Luka 17

1Henyihaha, balungwile bana be ba bukishi’shi: Tabikakutwa kufika biakukokola anka mpombo (kwi yawa) akebifisha. 2Kuanya kwa yawa muntu ebwe adihelwa mu nshingo, kumwela mu kalunga ka mema, nkukile buwa e kukokosha umune ā’ba bahela.

3Nwilamei’nwe bana bene. Su mukwenu bakusola mwada, nomusashile; su bēlanga omulekye. 4Su bakusola misusa musambobidi kwifuku dimune, na mwifuku dimune akaluka kodi misusa musambobidi’shi nelanga, okamulekyele.

5Biabia batumibwa abakwile kwi Nfumwetu’shi: Atufwimishe lukuluhilo lwetu. 6Nfumwetu bālulwile’shi: su nubadi na lukuluhilo bu kamuma ka mutshi wa mutade nwi bianudia kwakula ku uno mutshi wa (buki) syeamine: wekale mu shūdikye mpa na ku mishi, okyekune mu kalunga ka mema; n’au aukenukokyela. 7Anka nanyi ēnu e na mpik’e kwete kudima sunga kudisha bimunwa, ahayisha kihindji ha kwaluka kwifuba, amwambe’ shi: Fika oshale ha bidibwa. 8Ank’e takakishakisha kumulungula’shi: Ndumbulwila biakudia biande, nyisha kilamba kiobe mu kifuka ontambikye, mpaa na hampu kudia na kutoma, kunyima okadi na kutoma namu? 9Atumbula yawa mpika ha mwanda bakitshi uno mwanda ubamulangikishe su? Ooo. 10Anwe namu hamune, hanukahudisha kukita aya myanda yoso, yianubalangikishwe, nuakule’shi: Twi bahika ba bisumanga: tubahwile kukita kiakia kia tubadi nakio mwanda kukita.

11Bitabibakitshine ha kwenda ku Yelusalema, bakile munkatshi mwa Samadia na Ngadilea. 12Hakutwela mu kingikibalo, kubamufumankene bana balume ekumi, babadi basha kifwe, abadi bemane kula. 13Abanyishishe mayi’abo’shi: A Yesu Nfumwetu, etusambe lusa. 14Habebamwene, ebalungwile’shi: Ndai nukeleshe kwi batshiite bakwidi. Bitabibakitshine ha kwenda, abatosheshwe. 15Na umun’abo, habamwene’shi natoshwa, bālukile, atumbishe Efile Mukulu n’eyi dikata. 16Ahona ha mpala (ye) ku ngwa ye, na kumutumbula: n’e badi mwina Samadia. 17Biabia Yesu bālulwile’shi: A takwikalanga ekumi batoshibwe, anka kitema ki kwi kunyi? 18Takwi basananwe baluke kwela ntumbo kw’Efile Mukulu anka uno mwenyi. 19Biabia bamulungwile’shi: Ebwe, oende luendo īobe: lukuluhilo lwobe lubakuhasha.

20Binyibiabia ha behwishwe kwi Bafadiseo, ahakafiki bufumu bw’Efile Mukulu mpa kinyi, ebebālulwile’shi: Bufumu bw’Efile Mukulu tabukafiki na kutadibwa na meso. 21Sunga abakamba’shi: Talai kuno! Sung’ashi: Talai yikwa! mwanda, talai bufumu bw’Efile Mukulu bwi munda mwenu.

22Balungwile bana-ba-bukishi’shi, Mafuku akafiki hanukakyebe kumona efuku dimune dia Mwan’a muntu, takedimono, ooo. 23Abakenwamba shi: Talai kuno; sunga’shi, Talai yikwa: tanwendanga, sunga nkulonda. 24Mwanda’nka mwikela kuhenya kwa mpeshi, ahenya ku luhese lumune’nka lweilu, akutosha ku lungi luhese lweilu; anka biabia namu abikekala Mwan’a muntu mwifuku die. 25Anka kwibedi akafwambuka mu bintu bibungi, na kuhedibwa ku kino kihungilo. 26Bu bibadi bikale mu mafuku a Noa, biabia namu abikekala mu mafuku a Mwan’a muntu. 27Abādi abādi, abādi abatomo, abādi abehelena malunda, abādi a bahebwa malunda, mpā na kwifuku dibatwele Noa mu bwato, na kieshi kia mpeshi kibafikile na kwibatukisha boso. 28Biabia namu bu bibadi mu mafuku a Lota; abādi abadi, abādi abatomo, abādi abaulu, abādi abahana, abādi abakunu na kwabaka. 29Anka diadi’efuku dibālukile Lota mu Sodoma, kubanokyele kālo na nsulufa mwiilu na kwibatukisha boso. 30Anka biabia namu abikekala mwifuku dia kufumbulwa kwa mwan’a muntu. 31Mu diadi’efuku yawa akeleala hanundu lia nshibo, na bintu bie bi mu nshibo, takaiki mu kwibiata, ooo, na yawa e mwifuba tāluka namu. 32Tentekeshai mpian’a Lota. 33Ese akimbi kuhasha muwa we akeushimisha: n’ese akashimisha muwa we akeubombelesha. 34Nenulungula’shi: Mu bwabwa bufuku bantu babidi abakekala ha lusala; umune akātshibwa, mungi akashala. 35Bana bakashi babidi abakekala abahele kwibwe hamune, umune akātshibwa, mungi akashala. 36Bana balume babidi abakekala mwifuba, umune akatshibwa, mungi akashala. 37Binyibiabia abamwālulwile’shi: Kwi kunyi Nfumwetu? E bakwile kwabadi’shi: Kosokoso kwi mbidi yifwe nyiakukoñena mpungwe.

Currently Selected:

Luka 17: NTLK52

Highlight

Copy