Luka 10

1Ku nyima kwa yino myanda, Nfumwetu basangwile bangi makumi musambobidi namu, bebatumine babidi babidi ku mpala kwe, mu bibalo bioso na mu bingi bihindji biakafiki e na mwinyi. 2Binyibiabia bebalungwile’shi: Biumbulwa mbikata, anka bafubi mbahela: nutekye Nfumu a biumbulwa, atume bafubi ba kuumbula. 3Ndai, nenutumu bu bana ba mikoko munkatshi mwa tūmishi. 4Tanutwalanga edimba dia nfalanga, sung’ebofu, sunga biashino, ooo: tanwimunanga muntu mwishinda. 5Mu yoso nshibo yanutwele, kwibedi’shi: Kufukama kwikale ku yino nshibo. 6Su mwana mufukame e mwanka, biabia kufukama kwenu kukekale mwanka; su mwi bisumanga akukāluluka’nyi dimo kwanudi. 7Mu yingi nshibo yanukekala, nudie, nutome abia bintu biabenuha; mwanda mufubi ’muhwandjikile efuto. Tanukindakananga mashibo. 8Mu kioso kibalo namu kianukatwele, n’abo abenukukila, biabia diai bintu bitulwe ku mpala kwenu. 9Nuhwishe basha masungu be mwanka, nwibalungule’shi: Bufumu bw’Efile Mukulu bubafiki hehi n’enu. 10Anka mu kioso kibalo kianukatwele, n’abo tambenukukile, tukai mu misē y’akio, nwakule’shi: 11Sunga lufūfi lwa ku kibalo kienu alwitulamata, atwinukukwila’lo, sunga mbiabia nwiukye binyibinyi’shi, bufumu bw’Efile Mukulu bubafiki hehi kwanudi. 12Anka nenulungula’shi: Mu adi’efuku, malwa a Sodoma akekala akile kubofula he malwa a kiakia kibalo. 13Mpombo kodibe Kolushine E mpombo kodibe Betesaida! mwanda bikitshino bikata bibakitshinwe mwanudi, su bibadi akukitshibwa mu Tshile na Shidona, abadia kwilanga kala, na kushāla mu bilamba bia makutu na būto. 14Anka ahakafiki efuku dia kimu, malwa a Tshile n’ā Shidona akekala bu a bofula he malwa enu. 15N’obe Kahaneuma bokamishibwa kwiilu, okayishibwa mu kalunganyembo. 16Yawa enuhushā ampusha’mi; n’e ansabula, asabula yawa antumine.

17Be makumi musambobidi abalukile na masanku’shi: A Nfumwetu, bikudibibi bibetukokyela mwishina diobe. 18N’e bebalungwile’shi: Namwene Satana ahono kwiilu bu luhete lwa mpeshi. 19Talai, nenuha matalwa a kwashina manyoka na tuminu, na ha bukome boso bwa mwitushikwe; binyibiabia takwi sunga nkimune akikenusakula. 20Sunga mbiabia, tanuse helanga ha uno mwanda’shi, bikudi bibi bibenukokyela; anka nusehele ha mwanda mashin’enu ngafundwe mwiilu.

21Ha yawa nguba Yesu basehelele mu Kikudi (E-Selelee,) bakwile’shi: Nakutumbul’obe Yaiya a mwiilu nahashi, mwanda bofīle yino myanda kwi basha binangu na bahatulukye, bweyisokwela bana bakinga: Ee! Yaiya, mwanda biabia nyi mwiyile diobe eshimba dibuwa. 22Bintu bioso bibamfishishwa kwi Nshyami, anka takwi sunga ngumune euku Mwana, anka Yaiya; na Yaiya namu takwi sunga ngumune amwiuku anka Mwana; na yawa, Mwana akamusokwela kwadi.

23Biabia bealulwile kwi bana-be-ba-bukishi, bakwile ku bukunkula’shi: Mwabi kwi meso amono bintu bianumono. 24Mwanda nenulungula’shi: Batemuki bebungi na banfumu abadi abakyebe kumona’bia bintu bianumono, anka tambebimone; na kuhusha myanda yanuhusha, anka tambeyihushe, ooo.

25Binyibiabia talai, muhatudi-a bishila bemene, bamutompele’shi: A Mulambukishi, nkite na minyi kuhyana muwa wa ikala-ika? 26E bamwambile’shi: Kifundwe na minyi mu mukanda-wa-bishila? obe obalā na minyi? 27E bālulwile’shi: Okafule Yehowa Efile Mukulu obe kifulo, mwishimba diobe dioso, na mu kikudi kiobe kioso, na mu bukome bobe boso, na mu binangu biobe bioso; na ku mwikashi n’obe bu’be na mwinyi. 28E bamulungwile’shi: Boalula binyibinyi; kita biabia okekala na muwa. 29Ank’e badi akyebe kwibingisha e na mwinyi; bakwile kwi Yesu’shi. A nanyi mwikashi n’ami? 30Biabia Yesu bālulwile’shi: Kubadi muntu bayikile ku Yelusalema, kwenda ku Yediko, bahōne mu maas’a bangifi, abamufule bilamba bie, abamusakwile, abakatukile, abamulekyele liehi kufwa. 31Binyibiabia, tshiite-mwakwidi umune badi afiki ha diadi’eshinda, habamumwene bakile ha lungi luhese. 32Biabia mwina Lefi namu anka hamune, habafikile kwanka bamutale bisumunga, bakile ha lungi luhese. 33Anka mwina Samadia umune habayile luendo, bafikile kwadi; habamumwene bamukwatshile lusa. 34Befubwile kwadi, bamwanyine malonda, bamuhongolwele mwanka mwimu na nfinyo, bamualiza tentekyele ha nyama ē na mwinyi, bamufishishe ku nshibo ya benyi, bamulēle. 35H’efuku dia maloba habebwele luendo, batushishe nfalanga ya ndenadi yibidi, beyihele sha nshibo, bamulungwile’shi: Omulele; na bioso okahana dimonyi, hankāluka nankakwalwisha. 36Obe ohwandjikisha’shi; A nanyi a ku baba basatu badi mwikashi a yawa bahone mu maas’a bangifi? 37E bālulwile’shi: Yawa bamufwidile lusa. Biabia Yesu bamulungwile’shi: Nda, okite hamune.

38Henyihaha bitabibakitshine, habayile abatwelele mu kingi kibalo; na mwana mukashi umune atemunwa bu Māta, batambwile Yesu mu nshibo ye. 39Badi na mukwabo mukashi atemunwa bu Madiya, badi mushale namu ku ngwā ya Yesu, badi ahusha mwanda we. 40Anka Māta bakambi-lwe na mwanda wa mifubo yibungi ya mu nshibo; bafikile kwadi, bamwambile’shi: A Nfumwami, tonangushena bibandekyela mwin’ande kufuba buhenka bwande? Banda kumulungula afikye akankwashye. 41Yesu bamwālulwile’shi: Māta! Māta! obe okamba kunangushena mwanda wa myanda yibungi ayikukalakasha: 42Anka kintu kimune ki lukalo, na Madiya basangwile kiakia kihindji kibuwa kishyakikamwatwa kwadi ooo.

Currently Selected:

Luka 10: NTLK52

Highlight

Copy