwile’shi: A tanwi babale mu Bifundwe bi’Efile’shi: Ebwe dibahēlwe kwi babaki ba nshibo, di na mwinyi dibāluluka tamutwe w’ehaka. Nyi Yehowa bakitshine kino, nyi kia kukanya ku meso kwetu? 43Binyibiabia nenulungula’shi: Bufumu bw’Efile-Mukulu abukenwatshibwa, abukahebwa namu kwi ungi mwilo aulia bikubabia’o. 44Muntu ese akahono ha dino ebwe akatshokolwa; anka muntu ese adikahona, adikamuhondakasha bu bukula. 45Habahushishe Batshiite-bakwidi bakata, na Bafadiseo miele ye, abashingulwile’shi; n’atwe balungula. 46Anka habadi abakyebe kumukwata, abatshinyine kibumbu, ni wanda boso abadi abamuhwandjikisha bu mutemuki.

Currently Selected:

Mateo 21: NTLK52

Highlight

Copy