Yoano 9

1Habadi (Yesu) akidi, bamwene muntu batandjilwe bu mpofu. 2Biabia bana-be-ba-bukishi babamwihwishe’shi: A Mulambukishi, bakitshine bibi nanyi? uno muntu su babamutandjile, mwanda bamutande nabumpofu. 3Yesu bebalulwile’ shi: sunga nguno, sunga benyi abamutandjile takwi mukite ibibubi, ooo: anka ha mwanda bikitshino bi’Efile Mukulu abikamwekyela mwadi. 4Mwandji nao ngwa kukita mifubo ya bantumine ha ki kanya kwanka: bufuku abukafiki bushia bwiuku muntu kukita mufubo. 5Ha nki ha nsenga nyi etata dia ba-hano-ha-nsenga. 6Habahwile kwakula biabia, bafile mata hashi, basobakene nsenga na mata, bashingile yanka ’meso a muntu mpofu. 7Bamulungwile’shi: Nd’oketumpe mwishiba dia Siloama (kuhatula nyi kwambashi, Mutumibwe.) Biabia, bayile, beitumpile, bālukile na meso abulwe.

8Binyibiabia bākwabo n’ababamumonanga kala habadi kī mpofu, aboshi: Au tangwinyi badi mushale atekye?

9Bangi’shi; Nyank’e; bangi’shi: Ooo, mumwifwane ku na minyi: ank’e na mwinyi’shi: Nami uno. 10Abamwambile’shi: Meso’be ababulwa na minyi? 11E beba lulwile’shi: Muntu, atemunwa bu Yesu basobakana nsenga, banshingi ’meso, bañambashi: Nda kwidindji dia Siloama oketumpe: nayile, nanketumpa, namono. 12Biabia, babamwihwishe’shi: E kwi kunyi? E bambile’shi: Tañuku’mi.

13Babafikile n’e badi mpofu kwi Bafadiseo. 14H’efuku dibasobakenye Yesu nsenga, na dibabulwe meso’e dibadi efuku dia Lubingu. 15Henyihaha Bafadiseo namu babamwihwishe dimonyi’shi: Bomono na minyi? E bambile’shi: ’E banshingi nsenga yifundakane ’meso ande, neitumpu, biabia namono meso. 16Binyibinyi, bangi ba Bafadiseo, babambile’shi: Au muntu ta ngw’Efile Mukulu, mwanda tamushile’efuku dia Lubingu. Bangi’shi: Muntu mulwishi euku kukita myanda ya bilengeleshi na minyi? Biabia babelamunwine. 17Babaihwishe badi mpofu dingi’ nyi’shi: Obe namu okula na minyi kwi’wa bakubula meso? E balulwile’shi: E mutemukye na mwinyi. 18Anka ba Yudea tambakumine ha mwanda we’shi: badi mpofu, bamono meso, mpa na hababaitanyine babatandjile winyi babulwilwe meso. 19Binyibiabia, babebehwishe’shi: Uno ngwinyi mwan’enu anwambashi batandjilwe mpofu su? a bino nkinyi kibamumwesha meso. 20Babamutandjile’ abambile’shi: Atwiuku’shi, uno nyi mwan’etu, atubatandjile mpofu. 21Anka tatwibeukye mu babalwila binobino, tatwibeukye namu bamubula meso’e; mwihushei, na mwinyi, tadi muntu mukulu, ākula e na mwinyi. 22Babamutandjile babakudile biabia ha mwanda wa kutshina ba Yudea; mwanda Bena Yudea babashimikile kala’shi: su muntu bakumina’shi E Kidisitu, atumubingi mu kikoñeno. 23Binyibiabia, babamutandjile abakwile’shi: Tadi mukulu, mwihushei na mwinyi. 24Biabia, babaitanyine dimo batandjibwe mpofu, bamwambashi: Otumbishe Efile Mukulu: atwiuku’shi uno muntu ’mubi. 25E bebalulwile’shi: Su E mulwishi tafiuku; neuku mwanda umune’nka’shi: ami nadi mpofu kala, binobino namono. 26Babamwihwishe’shi dimonyi, E bakukitshine kinyi? babulusha meso’be na minyi? 27E bebalulwile’shi: Tampwile kwinulungula kala, n’anwe tanwibashushe: A! kia nukyebela kuhusha dia kabidi nkinyi? Anukyebe namu kwikala bana-be-ba-bukishi su? 28Biabia babamukayile’shi: Obe we Mwan’E a bukishi; anka’twe twi bana-ba-bukishi ba Mosesa. 29Atwiuku’ Efile Mukulu bakwile kwi Mosesa; anka uno muntu tatwibeukye kubafikile. 30Biabia awa muntu bebalulwile’shi: Nyi henyiha mwanda wa ku kanya’shi: E bambule meso ande, n’anwe tanwibeukye kubafikile. 31Binobino atwiuku’shi ’Efile Mukulu tahushā basodi ba myanda: anka su muntu e mulangwidi w’Efile Mukulu ne akitshi abikyebe’shimba diE, E amuhusha. 32Kumbangilo, kwa nsenga, mpā na binobino, takwahushishwe muntu batandjibwe mpofu kubulwa meso na mungi muntu. 33Su uno muntu tamufikye kw’Efile Mukulu, tabadi akwiuku kukita mwanda. 34Babamwalulwile’shi: Obe bodi mutandjibwe binyibinyi mu bubi, wetulambukisha’twe su? Biabia babamubingile. 35Yesu bahushishe’shi babamubingi; habamusañene, bamwihwishe ’shi: Okumine Mwan’Efile Mukulu su? 36E balulwile’shi: E nanyi Mwanana, mwandji a kumukumina? 37Biabia Yesu bamwambile’shi: Obe bohu kumumona, n’akula n’obe’u n’E. 38Au bambile’shi: Mwanana, nakumina. Biabia bamulangwidile.

39Yesu balungwile’shi: Nyi ha mwanda wa kutshiba kimu nafikile hano ha nsenga’shi: bashia bamono, bamone; na bamone bekale bu bampofu. 40Biabia bangi ba Bafadiseo babadi n’E, babahushishe yino misambo, babambile’shi; Atwe’nyi twi bampofu namu su? 41Yesu bebalungwile’shi: Su nubadi bampofu, tanubadi na bubi: anka binobino anwamba’shi: Atumono meso; binyibiabia milwisho yenu nwi nayo.

Currently Selected:

Yoano 9: NTLK52

Highlight

Copy