Luka 8

1Bitabibakitshine kumongo, bayile mu bibalo bioso bikata, na mu misumba yoso, badi alungula na kulesha mukānduwibuwa wa bufumu bw’Efile Mukulu: na b’ekumi na babidi (abadi) n’e. 2Na bamo bana bakashi abadi bahashibwe ku bikudi bibi na ku masungu; Madiya badi alumbwa dingi die bu Mandalene, yawa batushishwe bikudi bibi musambobidi. 3Na Yoanana mpiana a Tshusa, winyi badi kalama ka bintu bia Heloda na Susana, na bangi bebungi abadi abamufubile na buheta bwabo.

4Binyibiabia habadi bantu bebungi bekoñene hamune, na ku bibalo bioso abafikile kwadi, ebakwile mu lukindji’shi: 5Muminyi ’ēfuba bayile mu kumina mbio ye: habaminanga, yingi yibahone ku bukunkula kw’eshinda; yibāshinwe, na tonyi twa mwiilu tubeyisomwene. 6Yingi yibahone ha lubwebwe; hayibamene, yibaumine mwanda yibakutshilwe kitalesha. 7Yingi yibahone munkatshi mwa milobo; biabia milobo yibamene hamune, yeyifina. 8Yingi yibahone ha nsenga yibuwa, yibamene, yibahele bikuba bu ku lukama. Habahwile kwakula yino myanda, banyishish’eyi’shi: E na matwi a kuhusha ahushe.

9Biabia bana-be-ba-bukishi abamwihwishe’shi: A luno luki ndji lwi na minyi? 10E bakwile’shi: Kwanudi’nwe nkinu hebwe kwiuka kwa myanda yifībwe ya bufumu bw’Efile Mu kulu: anka kwi bangi yi mu nkindji’shi; hakumona tabakamono, na ha kuhusha tabakashingula, ooo. 11Anka (luno) lukindji lwi bino. Mbio nyi mwanda w’Efile Mukulu. 12Ayo yi ku bukunkula bw’eshinda mbaba abahusha; henyihaha diabolo afika, āta mwanda wi ’mashimba’bo tala bakakumina, na kuhashibwa. 13Ya ha lubwebwe mbaba abahusha, batambula Mwanda na kusehela; ank’abo tabe na mishi, abakumina’nka kihindji kihela, na ha kihindji kia kutompibwa biabalamunuka. 14Aya namu yibahone munkatshi mwa milobo, mbaba abahushishe, benda, abafinwa na bia kwinyenga na bia buheta, na bia muloo bia (uno) muwa, tambahe bikuba bikumbane. 15Ank’aya ya mu nsenga yibuwa, mbaba abahusha Mwanda, abeulama mwishimba dia binyibinyi dibuwa, abaha bikuba na kwishinka.

16Takwi muntu ha kōsha kimunyi ekitule mushi mwa kintu, sunga nkutwesha mushi mwa lusala: anka kwikitula ha kitulo kia kimunyi’shi, abakatwela mwanka bamone etata. 17Mwanda takwi kifwame kishyakikasokolwa, sunga kifibwe kishyakikaukibwa na kufumbwila hatoka. 18Binyibiabia dimukai ku bianuhusha: mwanda kwi’wa e n’abio akahebwa, na kwi yawa shī n’abio, akamañunwa n’akia anangushena’shi, nyi n’akio.

19Henyihaha nyin’e na bakwabo abafikile kwadi, abakutshilwe biakufika hehi n’e ha mwanda wa kibumbu. 20Abamulungwile’shi: Nyin’obe na bakwenu bēmane hasha, abakyebe kukumona. 21N’e bebāluwile’shi: Nyina’mi na bakwetu nyi mbano abahusha mwanda w’Efile Mukulu na kwiukita.

22Henyihaha bitabibakitshine, ha ding’efuku batwele mu bwato na bana-be-ba-bukishi hamune; bebalungwile’shi: Twabukei adi’eshia di’eshiba. N’abo abalundwile, bēnda. 23Anka habadi abēnde, bahone mu tulo: biabia kihahi kikata kibafikile h’eshiba, (na bwato) bubadi abuulu mema, abadi hehi kutukila. 24N’abo abafikile kwadi, abamubushishe’shi: A Mwanana! a Mwanana! tubatukila. Binyibiabia babukile, basashile luhahi na mbundambunda ya mema; bibalekyele, kubadi talō nyā. 25E bebalungwile’shi: A lukumino lwenu lwi kunyi? N’abo abakwetwe na moo, abakanyine, abelungushene’shi: A uno muntu e na minyi? mwanda bakamikile mpahi na mema, n’abio biamukokyela.

