Luka 9

1Henyihaha betanyine bana-be-ba-bukishi ekumi na babidi hamune, bebahele bukome na matalwa kunundu kwa bikudi bibi bioso, na kuhwisha masungu oso. 2Bebatumine kulungula bufumu bw’Efile Mukulu, na kuhwisha basha masungu. 3Bebalungwile’shi: Tanutwalanga kia ha luendo, sunga mukombo sung’edimba, sunga mampa sunga mono: sunga makotshi abidi. 4Mu nshibo yoso yanukatwele, nwikale mwanka mpaa na hanukatuku. 5Boso bashyabakenukukila, hakukatuka ku kiakia kibalo, nwikukule lufūfi lwa ku ngwā yenu kwikala bu kamonyi ku mpala kwabo. 6Abo abakatukile, bēnda mu bibalo bioso mu kulungula mukāndu-wibuwa, na kuhwisha (masungu) kosokoso.

7Binyibiabia Heloda kilolo bahushishe bioso bibakitshine (Yesu) badi na mialasheno, mwanda bangi abākwile’shi: Nyi Yoano babuku ku lufu. 8Bamo’shi: Elaidja bamweka; na bangi’ nyi’shi: Ngumune a mu batemuki ba kala basanguka dimo. 9Biabia Heloda bakwile’shi: Yoano namutshibile mutwe, anka unou namu nanyi anahusha bino bintu? Binyibiabia bakyebanga kumumona.

10Batumibwa habālukile, abamulungwile bioso biabakitshine. Biabia bebātshile, benda ku bukunkula mbufyefye, kukihindji ki kabāka, ka ku kibalo akitemunwa bu Betesaida. 11Biabia bibumbu bia bantu habibeukile abamulondele, e bebakukile, bākwile n’abo ha mwanda wa bufumu bw’Efile Mukulu, bahwishishe babadi na lukalo lwa kuhwishibwa.

12Habadi nguba takyebe kuhona, biabia b’ekumi na babidi abefubwile kwadi; abamulungwile’shi: Takula kibumbu, kiende mu bibalo na ku mpese yoso yi hehi, kwa kulala na kumona bidibwa; mwanda’ twe kuno twi mu mahia a kabāka. 13Ank’e bebalungwile’ shi: ebahei’nwe biakudia. Abo abakwile’shi: Tatwi n’abio, anka mitanda yitano ya mampa, na mishiha yibidi; anka su tuenda mu kūdila bano bantu boso biakudia. 14Mwanda abadi bana balume bu binunu bitano. Biabia balungwile bana-be-ba-bukishi’shi: Ebashadikyei kibumbu makumi atano, kibumbu makumi atano. 15Biabia abakitshine, abashadikile boso. 16Henyihaha e bātshile mampa atano na mishiha yibidi, babushishe meso mwiilu, bebitekyele mwabi, bebitshokwele, bashele bana-be-ba-bukishi kutula ku mpala kwa bibumbu. 17N’abo abadile, boso abekwite; kubasangwilwe bihese bibashele, bisele bi’kumi na bibidi.

18Bitabibakitshine habadi mu kuteka buhenka, bana-beba-bukishi abadi n’e: e bebahwishe’shi: A bantu abākula’mi’shi, nanyi? 19Abo abālulwile’shi: Mbu Yoano Mubatshishi; anka bangi’shi: Elaidja; bangi’shi: Ngumune a batemuki ba kala basanguka dimo. 20Biabia bebambile’shi: Ank’anwe añunamba’shi, nyi’nyi? Petelo bālulwile’ shi: We Kidisitu ’Efile Mukulu. 21Bebalungwile bi bukoho, na kwibakayika’shi: Tanulungulanga muntu uno mwanda.

22Eshi, Mwan’a Muntu anka kufwambuka mu bia malwa bibungi, na kuhedibwa kwi bakulu, na kwi batshiitebakwidi bakata, na kwi bafundji-ba-mikanda, nakwihayibwa, na kusanguka h’efuku dia kasatu. 23Bebalungwile boso’shi: Su kwi muntu akandondo, ehele na mwinyi, eboshe nkulusu ye kwifuku n’efuku, andonde. 24Mwanda ese akyebe kuhasha muwa w’e, akeushimisha; ank’ese akeshimisha muwa we ha mwanda wande, e akeuhasha. 25Mwanda muntu asungula kinyi, su atambula nsenga yoso, anka e na bene’nyi beshimisha, su nkusumbudibwa? 26Mwanda ese ammwena būfu na bwa myanda yande kumune, Mwan’a Muntu namu anamumwene būfu hanakafikye mu ntumbo ye na mwinyi, na ya Nshye, na ya bamwikeilu balamunwe-bakishila. 27Anka nenulungula bia binyibinyi’shi, kwi bamo bemane hano, tabakamono lufu, mpaa na habakamono bufumu bw’Efile Mukulu.

