Yoano 11

1Kubadi muntu badi akumbu, eshina die bu Lasalasa, Mwina Betani, kibalo kia Madia na mukwabo Mata. 2(Winyi Madia bashingile Nfumwetu na mwimu wa mahembwe, amuhampula ngwa ye na nyene ye; ndumiana’be Lasalasa badi na busungu). 3Hankashian’E babamutuminyine mwanda’shi: A! Nfumwetu, uno odi ne kit’ulo bakumbu. 4Habahushishe Yesu (uno), bambile’shi: Abu tambusungu bwa lufu, ooo, anka bwa ntumbo y’Efile Mukulu’shi, Mwan’Efile Mukulu amone mwadi akutumbishibwa. 5Yesu badi na Mata kifulo na mukwabo mwana mukashi, na Lasalasa. 6E habahushishe mwanda wa busungu bwe, bashalele kwanka kwa mukyīla mafuku abidi. 7Biabia kumongo, balungwile bana-be-ba-bukishi’shi: Twendei dimo mu Yudea. 8Bana-be-ba-bukishi babamwalulwile’shi: Mulambukishi, anka henyi habakyebele ba Yudea kukuasa mabwe’ha; olukenyi kwanka dia kabidi? 9Yesu bebalulwile’shi: Tamwi bihindji bia nsa ekumi na bibidi mu nguba umune su? Su muntu atembe mu kanya takakokela, ooo, mwanda amona etata dia hano-ha-nsenga. 10Anka su muntu atembe bufuku, akokola, mwanda kanya takemunda mwe. 11Habahwile kwakula yino myanda bebalungwile’shi: Kuku etu Lasalasa mulale mu tulo; anka tanyende mu kumubusha mu tulo. 12Biabia bana-be-ba-bukishi babambile’shi: A! Mulambukishi, su mulale mu tulo akekala biya. 13Biosobi, Yesu badi akula mwanda wa lufu lwe: anka’bo tabahwandjikisha’shi, akwila mwanda wa kulala mu tulo. 14Biabia Yesu bebalungwile biya’shi, Lasalasa bafu. 15Anka, ha mwanda wenu nasehela tanyikalanga kwanka, mwanda, anukakumina, anka twendengyei kwadi. 16Biabia, Tomase batemunwanga bu Didimusa, balungwile bakwabo bana-be-ba-bukishi ’shi: Twende namu, n’atwe bene, tukafu n’E hamune. 17Biabia habafikile Yesu kwanka, bamusañene mulale ’mashama mafuku ananka. 18Betani badi hehi na Yelusalema, kubadi kihindji kia kilometre isatu. 19Bena Yudea be bungi babadi bafikye kwi Mata na Madia, mu kwibasamba ha mwanda wa mukwabo. 20Binyibiabia, Mata hakuhusha’shi. Yesu ngiu wafiki, bayile mu kumutundaisha: anka Madia badi mushale mu nshibo. 21Biabia Mata balungwile Yesu’shi: A! Mulambukishi, su obe wekalanga kuno mukwetu tabadi a kufwa. 22Anka neuku’shi, sunga binobino kioso kiokatekye kw’Efile Mukulu, Efile Mukulu akakuha’kio. 23Yesu bamulungwile’shi: Mukwenu akabuku dimo. 24Mata bamwalulwile’shi: Neuku’shi akabuku dimo ha lusangukilo, kwifuku dia nkonko. 25Yesu bamulungwile’shi: Ami uno nyi lusangukilo na muwa winyi: akankumina, sung’e bafu, anka akekala na muwa. 26Ese e na muwa, akumina mwimi, takamono lufu, sunga mpahelahela. Okuminau su? 27Bamwalulwile’shi: Uolo, Nfumwami: Nakumina’mishi, Obe we Kidisitu, Mwan’Efile Mukulu, yawa afiki hano-hansenga. 28Habakwile biabia, bayile, aketamina mukwabo Madia mu bufiefie, bambile’shi: Mulambukishi bafiki, ngiu wakwitamina. 29Habahushishe, bebwele lubilo, enda kwadi. 30Biabia Yesu badi tabandjile kufika mu kibalo, badi kianka kubakamutundaishe Mata. 31Binyibiabia, Bena Yudea babadi nabo mu nshibo, abamusamba, hababamwene Madia bebo lubilo, tēnde, abo tabamulondo’shi: ’Ende ku mashama mu kudila kwanka. 32Binyibiabia, Madia habafikile kubadi Yesu, hakumumona, bahone ku ngwa ye, eshi: A! Nfumwami, su obe wekalanga kuno, ndumian’etu tabadia kufwa. 33Binyibiabia Yesu habamumwene kwete kudila, na baYudea namu baBafikile n’e abadidi, eshimba die dibamufudidile, dibadi anka fututu. 34Baihwisheshi: Anwibamushikye kwi kunyi? Babamulungwile’shi: A! Mulambukishi ofwotale. 35Yesu badile mpolo. 36Biabia Bena Yudea babambile’shi: Talai biadi ne kifulo! 37Anka bangi namu’shi: Au muntu abula meso abadi mpofu, tabadi mwiukye mwa kulekyesha uno muntu namu kufwa su? 38Binyibiabia Yesu n’eshimba difudile munda anka fututu kabidi, bayile ku mashama. Abadi a muta n’ebwe dibadi dibwikile hanka. 39Yesu bambile’shi: Katushai ebwe. Anka Mata mukashian’e mufwe, bamulungwile’shi: A! Nfumu etadi anunku binobino, mwanda tadi mafuku ananka na kufwa. 40Yesu bamwihwishe’shi: A nkikulungwila’mishi su bokumina okamono ntumbo y’Efile Mukulu su? 41Henyihaha babakashishe’bwe dibadi dibwikile ku mashama alale mufwe. Biabia Yesu babandulwile meso’shi: Yaiya nakutumbula mwanda obe bompushisha. 42Neukile’shi ompushisha mafuku oso: anka ha mwanda wa bano bantu bemane, nakula uno mwanda’shi, bakumine’shi, Obe bontumine. 43Habahwile kwakula biabia belele musase ukata’shi: Lasalasa tuka. 44N’e badi mufwe batukile, muhombelwe mbwisha ya bamushikile nayo, ku masa na ku ngwa ye: na ku mpala kwe kubadi kuhombelwe kitambala. Yesu bebalungwile’shi: Muhombolei, ēnde. 45Biabia Bena Yudea be bungi babadi bafikye kwi Madia, abamwene bibakitshine Yesu, abamukuminyine. 46Anka bangi bakwabo babayile kwi baFadiseo, kwibalungula bibakitanga Yesu.