26Abafikile ku nsenga ya Bena Ngadilene, yitadile ku Ngadileo. 27Habābukile ku mahia, muntu mulume a mu kibalo bafumankene n’e, badi na bikudi bibi kihindji kikata, badi shī mufwale bifwalwa, sunga nkwikala mu nshibo, anka ku mashama. 28Habamwene Yesu, bēle musase ukata, bahone hashi ku mpala kwe, banyishishe eyi’shi: Nyi n’obe mwanda su, obe Yesu Mwan’Efile Mukulu mukile boso? nakusendela’shi: To’mweshanga malwa. 29Mwanda bakamikile kikudi kibi kutuka kwadi. Mwanda kibamukwatshile misusa na misusa: badi mwanyibwe namu mu nkano, na kwelwa ’momba: ank’e bakutwile mianyo, badi abingibwa na kikudi kibi mu mahia a kabāka. 30Biabia Yesu bamwihwishe’shi: Eshina diobe mbu’nyi? Bālulwile’shi: Nyi Kibumbu: mwanda bikudi bibi bibungi bibamutwele ntunda. 31N’abio bibamwiyayile’shi: Twetukamikilanga kutwela mu luhongo (lushī na nfudilo). 32Kubadi lombe lwa ngulube ayidi ha ngulu; biabia bibamwiyayile’shi: Etukumine tutwele munda mwa’yo. E beyikuminyine. 33Binyibiabia bikudi bibi bibatukile munda mwa muntu, bibatwele mu ngulube: na lombe lubālalele lubilo ha mfudi, mpaa na mwishiba, abeyishikile mitshima, yafwa. 34Be’nyi abadi abeyidisha, habamwene kibakitshibwa abasukile, abalungwile mu kibalo na ku mahia. 35Henyihaha abatukile mu kumona bibakitshibwa; abafikile kwi Yesu, abasañene winyi muntu batushishwe bikudi bibi, mushale ku ngwā ya Yesu, mufwadikwe, badi na binangu bibuwa; n’abo abatshine moo. 36Abo namu abamwene, abalungwile mu bahandjile yawa badi mukwatshibwe na bikudi bibi.

37Binyibiabia kibumbu kioso kia mu nsenga yoso ya Bena Ngadilene abamwiyayile’shi: Etukatukye, mwanda abakwetwe na moo ukata; n’e batwele mu bwato, bālukile. 38Biabia yawa muntu batushishwe bikudi bibi bamwiyayile’she: Nyikale n’obe: anka Yesu bamutakwile’shi: 39Aluka ku nshibo yobe, olungule myanda yikata yibakukitshinwa kw’Efile Mukulu. E bayile, bahalakeshe mu kibalo kioso mwanda wa yaya myanda yikata yibakitshine Yesu kwadi. 40Bitabibakitshine, habālukile Yesu, kibumbu kibamukukile na kusehela, mwanda boso abadi abamutengyela.

41Biabia kubafikile muntu mulume eshina die bu Yailuse, badi mulami a kitumbwilo; bahone ku ngwā ya Yesu, bamwiyayile’shi: Ofikye ku nshibo yande. 42Mwanda badi na mwana mukashi eleka, badi bihwa hehi ekumi na bibidi, e badi mulale hehi na lufu. Anka habayile bantu abamufine efina.

43Henyihaha mwana mukashi badi na busungu bwa kishila, bihwa ekumi na bibidi, bahudishe bintu bie bioso kuhana kwi bananga, tamumone sunga ngumune amuhasha. 44Bafikile ku mongo kwe, bakumine ku kimāma kia mutwelo we, biabia kahindji n’āka kishila kibatshibika. 45Yesu’shi: A nanyi bankumu’shi? Habatune boso, Petelo na bangi abadi n’eabamwāluwile’shi: A Mwanana, kibumbu kikushikye na kwifinena, biabia obe wehushe’shi: A nanyi bankumu? 46Yesu bakwile’shi: Muntu bankumu; mwanda nashingula’shi, bukome bubantuku. 47Habamwene mwana mukashi tabadi mufwame, bafikile na kususa, bakunamine ku ngwā ye, bamulungwile ku mpala kwa bantu boso kīnyi kibamukumishe (mboko), na kibahashibwa kahindji n’āka. 48Biabia bamulungwile’shi: Mwan’ande mukashi nyish’eshimba, lukuluhilo lobe lubakuhasha; nda na kufukama.

49Habadi kwete kwakula, kubafikile umune (ku nshibo) ya mulame a kitumbwilo, bakwile kwadi’shi: Mwan’obe mu kashi bafu; tokambakashanga Mulambukishi. 50Anka Yesu hakuhusha bamwālulwile’shi: Totshinanga, anka kukumina, e akahashibwa. 51Biabia habafikile ku nshibo, tamukumine mungi muntu kutwela, anka Petelo, na Yakoba, na Yoano, na nshye mwana, na nyin’e. 52Biabia boso abadi abamudidi kitumo, ank’e bakwile’shi: Tanudilanga, tamufwe, ooo, ’mulale tulo. 53Abo abamusehele na kumubengakana, mwanda abaukile ’shi, mwana ’mufwe. 54Biabia ebebatushishe boso hasha, bamukwete ku mboko, bamwitanyine’ shi: Nsongwakashi buka. 55Henyihaha kikudi ki’e kibālukile kahindji n’āka, bēbwele; e bebalungwile’shi; Muhei biakudia. 56Biabia abamutandjile abakanyine bikata, anka e bebalangile’shi: Tanulungulanga muntu bibakitshinwe.

Currently Selected:

Luka 8: NTLK52

Highlight

Copy