28Bitabibakitshine ku nyima kwa yino myanda, ha kukila hehi mafuku mwanda, bātshile Petelo na Yoano, na Yakoba, abakamine ku ngulu mu kuteka. 29Habadi atekye, mwikelo wa mpala ye yibālulukile, na bifwalwa bie bibatokyele na kuhenyahenya. 30Biabia, talangai, kubadi bana balume babidi, abēsambile n’e, nyi Mosesa n’Elaidja. 31Abamwekyele mu ntumbo, abēsambile mwanda wa lufu lwe lubadi akakumbasha ku Yelusalema. 32Anka Petelo na babadi n’abo abanemenenwe na tulo, habadi ababuku, abamwene ntumbo ye, na bana balume babidi abadi bemane n’e. 33Bitabibakitshine, habakatukile kwadi, Petelo bākwile kwi Yesu’shi: A Nfumwami, bibuwa atwe kwikala hano; tushimikei bitanda bisatu; kimune nkiobe, kimo nkia Mosesa, na kingi nkia Elaidja: anka tamwiukye kibadi ākula.

34Habadi ākula biabia, kubafikile ekumbi, diebabwikila; n’abo abakwetwe na moo habebabwikile ekumbi. 35Biabia eyi dibatukile mwikumbi’shi: Uno nyi Mwan’ande a kifulo: Numwifwakene. 36Habakile dino eyi, abamwene’nka Yesu buhenka bwe. N’abo abauminyine, tababalungwile muntu, sunga ngumune mu aa mafuku biabia bintu biabamwene.

37Bitabibakitshine, h’efuku dia maloba, habayikile ku ngulu, bantu bebungi abafumankene n’e 38Biabia mwana mulume a mu kibumbu bēle musase’shi: Mulambukishi, nakwiyayila, tala kwi mwan’ande mulume, mwanda e mwan’nade eleka. 39Tala, mukishi aumukwata, hahindji n’āka tēle ngese: aumunyengye, na kusunya na kutusha mafulu ku kanwa, na kumusosa mbidi taukyebe kumuleka, ooo. 40Nasendelele bana bobe-ba-bukishi kumubinga, ank’abo abakutshilwe. 41Yesu bālulwile’shi: Anwe kihungilo kia bashyakukuluhilwa, basha mpuha, a nankekala n’enu kihindji ki na minyi na kwinulekyela? Fwisha mwan’obe kuno. 42Habadi kwete kufika, kikudi kibi kibamukuhile hashi, kibamunyengele. Biabia Yesu basashile kikudi kibi, bahashishe mwana, bamwalushe kwi nshye.

43Biabia boso abakanyine ku bukome bukata bw’Efile Mukulu. Anka habadi abakanya boso ku bioso bibakitshine Yesu, e balungwile bana-be-ba-bukishi’shi: 44Yino myanda yitwele biya mu matwi enu: mwanda Mwan’a Muntu akatulwa mu maasa a bantu. 45Ank’abo tambashingule uno mwanda ubebafīlwe bia bashyakwiuka, abatshine namu kumwihusha’o.

46Binyibiabia kubabukile mpaka munkatshi mwabo’shi: Nanyi akekala mukile bukata a atwe boso? 47Anka Yesu hebeukile biabadi abatentekyesha mu binangu biabo, bātshile mwana mukinga, amutula hadi. 48Biabia beba lungwile’shi: Ese akatambula uno mwana mukinga mwishina diande, antambula’mi: n’ese akantambula’mi, atambula bantumine: mwanda yawa mukile buhela munkatshi mwenu boso, nyi winyi akekala mukata. 49Binyibiabia Yoano bālulwile’shi: A Nfumu, tubamwene muntu badi abingi bikudi bibi mwishina diobe; atwe twamutosha mwanda ta mulondji n’etu. 50Biabia Yesu bamulungwile’shi: Tolekyeshanga; mwanda yawa shyatuhishene n’etu nyi ngetu.

51Bitabibakitshine, habadi mafuku akwatshibwa kwe tadi akumbana, bashinyikile mpala kwenda ku Yelusalema. 52Biabia babadishishe mikiendji ku mpala kwe; abayile, batwela mu kibalo kia Bena Samadia kumulumbulwila (mbalo) 53Abo tambamukukile, ooo, mwanda mpala ye yibadi bu akyebe’ nka kwenda ku Yelusalema. 54Bana-be-ba-bukishi, baYakoba na Yoano, habamwene (biabia) abakwile’shi: A Nfumwetu, okumina’twe kwitanyina kālo kayikye kwiilu, kebashikye fututu bu bibakitshine Elaidja su? 55Ank’e bealulwile, ebatosha’shi: Tanwiuku mwikelo wa kikudi kia nwi n’akio. 56Mwanda Mwan’a Muntu tamufwile kulwisha miuwa ya bantu, ooo, anka kwiyihasha. Biabia abayile ku kingi kibalo.

57Bitabibakitshine habayile mwishinda, muntu’mune bamulungwile’shi: A Nfumwami, nankakulondo kosokoso kōkende. 58Yesu bamulungwile’shi: Miseuyi na mena, na ha kutula mutwe (we). 59Balungwile mungi’shi: Ondonde. Ank’e bakwile’shi: A Nfumwami banda kundeka, nyende nkashikye nshyami kwibedi. 60Yesu bamulu ngwile’shi: Bafwe bashikye bafwe babo, ank’obe nda, olungule bia bufumu bw’Efile Mukulu. 61Mungi namu balewile’shi: A Nfumwami, nankakulondo, anka ondekye mbande kwenda kwibedi kulaa be kwetu ku nshibo kwande. 62Biabia Yesu bamulungwile’shi: Takwi muntu akwata lukasu kwiasa, atala kunyima, biabia tamuhwandjikile bufumu bw’Efile Mukulu, ooo.

Currently Selected:

Luka 9: NTLK52

Highlight

Copy