47Binyibiabia, batshiite bakwidi na baFadiseo, babebungile mu lukuku, babambile’shi: Tukite na minyi? mwanda uno muntu kwete kukita bilengeleshi bibungi. 48Su atumuleka bisumanga, boso bakamukumina: biabia Bena Loma abakafiki na kunyenana nsenga yetu, na mwilo wetu namu.

49Umune abo, mutemunwe bu Kaifasa, badi mutshiito mu kiakia kihwa, bebalungwile’shi: Tanwi na kianwiuku. 50Sunga kutentekesha biakidi kitulombene’shi, muntu umune afwile bantu, biabia mwilo woso taufu. 51E tamwiakwile uno mwanda: anka ha mwanda e badi tshiite mwakwidi mu kiakia kihwa, batemukile’shi: Yesu afwila uno mwilo. 52Tañanka wa uno mwilo umune’nka’anke’shi; akafumankasha namu bana b’Efile Mukulu būmune, abadi abahalakene kungi kungi. 53Henyihaha, ku diadi’efuku mpā, babadi abebungu lukuku mwa kumwihaila. 54Binyibiabia Yesu tabatembanga hatoka munkatshi mwa baYudea dimo: anka bakatukile kwanka, bayile ku luhese hehi ku kabāka, ku kibalo kitemunwa bu Efeleme, baishishe kwanka na bana-be-ba-bukishi.

55Biabia Pashika ya Bena Yudea yibadi hehi: be bungi abakatukile ku mpese yabo, bēnde ku Yelusalema kwibedi kwa Pashika, mwanda wa kwisūla. 56Henyihaha abakimbile Yesu, anka hābadi bēmane muntempelo, babeihushene’ shi: Anutentekyesha kinyi’shi, takafiki ku Bidibwa bia kusehela su? 57Batshiite bakwidi bakata na baFadiseo namu babēle kishila’shi: Su kwi muntu euku kwadi, aleshe kwanka, bakamukwate.

Currently Selected:

Yoano 11: NTLK52

Highlight

Copy